Kim

Me es Kim Kaiser, programor jubilada, e me abita en Wisconsin, SUA. Me es un comensor con elefen. Me ia studia xef esperanto (me pote leje cisa a grado media), e me ia studia/leje min ido, glosa, e otras. Mea lingua prima es engles. A multe tempo a ante, me ia studia latina e franses. Me ia gusta sempre la studia de linguas!

Me ensenia elefen a mea sposa e mea sore. Nos diverti en cuando nos aprende. 🙂

Me joia ancora scrive programes. Me gusta ance la naviga par vela sur barcos peti.

Elefen ta pote es la lingua la plu bon a me. Me gusta la simplia de linguas isolinte.

Coretis es grasiada!

Mea paje ‘kim’, de 2025, en la arciveria

Me ave du proposas a su.

• Problemes con “bon” e “mal”
• Problemes con “bela”, “fea”, etc.
• discuteda en: bela, fea - Foro

(la otra tema de foro, bon e mal - Foro, es cuasi vacua)

Problemes con “bon” e “mal” (proposa completa)

Alo amis!

Tra un tempo longo, me es alga turbada par la du esetas en la gramatica sur la paje Ajetivos. Me ta vole descrive la problemes cual resulta de los, e proposa un cambia a la gramatica. Me fa esta per me mesma, e ance per la multe comensores ci esiste aora e en la futur.

An si la du esetas es relatada, on pote vera analise nondependente los. La eseta prima es discuteda asi, e la numero du es en un posta separada a Problemes con “bela”, “fea”, etc. (Foro).

E ance, pardona me per la longia de esta proposa. Me ia pensa multe sur esta tema, e me debe presenta un analise detaliosa per esplica bon la razona per mea proposa. Car lo es longa, me ia pone lo a mea paje de usor, intendente ce la paje de foro va teni tota discute.

Proposa: direta a su
Respondes: Problemes con “bon” e “mal” (Foro)

Asi es la eseta prima:

La plu ajetivos segue la nom cual los descrive. Ma bon e mal presede normal la nom, estra cuando los mesma ave descrives.

Problemes

Aora, ta ce nos esamina la problemes cual es causada par esta eseta. Nota ce en la discute seguente, me foca a veses sur bon, per simplia, ma la argumentas aplica egal a mal.

Problem [A.P1]. Nos ave un categoria nova de ajetivos per aprende - lo cual ave la cualia de prenomal si 1 ajetivo. Poi, la parolas bon e mal debe es memorida como la du ajetivos spesial cual ave esta cualia. Ave listas de parolas de eseta cual debe es memorida no es un cualia ideal per un lingua cui goles inclui simplia e coere.

Problem [A.P2]. Un studiante cui lingua prima es engles, putonghua, deutx, rusce, o otra linguas major, ia abitua a ajetivos cual apare ante nomes. E tal, en cuando el aprende elefen, el debe labora a instrui sua neurones en la serebro sur leje/oia e scrive/parla ajetivos pos nomes. Como el deveni plu e plu abituante a ajetivos elefen, la ruetas neuronal cambia de paserias a stradas e alora autovias. La eseta de bon e mal lansa un ostaculo en acel instrui. Esetas no veni sin custa.

Problem [A.P3]. On debe recorda ce si bon mesma ave descrives, on no debe pone lo ante la nom, pe. un nara multe bon, la libro plu bon. Esta es un otra regula per aprende, un otra cosa per memori.

Problem [A.P4]. Jeneral, studiantes (e bien tota elefenistes) instrui sua neurones a vide “un ajetivo” como un ajetivo usada como un nom. Ma per “un bon”, (1) on debe teni plur posibles en mente, sabe ce la parolas seguente va determina como on comprende bon - como un ajetivo, o como un ajetivo usada como un nom. Alternativa, (2) on pote comprende inisial bon como un ajetivo e poi si on leje/oia seguente un verbo, on debe resegue mental sua pasos e reinterprete bon como un ajetivo usada como un nom. Ambos taticas es cargosa. Per esemplo, tu oia un bon…

• un bon - cual rol bon ata? tu debe espeta plu parolas
• un bon gato - a, solveda, bon es un ajetivo
• un bon nara - tu debe espeta plu parolas
• un bon nara la - a, solveda, bon es un ajetivo usada como un nom, e nara es un verbo
• un bon nara es - a, solveda, bon es un ajetivo, e nara es un verbo usada como un nom

Donce cuando on oia un bon, on debe teni tota esta posibles en mente asta cuando esta es solveda par la parolas cual segue. O, dedica a un e es preparada per resegue sua pasos e reinterprete lo como la alternativa.

