Týdysk ia divide la contia en cuatro partes, tre viletas e la capital, do sua castel ia es locada. Cada vileta ia ave teras, cual el ia distribui entre la jovenes. Car los ia es sete femes e sete xicos joven, el ia promove rituos de sposi entre los e la prete Jancluat ia sposi los.
Nuafle ia resta sin es sposida, e el no ia reseta un casa.
“Tu pote resta con me en la castel,” Týdysk ia dise. De la momento en cual el ia regarda acel fem direta en la oios, el no ia pote oblida el.
“Me ia es nobil ante ariva a esta tera, me ia crea esta contia, como me va sposi el?” Týdysk ia demanda a se. Ma acel fem ia ave alga cosa, el ia ave alga cosa cual ia fa ce Týdysk no pote para pensa sur el. “Oblida lo, el an no es pur,” Týdysk ia pensa ante vade dormi.
En la note, Týdysk ia ave ancora la imaje de Nuafle en sua mente. E un vose ia dise a el: Hoxea 2:19. Týdysk ia abri sua oculos: el ia es sudante. El ia vade a la eglesa, en media de la note, corente, e ia velia la prete.
“Jancluat, me nesesa tua aida.”
“Dise a me, mea senior,” la prete ia dise.
“Prende la Biblia e dise a me cual es scriveda en Hoxea 2:19.”
Surprendeda par lo cual la conte ia es demandante, Jancluat ia prende la Biblia e ia abri la libro. Per xerca la strofe, sua fas ia cambia.
“Cual es diseda ala?” Týdysk ia demanda.
“Me va sposi tu en fida, e tu va conose la Senior.”
“Lo es un simbol,” Týdysk ia dise.
“Esce tu va sposi…” Jancluat ia comensa dise.
“Si,” Týdysk ia responde.
“Ma el ia es violeda e…” Jancluat ia ajunta.
“Ci es libre de peca, ta ce el lansa la petra prima,”[¹] Týdysk ia ajunta. E el ia revade a la castel.
A la dia seguente, la popla de Goremy no ia pote crede lo cual los vide: la conte ia es sposinte con acel fem, ci tota ia odia, e cual ia deveni la contesa de Goremy.
Cuando ambos ia sorti de la eglesa, Týdysk ia dise: “La petra cual la construores ia rejeta ia deveni la petra de angulo”[²].
E la tota popla ia ajena ante la contes de Goremy.
Tre anios a pos.
La castel de Goremy ia es cambiada a un otra plu grande, fada con la aida de la persones de la contia.
Aora, cuatro xicos ia jua en la coredores, la contes futur: Ejurysk, Týdarysk, Swntila e Amalaryk.
Nuafle ia manteni la castel purida en cuando Týdysk ia aida la popla a fini la construi de tre viletas en la vale: Abaurg, Saurg e Taurg[³]. La capital ia deveni nomida Ryki.
Týdysk ia construi mures ensircante cada vileta e cada ia ave un eglesa. La tota viletas ia es liada entre los e la capital, cual ia es situada en la sentro de la vale.
La contia ia developa ja un economia fundida sur la cultiveria e, an si los no ia es rica, los no ia nesesa otra cosas per vive.
Pas e calmia ia rena en Goremy, ci ia profita de sua natur e de la fato ce nun ia conose ce lo esiste. Ma acel va cambia en poca tempo.
[¹] Joan 8:7
[²] Marco 12:10
[³] La nom de la sites es formida con la letera prima de la nom de cada fio e la parol “baurg”, cual vole dise “site” en gotico. La capital es un eseta.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 11 agosto 2024 (12:40 UTC).