En la rena cual ia es locada a la ueste de Goremy, Frynkisia, la revoltores ia susede e la stato ia deveni un Republica, con un Consilio Suprema cual ia ave la potia asoluta.
Un om de la Consilio Suprema ia dise: “Esce vos recorda cual ia aveni con la popla de la viletas en la limita este? Los ia fuji a la bosce e nos no sabe plu de los.”
“Probable los ia mori,” un otra membro de la Consilio Suprema ia ajunta, “car acel bosce es multe spesa e multe animales ferose abita ala.”
“Me ia pensa”, la prima ia continua, “ce nos nesesa lenio per crea un bon marina car la rena visina, acel isola… Enekesia, ave la marina la plu bon marina de la mundo e, si nos vole estende nosa revolta e fini la monarcias, nos nesesa pote destrui sua marina.”
“Cual la sitadan André ia dise es vera,” un otra ia dise. “Enekesia ave la marina la plu bon de la mundo. Los ia comensa ance ataca la teras cual Frynkisia ave ultra la mar, e nos pote fa no cosa contra acel.”
“Bon,” la sitadan André ia dise, “ta ce nos comensa talia la arbores.”
Ses menses a pos.
Un de la cavalores de la armada de Goremy ia cavali rapida asta ariva a la castel.
“Me debe parla con la conte,” el ia dise, apena capas de respira. “Lo es multe urjente.”
La cavalor ia entra en la salon xef de la castel, do Týdysk ia senta con Nuafle.
“Senior,” la cavalor ia comensa parla pos regania alga aira. “Persones de Frynkisia es taliante la arbores de la bosce en la limita ueste de nosa contia. Si los continua tal, los va lasa Goremy sin sua proteje natural en un de sua du limitas.”
“Prende plu soldatos per vijila acel limita, nos debe vide como la situa evolui,” Týdysk ia responde.
La soldatos ci ia es ja enviada ia pote vide como la soldatos de Frynkisia avansa multe rapida tra la bosce.
“Pos du menses los va ariva a la vale,” la jeneral Tẃrik ia dise a Týdysk.
“Nos debe prepara la popla per la batalia, car los ia es la mesmas ci no ia ave problemes en asasina la cristianes ci ia vive en la limitas,” la conte ia dise. “Vade a la viletas e leje la documento seguente: Par comanda de la conte, cada om ci es en eda e condisiona fisical bon per luta debe vade a la Comanderia en la dia veninte.”
“Si, mea senior,” Tẃrik ia dise. E el ia abandona la salon xef de la castel.
La comandor xef de la armada de la Republica de Frynkisia ia ariva a la otra lado de la bosce. De sua situa, el ia pote vide la vale intera, con tre viletas e un castel en media de acel loca.
“Lo pare ce nos ia trova un pais nova,” el ia dise. “On debe prepara la soldatos per la combate, la revolui e la Republica de Frynkisia va estende se.”
“Lo es un bon idea,” la teninte ia responde.
“Envia un mesaje a la Consilio Suprema: los debe envia un letera a la rena de Ejustirisia, ta ce esta concista servi como un forma de ave pas con los. La rio cual flue en media de la vale va es la limita de nosa du teras.”
“Tal me va fa,” la teninte ia dise. E el ia comensa sua traversa tra la bosce.
La armada de Frynkisia ia campa en la bosce, per no es videda par la abitores de Goremy, ci no ia sabe cual va aveni a los pos alga semanas.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 28 novembre 2024 (08:56 UTC).