A la otra lado:

• un comica - instante solveda, comica es un ajetivo usada par un nom
• un gato comica - instante solveda, comica es un ajetivo
• un comica nara - instante solveda, (comica es un ajetivo usada par un nom e) nara es un verbo
• un nara comica - instante solveda, nara es un verbo usada como un nom e comica es un ajetivo

On no ave la teni de plur sinifias en mente asta cuando plu parolas veni.

Problem [A.P5]. “Jua bon flautas es fasil” es ambigua. – Harri Savolainen.¹

bon ta pote es un averbo cual descrive jua. O lo ta pote es un ajetivo cual descrive flautas.

• Responde [A.P5.1]. per desambigui, on ajunta mera “la”, o ante o pos “bon”. O on usa un otra strutur: “la bon jua de flautas es fasil”, “la jua de bon flautas es fasil”. – Simon²

• Contrapunto [A.P5.1.1]. Aora cuando on scrive/parla esta spesie de frase, on debe es curante per fa diferente lo con bon ca con otra ajetivos. E on debe aprende la strutures alternativa. Plu cosas ce la studiante debe memori, cual es nonesesada per tota otra ajetivos.

• Contrapunto [A.P5.1.2]. An con la sujestas, un lejor/escutor ta pote ancora encontra frases como “Jua bon flautas es fasil.”, car la creor ia es nonconsensa de la trapa o la reparas sujestada.

Problem [A.P6]. La regula en la gramatica descoraji un person per usa bon e mal pos un nom, cuando on ave no ajetivo du (longo la parola “normal” en la regula). Esta vade contra la instrui de neurones, discuteda a supra en [A.P2].

Problem [A.P7]. A veses, on ave usas posnomal e noncoreta de bon en Obras, ambos casos de ajetivo unuple (un capasia bon; un cor bon; un loca bon; un viaja bon; un cosa bon; un ata bon; un model bon; un vive bon; con cosas bon; …), e casos de ajetivo duple (un vive bon e seria; un idea bon e serta; un xico bon e saja; un forma bon e lojical;…). Evidente, autores oblida la regula o es nonconsensa de lo, o serta, la obra presede la regula.

Solve proposada

Considerante tota la problemes a supra, me proposa respetosa ce nos cambia la gramatica per elimina esta eseta, afin bon e mal debe segue sempre sua nom, como tota otra ajetivos.³

Con esta solve, tota la problemes diseda a supra desapare.

Oposas espetada a la proposa

Oposa [A.O1]. bon e mal es usada tan frecuente ce la eleje de pone los ante la nom permete la ajunta de otra ajetivos pos la nom sin crea un segue de ajetivos. – Jorj⁴

• Contrapunto [A.O1.1]. Despacinte esta, on pote vide esta como du declaras: lo dise ce bon e mal debe es prenomal si 2 ajetivos esiste. Esta cualia es compartida con bela, fea, nova, vea, grande, e peti. Lo es discuteda en la otra posta.

• Alora la argumenta pare dise ce, car bon e mal es prenomal si 2, los debe es ance prenomal si 1 (cuando on ave un sola ajetivo). A me, la datos no apare justi esta. Me ia xerca bon en Obras e alora ia conta cuanto avenis de “bon nom” (1 ajetivo) e “bon nom ajetivo” (2 ajetivos). La contas:
  • bon nom - 84 avenis
  • bon nom ajetivo - 6 avenis
• Alora sirca 93% ia es avenis de un (1) ajetivo. Tal, an si bon e mal es bien frecuente usada, los es nonfrecuente usada con un ajetivo du. A me, esta frecuentia peti no justi ce nos declara ce los es sempre prenomal si 1, considerante ce lo resulta la problemes (a supra).⁵

Oposa [A.O2]. Un fator forte contribuinte es ce bon e mal es usada ance como prefisas en parolas comun como bondise, bonodori, bonveni, bonumorosa, bonvolente, malcomprende, malfamosa, malformida, malfunsiona, malsolitar, maltape. – Simon⁶

• Contrapunto [A.O2.1]. media es un ajetivo e es ance un prefisa (mediadia, mediaestate, mediainverno, mediajua, medianote, mediaperiodo, mediapunto, mediasemana, mediasoprano, …). Ancora, on no pone lo ante la nom cuando lo es usada como un ajetivo (verifiada en Obras). [Nota ce no otra prefisas es ance ajetivos.]

