V

Me no sabe esce la causa es la avansa de la saison, ma la dias prende colores plu e plu grave, plu sombre, plu oscur. Como si on ta regarda la mundo tra un oculo oscur.

Esta vista de inca pal remente de la fondo de un acueria vasta. Arbores, umanas e casas fusa en siluetas oscur cual onda como plantas suacuan en esta abiso sombrida.

A sirca de la sanatorio, on ave un xama de canes negra. Con cualce forma e cualce grandia, colinte la solo, los vaga, a la lus final, tra vietas e ruetas, envolveda par sua manejas de canes, mudinte, consentrada e atendosa.

Los pasa en bandes de du o tre, con colo tensada, con oreas agu, con abaietas lamentin fluente de sua gargas cual indica un ajita estrema. Focada e fretante, sempre vagante, sempre tendente a un gol nonpersepable, los atende apena la paseantes. A alga veses, an tal, los rola sua oios a aceles, e core con esta regarda oblica, negra e intelijente do on persepi un furia sola constrinjeda par la manca de tempo. Lo aveni an ce los sede a sua vilia e ce los presipita sur vosa gamas, con testa basa, con un ronci de mal auguri, ma los para en media de via e los reveni corente con bondis grande.

On no pote vinse acel malia, ma perce donce la dirijores de la sanatorio garda un can-lupo enorme, un bestia fea cadenida, un tal monstro de savajia?

Me tremeta cuando me debe pasa a lado de sua casa de can, vidente el visina, nonmovente a la fini de sua cadena corta, con sua pelo longa erijeda como un colar, con sua mustax, sua pelo e sua barba, sua bocon forte plen de dentes longa. El abaia nunca, ma sua fas savaje deveni ancora plu temable cuando el vide un umana, sua aspeta de fas prende un espresa de furia nondisable e, levante pico sua bocon asustante, el xuta, convulsada, en un ulula basa e ardente veninte de la plu interna de sua odia e do la despera de la nonpotentia suapare.

Mea padre pasa con iniora a lado de esta bestia ferose cuando nos sorti juntada de la sanatorio. Consernante me, a cada ves me es turbada par acel mostra asustante de odia nonpotente. Me es plu grande, aora, par du longias de testa, ca mea padre ci, corta e magra, pasea a mea lado, con sua paso de trota senesente.

Tra cuando nos prosimi a la mercato, nos vide un move nonusual. Cuantiosa persones core tra la vias. Novas noncredable veni a nos, consernante la entra de un armada enemi a en la vila.

En la descoraji jeneral, la fola comunica informas alarmante e contradisente. Lo es poca comprendable. Un gera cual no ia es presededa par manejas diplomata? Un gera interompente un pas felis cual no profita ia turba? Un gera contra ci, e perce?

On esplica a nos ce esta invade enemi ia coraji asi la partito de la coleres ci ia desende en la via, con armas, e terori la sitadanes pasosa. En fato, nos persepi un bande de acel revoltores ci, vestida negra con bandas blanca crusada sur la peto, avansa silente, con la fusiles preparada per xuta. La fola retrosede ante los, densinte sur la troterias, en cuando los lansa, su sua xapos silindre alga regardas sombre e ironiosa, con senti de superioria, un flax de mal joia e un tipo de ginias implicada, como si los ta reteni un rion cual ta desmasci tota la engana. Algas es reconoseda par la fola, ma sua esclamas joiosa es canselada ante menasa de la canones cual punta. Los pasa sin nomi cualcun. Denova, la vias pleni con un fola ansiosa, mudinte e sombre. Un murmura nonclar traversa la vila febrosa. Lo pare ce on oia, a via, un tona de artileria e la rola de tambur.

« Me debe asoluta asede la boteca », mea padre, pal ma voluntosa, dise. « Tu no nesesa veni con me », el continua, « tu vade sola a ostaculi. Reveni plu a la sanatorio. »

La vose de la coardia fa ce me obedi. Me vide mea padre penetrante la fola densa, e me fali persepi plu.

Tra vietas, me lisca a la vila alta, notante ce esta via presipe va permete ce me sircoveni la sentro blocida par la asembla umana.

