Týdysk ia deside, pos un mense en acel loca, con un clima tan multe bon (de cual el ia profita per comensa cultiva), visita la limita este de sua contia, car el ia sabe ce, en la frontera ueste ia es la rena de sua senior antica, la rena de Frynkisia. El ia comensa traversa la bosce cual ia es en la este, e, pos multe cavali, el ia ariva a un vileta multe peti.
Ala, un campanian, vidente el, ia saluta el, disente: “Alo, senior cavalor, de do tu veni?”
“Me veni de la rena de Frynkisia, ma no teme, me ia perde mea via e me no sabe do me es.”
“Tu es en la vileta ultima de la rena de Ejustirisia.”
“Bon,” Týdysk ia responde. E sin dise otra cosa, el ia traversa denova la monte asta ariva a sua contia.
“Ambos renas es amin e los no luta contra lunlotra, do me sabe ce sua armadas no va traversa la bosces, tal, me va pote resta calma,” Týdysk ia pensa.
E el no ia sabe como multe el ia es erante.
La rena de Frynkisia ia es un de la renas la plu importante de la continente. An tal, la plu de la persones ia es povre, e la re no ia cura per esta.
Par causa de la scrivedas de alga nobiles, cual ia parla de “diretos, egalia, libria”, multe persones ia comensa revolta contra la re. En la comensa, la nobiles ia pensa ce lo es un revolta simple, sin multe complica, ma pos un mense, los ia vide ce cuasi tota la pais revolta, e ce la strutur intera de la stato ia es atacada: la persones ia respeta no la nobiles no la pretes, e multe eglesas ia es ardeda.
“Esce esta revoltores no va respeta an Dio?” la re ia demanda a sua conselores. “Me comanda ia es donada a me par La Plu Alta, e los desira estrae lo de me? Envia la soldatos e, si lo es nesesada, mata tota ci oposa la re e la pretes.”
La pais ia vide un batalia en cuasi cada via e sola alga viletas en la este no ia ataca la eglesas, car los ia es multe relijiosa. On no ia sabe ce los es tal car los ia es la plu povres de la tota pais, ma lo es serta ce acel tera ia pare no parteni a la rena, car la vive ia continua como asta acel momento.
Ma tota calmia no pote resta per sempre, e la revoltores, sabente ce acel viletanes no ia vole arde eglesas e ia respeta la re, ia arde un vileta con sua abitores e, cuando los ia comensa pasea en dirije a la vileta du, tota sua abitores ia comensa fuji a la bosce. Sola la plu jovenes ia pote ariva, car la bosce ia es multe spesa e los ia debe asende la colina per ariva ala. Con los, la prete xef ia pote ariva, salvante la Biblia e alga libros relijiosa.
“Ta ce nos fuji a la bosce,” el ia consela la survivores.
“E cual nos va fa ala?” un joven ia demanda. “Nos no sabe cual es en acel bosce.”
“Dio va aida nos,” ia es la responde de la prete.
E acel survivores, con no cosa con se, ia comensa sua pasea tra la bosce, sin sabe ce los es vadente a en la contia de Goremy.
Týdysk ia es paseante en la bosce, xercante bacas e moras per come, cuando el ia trova acel persones, cuasi mor.
“Ci es vos e cual vos fa en mea contia?” el ia demanda, estraente sua spada.
Acel persones, asustada, ia ajena se e ia comensa plora. La prete ia avansa en dirije a Týdysk e ia dise: “Cavalor, pardona nosa vives, nos ia fuji de la ataca fada a nosa vileta par los ci ia revolta contra la re de Frynkisia. Nos no ia sabe ce nos invade tua contia.”
“Si la revoltores ia es contra la re, perce los ia ataca vos? Me pote vide ce vos no es rica…”, Týdysk ia demanda.
“Nos respeta ancora nosa Senior, e no ia vole arde eglesas e ataca la pretes,” un joven ia dise.
“Cual? Esce los es atacante la pretes e ardente eglesas?” Týdysk ia demanda. E, en acel momento, lo cual la Virjin ia dise a el ia reveni a sua mente:
“Esta es tua propre pais nova.” “Asi tu va dona refuja a los ci es persegueda par respeta la Senior. E entre los, en la fem la plu odiada, tu va trova un rea.”