• Contrapunto [A.O2.2]. An si la fato ce bon/mal es un prefisa es usada asi per argumenta ce bon/mal debe es poneda ante sua nom, esta razona no es aplicada a bon/mal ante sua verbo (donce nos ave on dise bon; on odori bon; …). Cisa la studiante ta nesesa scrive dise bon. La studiante consiensosa sabe la razona pos la regula de ante la nom, e donce el ta pote demanda asetable a se si la razona aplica a bon con verbos. Tal, nos ave la regula implicada: “An si bon/mal es poneda ante sua nom, no pone bon/mal ante sua verbo.” La regula implicada de verbo es un otra regula la studiante debe memori.

Oposa [A.O3]. Algas ta pote dise ce nos pone bon e mal ante la nom car la Ecipo fa tal. En la Ecipo, on pone normal la ajetivo pos la nom, ma lo presede bien en alga casos: si lo es corta e usada frecuente; per causa un cambia en sinifia o sutil; per causa lo es emosial.

• Contrapunto [A.O3.1]. Como vos sabe, multe cosas es fada en la Ecipo ma no es fada en elefen, pe., la usa de infletas: per verbos (person, numero, tempo, moda), nomes (jenero), ajetivos (acorda en jenero e numero con nomes), e pronomes personal (caso gramatical). E serta on ave multe otra casos. Elefen no segue sempre la Ecipo.

Oposa [A.O4]. Algas ta pote dise ce espresas como Bon Dia!, Bon Matina!, Bon Sera!, etc. segue la mesma espresas en la Ecipo. E car nos vole ce esta espresas es en la ordina usada par la Ecipo, bon debe presede tota nomes, e mal ance, car los es acompaniores.

• Contrapunto [A.O4.1]. La salutas ta pote es definida coma esetas, en loca de tota usas de bon e mal.

• Contrapunto [A.O4.2]. O, la salutas ta pote es juntada en un parola, como frBonjour! e itBuonasera!.

• Contrapunto [A.O4.3]. Denova, elefen no segue la Ecipo en tota cosas. Nos ta pote revisa esta espresas a Dia Bon!, Matina Bon!, etc. Me duta ce esta ta es popular. Multe linguas cual ave ajetivos dominante posnomal usa bon prenomal en salutas. An tal, me ia trova estas en Obras: Jupiter santa!, Dios santa!, Sielo santa!. Alora cisa esta elejable ta es asetable.

Oposa [A.O5]. La adota de la proposa ta causa ce multe avenis de bon e mal en Obras ta nesesa es reparada.

• Contrapunto [A.O5.1]. La nesesa per labora en Obras no ia es un ostaculo cuando la comunia ia introdui otra cambias de colpa grande. En mea copia de La aventuras de Alisia en la pais de mervelias, capitoles 1-3, me ia trova:
  • cambia me/tu/se/nos/vos a la determinantes posesal mea/tua/sua/nosa/vosa: 93 avenis
  • introdui lo como la sujeto pupetin: 20 avenis
  • introdui on con ave: 16 avenis

• Aora, contrasta la contas a supra con la colpa de elimina la eseta per bon e mal (la mesma capitoles):
  • move bon e mal a posnomal: 8 avenis

• Lo es un colpa grande min.

• Contrapunto [A.O5.2]. Ance, me ta es felis per aida con cambias en Obras (ma no do lo es per stilo en poesias o naras, o en la foro).

Conclui

Me sabe ce me adirije espertas en la lingua e esta cualia spesial ta pote es un parte amada de elefen. Ma me presenta esta proposa de la punta de vista de studiantes en tota locas, aora e en la futur. La cargas es plu profonda sentida par los. E me sabe ce comensores pote abitua a los. Ma como un ensenior saja ia dise a me a un ves, “Pote no es egal a debe”.

Cuando on deveni un media o esperta, me debe confesa ce la eseta es no plu un cosa grande. An tal, an per medias e espertas, on ave ancora un carga de memoria como la neurones prosede la frases listada a supra: no sola cuando atentante leje rapida, ma ance cuando escutante a un parlor.