A supra, en esta parte de la vila, la fola es min cuantiosa e desapare final. Me avansa cuieta, tra vias vacua, a dirije de la parce munisipal. La palos de lampa arde con un flama oscur e bluin, como asfodelos macabre. A sirca de los, un nube de scarabes pesosa como baletas de fusil, cual vola oblica, con alas vibrante. Algas, cadeda a tera, tira torpe sur la arena sua dorso curva, caxa durida su cual los atenta replia la membranas delicata de sua alas estendeda. Tra la paserias e la sespes pasores pasea, envolveda en conversas frivol. La arbores ultima inclina se supra la patios de la casas plu a su, apoiada a la muron de la parce. Me pasea longo acel muron cual alti sola asta mea peto ma cual, a la otra lado, basi asta la patios inferior, a un nivel a su.

A un loca definida, un rampa de tera compata traversa la patios e junta la muron. Me pasa fasil un serca e, tra esta teraplen streta entre la blocos de construidas, me retrova en la via. Mea calculas, fundida sur un sensa coreta de orienta, evidenti esata; me sta cuasi visina a la sanatorio, de cual la parte retro apare, en sua blanca neblosa, ante un fondo de arbores oscur. Me entra, como usual, par la patio retro, traversa la serca metal par la porton e persepi a via la can, a sua posto. Como sempre, me tremeta con repulsa a acel vide. Me vole pasa ultra la can a la plu pronto afin me no oia plu sua ronci odiosa fluente de sua profondas, cuando, terorida e credente apena mea oios, me vide ce el xuta de sua casa de can e core a me per para me, abaiante un abaia basa como estraeda de un tomba.

Stonada, me retrosede a la angulo la plu distante de la patio e, xercante instintosa un refuja, me proteje me su un pergola peti, consensa, en pasa, de la futilia de mea atenta. La bestia pelosa prosimi en un bondi, sua bocon apare a la entra de la pergola; me es trapida. Plu mor ca vivente, me nota ce el ia estende tota sua cadena, cual el ia tira pos el, e ce, tal, la pergola es nonatenable par sua dentes. Sentinte mal, cargada con teror, lo difisili ce me senti alga lejeri. Bambolante e a punto de desmaia, me atenta regarda el. Nunca me ia vide el tan prosima, e alora mea oios clari, como descamida. Tan potiosa es la desfida, la sujesta de la asusta! U la falasia! El es un umana! Un umana cadenida ci, en un aprosima tro simple, me ia confusa, me no sabe como, con un can.

Ta ce on comprende me bon. El ia es un can, sin duta, ma con un forma umana. Lo cual constitui la natur canin es un dato interna cual, esterna, pote vesti con o un covre umana o un covre animal. El ci sta ante me a la comensa de la pergola, descovrente sua dentes en un ronci asustante, es un om con un grandia media, multe brun. En sua fas jala e ososa, oios negra, dur e misera. Considerante sua veste sombre, sua barba bon taliada, on ta pote vide el como un inteletosa, un siensiste: un fraton de la dotor Gotard ci ia ta evolui mal. Ma acel aspeta prima es falasiosa, de pronto denunsiada par la manos ru manxada par cola, par du plietas bruta, a cada lado de la nas, ascondente en la barba, par indentes orizonal e alga vulgar sur la fronte basa. Lo ia es plu un religor, un crior, un retoriciste e ativiste violente, plenida con pasiones esplodente. E esata ala, en esta morde de pasiones, en esta erije convulsante, en esta furia demente abaiante coleriosa contra la punto de la basto, ala el es un can a sento persentos.

Si me ta salta supra la serca de fondo, me dise a me, me ta es tota nonatenable e me ta pote reveni par un paseria peti a la entra de la sanatorio. Me ia es en curso de pasa la gama sur la balustre, ma me para subita, sentinte ce lo ta es tro noncompatiosa ce me parti tal e abandona el con sua coleria sin limita. Me imajina sua delude grande, sua dole cruel, si el ta vide ce me sorti de la trapa e ce me vade a via per sempre. Me resta ala. Me prosimi a el e declara con un vose cuieta, natural: « Calmi, me vade a descadeni tu. »