Týdysk ia desende de la cavalo e ia dise a totas: “Tota de vos, escuta me: De aora vos no es renadas de Frynkisia, ma de la Contia de Goremy. Me, Týdysk, conte e fundor de Goremy, dona a vos teras asi, afin vos pote vive e adora Dio nosa Senior en libria. Me demanda sola du cosas de vos: ce vos resta fidosa a me e a mea casa e ce vos oblida vosa lingua e aprende la mea. Esce vos aseta?”
Tota la persones ci ia es ala (nove en soma: oto femes, la prete e sete xicos joven), ia ajena e aseta. “Bon, segue me a mea castel”, Týdysk ia dise. E el ia comensa gida los.
Pos ariva ala, los ia vide ce la castel ia es fada de lenio, e ce lo ia es multe peti. Ma Týdysk ia dona acua e vejetales a totas, e ia aida a los.
“De cuando un nobil aida a campanianes?” un de la jovenes ia demanda a la otras.
“En esta contia,” Týdysk ia dise, car el ia escuta la joven, “la conte no es un tirano per sclavi sua renadas, ma per manteni la fida en Dio e libra los de sclavia”.
A pos, el ia lasa a totas e ia vade parla con la prete: “Alo, senior…”
“Jancluat,”[¹] la prete ia dise.
“Bon, senior Jancluat”, me ia vole demanda a tu ce tu deveni la prete de nosa contia, car nos ave sola tu ci conose la Biblia, e me vide ce tu ia trae un con tu.”
“Si,” el ia dise, orgulosa. “Me no ia vole lasa lo ala car la Parola de Dio es nosa come vera.”
“Tota ci bevi la acua cual me dona a el va sidi nunca,” Týdysk ia dise.
“Joan 4:13-14,” la prete ia ajunta. “Tu conose la Scrivedas Santa.”
“Si, car on no ave un libro plu importante ca acel”, Týdysk ia responde.
“Amen,” la prete ia completi. “Me es onorada par es elejeda per servi a nosa comunia peti,” el ia ajunta.
“Bon,” Týdysk ia dise en cuando el ia regarda la campanianes. El ia vide ce un fem es solitar en un angulo e ce nun aida el.
“Ci es acel fem?” Týdysk ia demanda a la prete.
“On nomina el Nuafle[²], ma on sabe cuasi no cosa sur el. Orfan de sua nase, el es la plu povre entre la povres. Un fem ia atende el asta la eda de sete anios e, a pos, el ia mori. Sua casa, si on pote nomi lo tal, ia es un cabana peti, mal construida par el. Sempre susia, el servi an no per prostituida, car nun ia vole an paia per resta con el. Par causa de esta, el ia es violeda a multe veses. Si tu debe elimina algun, me ta sujesta el.”
Týdysk ia prosimi, e cuando el ia es a un paso de el, acel fem ia regarda Týdysk direta en la oculos e la conte ia senti alga cosa traversante sua dorso.
“Alo, mea senior,” la fem ia dise, ajenante se. “Grasias per salva nosa vives.”
Týdysk ia pote reata e ia dise: “Grasia sola a Dio, car lo es El ci ia salva vos.”
“Amen,” la fem ia dise.
Týdysk ia pote senti panica en la oculos de acel fem. El ia prosimi plu e el ia dise a ela: “No teme, car asi la valua de cadun coresponde con sua teme a Dio.”
Týdysk ia toca sua spala per proba calmi el e, en acel momento, un vose ia apare en sua mente disente:
“E entre los, en la fem la plu odiada, tu va trova un rea.”
Asustada, Týdysk ia abandona la sala.
[¹] De franses Jean Cloître. Cloître sinifia “claustro”, en refere a un parte de un monceria, car sua ocupa es relatada con la Eglesa Catolica.
[²] En franses Noir fleur, un jua de parolas, mocante la fem, en refere a Blanchefleur, la dama ci apare en la naras de cavaloria medieval.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 28 novembre 2024 (08:56 UTC).