Esta conserna ia es elevada a ante par harri_s, dave5dave5dave, e Kevin Smith. Cisa aora es la tempo per la adota de esta proposa.

Concluinte, me demanda respetosa a vos per considera esta proposa, per trae nosa lingua un paso plu prosima a sua goles de simplia e coere. Per favore, responde con vosa pensas, oposas, e acordas. Nota ce me ia inserta eticetas como [A.O1.1] a alga paragrafes, per fasili vosa referes a los.

Denova, per favore responde a Problemes con “bon” e “mal” (Foro).

Grasias per spende vosa tempo per leje e pensa sur esta!

Kim

Problemes con “bela”, “fea”, etc. (proposa completa)

Alo amis!

Como declarada en mea posta la plu resente a Problemes con “bon” e “mal” (Foro), me es alga turbada tra un tempo longo par la du esetas en la gramatica sur la paje Ajetivos. Me ta vole descrive la problemes cual resulta de los, e proposa cambias a la gramatica. Me fa esta per me mesma, e ance per la multe comensores ci esiste aora e en la futur.

An si la du esetas es relatada, on pote vera analise nondependente los. La eseta du es discuteda asi, e la prima es en un posta separada, a la lia a supra.

E ance, pardona me per la longia de esta proposa. Me ia pensa multe sur esta tema, e me debe presenta un analise detaliosa per esplica bon la razona per mea proposa. Car lo es longa, me ia pone lo a mea paje de usor, intendente ce la paje de foro va teni tota discute.

Proposa: direta a su
Respondes: Problemes con “bela”, “fea”, etc. (Foro)

Asi es la eseta du:

En alga casos, on pote pone un ajetivo ante la nom: … cuando on ave du ajetivos con pesas simil. … La ajetivos la plu conveninte per esta usa es la plu simples e cortas, como bela, fea, nova, vea, grande, e peti.

Nota ce bon e mal es ance implicada en esta lista.

Problemes

Aora, ta ce nos esamina la problemes cual es causada par esta eseta. Nota ce en la discute seguente, me foca a veses sur bela, per simplia, ma la argumentas aplica egal a fea, nova, vea, grande e peti, como ance bon e mal.

La plu de problemes listada en la posta prima, Problemes con “bon” e “mal”, aplica a alga grado a bela, fea, etc. Me ia marca la diferes en jala.

Problem [B.P1]. Nos ave un categoria nova de ajetivos per aprende - lo cual ave la cualia de prenomal si 2 ajetivos. Poi, la parolas bela, fea, nova, vea, grande e peti debe es memorida como la ajetivos spesial cual ave esta cualia. Ave listas de parolas de eseta cual debe es memorida no es un cualia ideal per un lingua cui goles inclui simplia e coere.

Problem [B.P2]. Un studiante cui lingua prima es engles, putonghua, deutx, rusce, o otra linguas major, ia abitua a ajetivos cual apare ante nomes. E tal, en cuando el aprende elefen, el debe labora a instrui sua neurones en la serebro sur leje/oia e scrive/parla ajetivos pos nomes. Como el deveni plu e plu abituada a ajetivos elefen, la ruetas neuronal cambia de paserias a stradas e alora autovias. La eseta de bela/fea/etc lansa un ostaculo en acel instrui. Esetas no veni sin custa.

Problem [B.P3]. On debe recorda ce si bela/fea/etc mesma ave descrives, on no debe pone lo ante la nom, pe. un nara multe bela e vera, la libro plu bela e plu comica.⁷ Esta es un otra regula per aprende, un otra cosa per memori.

Problem [B.P4]. Jeneral, studiantes (e bien tota elefenistes) instrui sua neurones a vide “un ajetivo” como un ajetivo usada como un nom. Ma per “un bela”, (1) on debe teni plur posibles en mente, sabe ce la parolas seguente va determina como on comprende bela - como un ajetivo, o como un ajetivo usada como un nom. Alternativa, (2) on pote comprende inisial bela como un ajetivo e poi si on leje/oia seguente un verbo, on debe resegue mental sua pasos e reinterprete bela como un ajetivo usada como un nom. Ambos taticas es cargosa. Per esemplo, tu oia un bela…

• un bela - cual rol bela ata? tu debe espeta plu parolas
• un bela gato - a, solveda, bela es un ajetivo e un ajetivo du es espeta
• un bela nara - tu debe espeta plu parolas
• un bela nara la - a, solveda, bela es un ajetivo usada como un nom, e nara es un verbo
• un bela nara comica - a, solveda, bela es un ajetivo prenomal usada con un ajetivo du, e nara es un verbo usada como un nom

Donce cuando on oia un bela, on debe teni tota esta posibles en mente asta cuando esta es solveda par la parolas cual segue. O, dedica a un e es preparada per resegue sua pasos e reinterprete lo como la alternativa.

