ALO, JONATAN!
1 · 2 · 3 · 4 · 5

Capitol 4

Traduida par MikeM

Do es Jonatan? Esce el sta en Vienna? No, el sta en un site diferente. El sta en Bistritz. Cual es Bistritz? Lo es un site en Romania. Aora comensa la viaja en Romania.

Jonatan scrive en sua jornal: “La prima de maio me ia es en Munich. La du de maio me ia es en Vienna. Pos me ia es en Budapest. Budapest ia es bela. Ma me no ave tempo en Budapest. Me ia vide la strada en Budapest. En Budapest me ia pensa: asi fini la ueste, e asi comensa la este. Budapest es diferente.”

El pensa un poca plu sur Budapest. El pensa: “Me es un person ci veni de England, de London. Me parla engles, car la persones en England parla engles. Ma en Budapest me no ia parla con la persones en engles; Me ia parla en deutx. Mea deutx no es bon, ma la persones en Budapest no parla engles. Nos ia parla en deutx. Lo es interesante ce la persones en Budapest parla deutx.

Aora Jonatan pensa sur sua viaja. El pensa: “Me ia es en la museo en London. En la museo ia es libros sur un otra pais. Me ia leje la libros. En la museo ia es mapas sur un otra pais. Me ia vide la mapas. La libros e la mapas ia dise ce la otra pais es distante, ma interesante. En la otra pais es multe persones, multe persones diferente.”

Aora Jonatan pensa plu sur sua viaja. El pensa: “Ier me ia es en Klausenburg. Me ia come en Klausenburg. La nom de la comeda ia es “paprika hendl”. Lo es vera bon, la comeda en Klausenburg. La otel ia es bon, ma me no ia dormi bon. Ma la pais es vera bela! En la tren me ia vide multe vilas e multe casteles. Un site es plu grande ca un vila, ma la vilas es vera bela. Un castel es plu grande ca un otel, e plu bela ca un otel! Vilas es min grande ca sites, ma los es bela, e oteles es min grande ca casteles.”

Jonatan scrive plu en sua jornal: “Bistritz es un loca interesante. Bistritz es un loca vea, plu vea ca otra locas. Ance mea otel en Bistritz es vea, plu vea ca otra oteles. En la otel me ia dise mea nom: ‘Me es Jonatan Harker’ e los ia dise a me: ‘Bonveni al otel.’ En la otel me ia vide un letera per me. Aora me va leje mea letera.” Jonatan leje sua letera. Lo ia dise:

“Mea ami. - Bonveni. Dormi bon. Me es en Bukovina, per favore veni a Bukovina. Esce la viaja de London ia es bon? Mea pais es vera bela. Bonveni a mea pais.

Vosa ami, DRACULA.”

Jonatan leje la letera e pensa sur sua ami Conte Dracula. Ci es el? El no sabe. Ma sua ami es interesante. Ance la vila Bistritz es interesante. Jonatan es felis, e pensa sur sua ami. A pos, el dormi.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 18 maio 2024 (17:55 UTC).