Pos acel parolas, sua fas convulsada con saltetas, vibrante con roncis, destensa e desintensi, e un fas cuasi umana emerji. Me vade a el sin teme e deslia sua colar. Nos pasea aora, a lado de lunlotra. Le religor porta un completa negra conveninte, ma es con pedes nuda. Me atenta comensa un conversa: de sua boca on oia sola un farfulia noncomprendable. Ma en sua oios negra, bonparlante, me leje un amosia zelosa cual trae de me cualce teme. El tropeza a alga veses contra un calculo o un protende de tera: afetada par la colide, sua fas desfa se, descomposa, mostrante un asusta preparada per bondi, e, pos acel, la furia, un furia cual a cada instante pote refa de esta fas un noda de viperas. Alora me remente el par un averti sever, como un camerada. Me an colpeta sua dorso. E on vide a alga veses comensa apare sur sua fas un surie surprendeda, suspetosa, desfidante el mesma. O! cuanto esta amia grave es pesosa! Cuanto esta simpatia spesial asusta! Como desprende esta esente ci pasea a mea lado e coli sua regarda a mea fas, en la arde de sua alma de can? An tal, me no ta vole delude mea nonpasientia. Me estrae mea portamone e declara con un tono neutra:

« Tu nesesa mone, sin duta; me volente va presta alga a tu. »

Ma, vidente esta, el prende un aspeta tan savaje ce me repone mea portamone la plu pronto. Tra un momento longa, denova, el pote no calmi o mestri sua aspeta de fas cual un ulula convulsa. No, me no pote suporta esta plu longa. Ta ce on ave cualce cosa, plu ca esta. En cualce caso, la cosas ia es tan maraniada ce on ave no plu evade. La lus de un ensende leva supra la vila. Mea padre en media de la revolui, en sua boteca ardente, la dotor Gotard nonatenable, e plu la apare furtiva nonimajinable de mea madre, encargada con un mision misteriosa… Tota esta es la elementos de un trama vasta noncomprendable nodada sirca mea person. Fuji, fuji de asi! A cualce parte. Rejeta esta amia orible, esta religor ci apesta como can e ci fisa me sin sesa con oios. Nos ia ariva ante la entra de la sanatorio.

« Esce tu vole contenti me par veni a mea sala? » me dise con un jesti cortes.

La conduis de sivilia fasina el e adormi sua savajia. Me entra el prima en mea sala e senta el sur un seja.

« Me vade a xerca coniac a la restorante », me dise.

El leva con un bondi, temosa, per acompania me. Me cuieti el dulse e firma.

« Tu vade a resta sentante e espeta cuieta », me dise con un vose profonda e vibrante do, en la fondo, un teme secreta reposa.

El senta denova con un surie nonserta. Me sorti e avansa lenta en la coredor, en segue en la coredor a su, me traversa la entra, me traversa la patio, me clui apos me la peti porte metal e me comensa core asta sofleta, con mea cor batente, con mea tempes ardente, core en la vieta oscur cual vade a la stasion.

En mea testa imajes freta, imajes asustante, algas plu ca otras. La noncuieti de la monstro, sua stona temosa, sua despera cuando el va comprende ce me ia engana el. La regania de sua furia, sua esplode de coleria nonrepresable. La reveni, a la sanatorio, de mea padre ci bateta la porte sin cauti, e encontra subita la bestia ferose…

Lo es fortunosa ce mea padre no es plu vera vivente », me dise a me con lejeri, « e ce tota esta no pote plu vera ateni el.

Me persepi justa ante me un filo oscur de vagones preparada per parti. Me asende en un de los, e la tren, como si lo espeta sola esta, inisia dulse, sin sona de sibileta.

Tra la fenetra on vide denova la platon de la orizon, liscante lenta, plenida de forestas sombre e sonante en media de cual la sanatorio silueta blanca. Adio, Padre! Adio, vila cual me no va vide plu!

De alora, me rola, me ia eleje mea casa, en cualce modo, sur la ferovia, do on tolera me, e do me vaga, de vagon a vagon. La vagones, grande como salas, es plen con palia e detritos. Corentes de aira traversa la tren, de lado a lado, tra dias sin color.

Mea veste laserada cade a ruina. On ia dona a me un uniforma gastada de ferovior. Mea fas es envolveda con un teleta, par causa de un jena inflada. Me es sentante en la palia e me sonia, e, cuando me fami, me vade en la coredor, ante la compartes de clase du, e me canta. Alora on jeta monetas en mea xapeta negra de ferovior de cual la visiera dejunta.