A la otra lado:

• un comica - instante solveda, comica es un ajetivo usada par un nom
• un gato comica - instante solveda, comica es un ajetivo. (E “e ajetivo” pote segue.)
• un comica nara - instante solveda, (comica es un ajetivo usada par un nom e) nara es un verbo
• un nara comica - instante solveda, nara es un verbo usada como un nom e comica es un ajetivo. (E “e ajetivo” pote segue.)

On no ave la teni de plur sinifias en mente asta cuando plu parolas veni.

Problem [B.P5]. “Jua bela flautas vea es fasil” es ambigua.⁸ bela ta pote es un averbo cual descrive jua. O lo ta pote es un ajetivo cual descrive flautas con vea.

• Responde [B.P5.1]. per desambigui, on ajunta mera “la”, o ante o pos “bela”. O on usa un otra strutur: “la bela jua de flautas vea es fasil”, “la jua de bela flautas vea es fasil”.⁹

• Contrapunto [B.P5.1.1]. Aora cuando on scrive/parla esta spesie de frase, on debe es curante per fa diferente lo con bela ca con otra ajetivos. E on debe aprende la strutures alternativa. Plu cosas ce la studiante debe memori, cual es nonesesada per tota otra ajetivos.

• Contrapunto [B.P5.1.2]. An con la sujestas, un lejor/escutor ta pote ancora encontra frases como “Jua bela flautas vea es fasil.”, car la creor ia es nonconsensa de la trapa o la reparas sujestada.

Problemes [A.P6] e [A.P7] de la otra posta no aplica asi, car cuando tu ave du ajetivos, lo es coreta ance per pone bela/fea/etc pos la nom e usa e, si tu desira. La usa de bela prenomal con du ajetivos es nonobligante, no nesesada.

An tal, esta eseta ave un problem cual no aplica a la eseta de bon e mal:

Problem [B.P6] Nos ave du veses cual bien nesesa bela e _ _:

• averbal: “nom verbo bela e averbo” - el vive bela e virtuosa; el dormi bela e reposante; tu razona bela e lojical.

• verbo liante: “nom verbo bela e ajetivo” - lo es bela e peti; lo pare bela e secur; el senti bela e normal.

Car nos nesesa bien instrui nosa neurones per vide la strutur diseda a supra, “bela e parola-descrivente”, lo pare nonesesada ce nos debe aprende ance la strutur “bela nom ajetivo”, cuando “nom bela e ajetivo” ta servi bastante.

Solve proposada

Considerante tota la problemes a supra, me proposa respetosa ce nos cambia la gramatica per elimina esta eseta, afin bela, fea, nova, vea, grande e peti debe segue sempre sua nom, como tota otra ajetivos.¹⁰

Con esta solve, tota la problemes diseda a supra desapare.

Oposas espetada a la proposa

Oposa [B.O1]. … la eleje de pone los ante la nom permete la ajunta de otra ajetivos pos la nom sin crea un segue de ajetivos. – Jorj¹¹

Me es nonserta cua ia conserna Jorj - esce lo ia diseda ante la idea per usa e entre los?

• Contrapunto [B.O1.1]. On pote dise “boteca grande e conoseda”. “Un grande boteca” no es ambigua, ma si “boteca” ia es un ajetivo usada como un nom, on no ta pote comprende plu. Esta es la razona per pone sempre la ajetivo pos la nom. – Simon¹²

• me no vole cambia la regulas regardante la ordina de parolas. si, en alga situas, tradui es difisil, ma on pote usa traduis min leteral per evade problemes. pardona, sunido! – jorj¹³

• Los continua per discute cuando on pote scrive estra la regulas, ma no cambia la regulas, e los asentua ce si on debe scrive estra la regulas, “Evita ambiguas”.

• Evidente, la regulas ia es cambiada a pos, ma me no pote trova la discute. Ma a me, esta mesma razona es forte e debe aplica a bela, fea, etc.

