III

Tal on vive en esta vila e tal la tempo pasa. La parte major de la dia es usada per dormi, e no sola en un leto. Nun oposa en esta punto. A cada loca e a cada momento on es sempre pronto per ofre a se un dormi peti, con la testa apoiada, a la table de restorante o en taxi-caro, o an stante, en la atrio de cualce casa do on ia entra a un momento per sede ante un nonrepresable nesesa de dormi.

A la velia, ancora turbada e bambolante, nos reprende la conversa interompeda, nos continua nosa via laborosa, o nos continua un punto confusada, sin comensa, sin fini. En acel modo, en via, larga intervales de tempo desapare, on no sabe do: nos perde nosa controla sur la continua de la dia e sesa final ce nos es liada a acel, nos lasa sin regrete la sceleto de un cronolojia noninterompeda cual la costum e la disiplina sever de cada dia ia abitua nos a vijila con atende. Ja de longa nos ia sede ante esta zelo constante cual fa ce nos persepi la flue de la tempo e esta mania perfetiste de conta tota la oras spendeda cual es la aspira e la orgulo de nosa economia. Acel virtuas xef, de cual nunca on ia esita o manca, nos ia renunsia de longa.

Alga esemplos pote representa acel situa. A cualce momento de la dia o de la note — debil sutiles en la color de la sielo permete apena ce on vide la difere — me velia a lado de la balustres de la ponte peti cual vade a la sanatorio. Lo aveni a la lus final de la dia. Me ia debe, inondada par la dormi, vaga tra longa sin an ce me persepi la vila, ante ce me coxea asta asi, estrema fatigada. Me no pote dise esce me es acompaniada, tra tota esta pasea, par la dotor Gotard, ci aora es a lado de me e espresa la concluis ultima de un razona longa. Traeda par sua mestria de parla, el an saisi mea braso e gida me. Me segue el e, an ante ce me pasa la paseria de plances sonante, me dormi denova. Tra mea palpebras cluida, me vide neblosa la jesti de convinse de la dotor suriente en sua barba negra, e me atenta sin susede comprende la argumenta xef, la trumfo desidente cual lauri sua demostra e do el vinse pausante, con la manos estendeda. Me no sabe tra cuanto tempo nos pasea ancora juntada, envolveda en un parla plen de malcomprendes, cuando, subita, me reprende tota mea consensia: la dotor Gotard ia desapare e lo es oscur, ma sola car mea oios es cluida. Me abri los, e me retrova me en la leto, en mea sala, do me ia entra par un modo nonconoseda.

Un esemplo ancora plu neta. A la momento de la come, me entra en un restorante en vila, plen de desordina e de ruidos de voses confusada. E ci me persepi en media de la sala, a un table cual plia su la carga de la comedas? Mea padre. Tota la regardas es dirijeda a el ci, briliante, spesial animada, encantada, inclina a tota partes con vantosia, conversante parlosa con tota la presentes. Con un zelo artifis, cual me no pote considera sin angusa, el no sesa comanda platos nova cual cumula sur la table. Lo plase a el ce el asembla los tal sirca el, an si el no ia pote fini la plato prima. Clacente sua lingua, masticante e parlante simultan, el ostenta par sui jestis, par tota sua mima, la contentia la plu forte de esta banceta e el segue con un oio fasinada Adam, la servor, a ci, con un surie emosiada, el lansa sin para comandas nova. E cuando la servor core per transmete los, ajitante sua teleta, mea padre clama con un jesti de suplica afin totas atesta la amablia nonrefutable de esta Ganimede.

« El es ultra valua! » el esclama, giniante con un surie de estasia. « Un anjel! Confesa, seniores, ce el es un encanta! »

Me retrovade, plen de repulsa, sin ce el nota me.

El no ia ta pote condui en un modo plu provocante e ostentosa si el ia ta es empleada ala par la dirije de la otel como publiciste. La testa oscurida par la dormi, me bambola en la ruas, atentante reveni. Me pausa a un caxa de posta, apoia mea testa sur lo e dormeta. Final, me trova, palpante sieca en la oscur, la asede de la sanatorio do me entra. Mea sala es nonluminada. Me comuta la boton, ma la eletrica no funsiona. Un core de aira fria sofla de la fenetra. La leto grinse en la oscur. Mea padre leva la testa e dise:

« O, Jozef! Jozef! Tra du dias me reclina asi sin cualce cura; la campanetas es descomutada, nun veni per visita me; e mea propre fio abandona me – me ci es grave malada –, per vaga a la vila con xicas. Sensa cuanto mea cor bate. »

Como ajusta ambos cosas? Esce mea padre senta en la restorante, sedente ante un glotonia nonsana, o reclinante en sua sala, do un maladia grave restrinje el? O esce on ave du padres? Lo no es la caso. La causa de tota es esta dexarnieri rapida de la tempo, cual no es plu sever controlada.

Tota de nos sabe ce esta elemento rebelosa es mantenida plu o min en la bon dirije sola par atendes continuante, par un zelo compatiosa, par un reti vijilante de sua devias. Sin acel garda, lo mostra se pronto propensada a contravenis, a nonormales strana, a farsas nonprevidable, a bufonias desformida. Me senti plu e plu neta la nonacorda de nosa tempos individua. La tempo de mea padre e mea tempo no coresponde plu.

En pasa, la reproxa de malcondui cual mea padre ia adirije a me, lo es un insinua sin funda. Me no ia prosimi ja a cualce xica asi. Bambolante como enebriada, de un dormi a un dormi, me atende apena persones de la seso bela en mea momentos de vijila.

Plu, la penombra constante de la vias no permete an distingui neta la fases. Me ia pote nota sola, como un om joven ci, an tal, es alga interesada en esta punto, ce la modo de pasea de acel femes joven es spesial.

Lo es nonvariable retilinial, iniorante cualce ostaculo, e obedi sola un ritmo interna definida, un lege definida cual los desenrola tra sua peti trota en linia reta, con uniformia e refina dominada.

Cada de esta femes porta con se sua propre regula, tensada como un mola.

Cuando los vade tal, reta, seria, consentrada, los pare preocupada par un sola punto, cual es ce los no perde alga parte de acel regula sever e ce los no devia de lo, an a un milimetre. On vide clar, alora, ce esta cosa cual los porta con un tal atende consentrada no es otra cosa ca alga osese de sua propre perfetia, cual sua fida forte reali cuasi. Los previde esta, asetante esta risca, sin alga serti, como un dogma nonviolable, nonafetable par cualce duta.

Cuanto falis, cuanto mancas, cuanto nases torseda o platida, cuanto pustulas e manxas los desculpa tan orgulosa su la masca de acel imajina! On no ave cualce cosas fea o vulgar cual la impulsa de acel fida no pote trae a un perfetia imajinal.

Par causa de un tal fida, sua corpos beli en un modo evidente, e la gamas, con bon forma e curva – con la pede moldida en sapatos sin fali –, esplica, en la monologa fluente e sintilinte de sua modo de pasea, la ideal rica cual la fas nonespresosa mudi orgulosa. Los reteni sua manos en la poxes de sua jacas corta e streta. A la caferia, a la teatro, los crusa sua gamas, cual descovre se asta la jenos e cual, silente, parla tan. Acel es, en pasa, un cosa entre la cosas spesial de la vila. Me ia parla ja de la plantas sombre. On pote nota un tipo de filis negra, con buces enorme, poneda en boteletas, cual orna asi cada aparte e cada loca publica. Lo es cuasi un simbol de dol, la simbol funeral de la vila.