• Contrapunto [B.O1.2]. Me ia xerca bela en Obras e alora ia conta cuanto avenis de “nom bela” (1 ajetivo) e “bela nom ajetivo” (2 ajetivos). La contas:
  • “nom bela” - 42 avenis
  • “nom bela e ajetivo” - 9 avenis
  • “bela nom ajetivo” - 5 avenis
• Alora sirca 91% ia es avenis de ajetivos posnomal. Tal, bela es nonfrecuente usada como un ajetivo prenomal. A me, esta frecuentia peti no justi ce nos declara ce lo es prenomal si 2, considerante ce lo resulta la problemes (a supra).¹⁴

Oposa [B.O2]. Algas ta pote dise ce “nom bela e ajetivo” es pico pesosa.

• Contrapunto [B.O2.1]. Ma nos ajunta mera un e. E e es nesesada per 99% de la ajetivos.

Oposa [B.O3]. Lo pare pico difisil tradui espresas como [fr] le petit chaperon rouge, le grand méchant loup, le vilain petit canard… – Mixel¹⁵

• Contrapunto [B.O3.1]. (como en O1.1) me no vole cambia la regulas regardante la ordina de parolas. si, en alga situas, tradui es difisil, ma on pote usa traduis min leteral per evade problemes. – Jorj¹⁶

• Denova, evidente la regulas ia es cambiada pos acel, ma me crede ce la state orijinal ia es plu bon.

Oposa [B.O4]. (La mesma como [A.O3] en la otra posta) Algas ta pote dise ce nos pone bela/fea/etc ante la nom cuando on ave du ajetivos car la Ecipo fa tal, per alga ajetivos (nota ce la regulas e constrinjes varia bien tra la Ecipo).

• Contrapunto [B.O4.1]. Como vos sabe, multe cosas es fada en la Ecipo ma no es fada en elefen, pe., la usa de infletas: per verbos (person, numero, tempo, moda), nomes (jenero), ajetivos (acorda en jenero e numero con nomes), e pronomes personal (caso gramatical). E serta on ave multe otra casos. Elefen no segue sempre la Ecipo.

Oposa [B.O5]. (La mesma como [A.O5] en la otra posta) La adota de la proposa ta causa ce multe avenis de bela/fea/etc en Obras ta nesesa es reparada.

• Contrapunto [B.O5.1]. La nesesa per labora en Obras no ia es un ostaculo cuando la comunia ia introdui otra cambias de colpa grande. En mea copia de La aventuras de Alisia en la pais de mervelias, capitoles 1-3, me ia trova:
  • cambia me/tu/se/nos/vos a la determinantes posesal mea/tua/sua/nosa/vosa: 93 avenis
  • introdui lo como la sujeto pupetin: 20 avenis
  • introdui on con ave: 16 avenis

• Aora, contrasta la contas a supra con la colpa de elimina la eseta per bela/fea/etc (la mesma capitoles):
  • move bela/fea/etc a posnomal con e: 7 avenis

• Lo es un colpa grande min.

* Contrapunto [B.O5.2]. Ance, me ta es felis per aida con cambias en Obras (ma no do lo es per stilo en poesias o naras, o en la foro).

Conclui

(Esta es per la plu identica a la conclui en la otra posta.)

Me sabe ce me adirije espertas en la lingua e esta cualia spesial ta pote es un parte amada de elefen. Ma me presenta esta proposa de la punta de vista de studiantes en tota locas, aora e en la futur. La cargas es plu profonda sentida par los. E me sabe ce comensores pote abitua a los. Ma como un ensenior saja ia dise a me a un ves, “Pote no es egal a debe”.

Cuando on deveni un media o esperta, me debe confesa ce la eseta es no plu un cosa grande. An tal, an per medias e espertas, on ave ancora un carga de memoria como la neurones prosede la frases listada a supra: no sola cuando atentante leje rapida, ma ance cuando escutante a un parlor.

Concluinte, me demanda respetosa a vos per considera esta proposa, per trae nosa lingua un paso plu prosima a sua goles de simplia e coere. Per favore, responde con vosa pensas, oposas, e acordas. Nota ce me ia inserta eticetas como [B.O1.1] a alga paragrafes, per fasili vosa referes a los.

Denova, per favore responde a Problemes con “bela”, “fea”, etc. (Foro).

Grasias per spende vosa tempo per leje e pensa sur esta!

Kim