Ajetivos
Un ajetivo es un parola cual altera la sinifia de un nom. Un ajetivo tipal indica un cualia de la person o cosa cual la nom indica.
En elefen, ajetivos no cambia per indica la cuantia o la seso.
Loca
Un ajetivo segue la nom cual lo descrive:
- un can bon
- la can la plu bon
- resultas eselente
En la plu de casos, on pote ajunta plu ca un ajetivo pos la nom sin causa confusa. Ma en alga casos, un de la ajetivos pote ance es comprendeda como un averbo cual altera la sinifia de la ajetivo seguente. On pote pone e entre la ajetivos per evade la confusa:
- la nara vera longa (vera = averbo)
- la nara vera e longa (vera = ajetivo)
- la om grande, forte e stupida (tre ajetivos)
Per efetos de stilo o bonsona en leteratur, alga ajetivos corta e frecuente pote apare ante la nom, si los mesma no ave descrives. Esta ajetivos es bon, mal, peti, grande, vea, nova, joven, bela, fea, cara e santa:
- un bon idea (ma sempre: un idea multe bon)
- mea cara ami
- la peti casa bela
- un vea faia putrida
Multe esclamas corta comensa sempre con bon ante la nom:
- bon dia!
- bon anio nova!
- bon apetito!
- bon idea!
- bon viaja! (o: viaja bon! = un verbo con averbo)
Compara
On formi ajetivos comparativa par ajunta la averbos plu e min. La preposada en un tal compara es ca:
- La cosina es plu calda ca la jardin.
- Esta leto es min comfortosa ca me ia previde.
On formi ajetivos superlativa par ajunta la averbos la plu e la min:
- La sol es la ojeto la plu calda en la sistem solal.
- El ia ave un fia la plu bela en la mundo. (la plu bela de tota fias en la mundo)
On pote combina numeros ordinal con la construi superlativa:
- Vega es la stela sinco la plu briliante en la sielo de note. (cuatro otra stelas es plu briliante ca lo)
- El ia deveni la om tre de la plu ricas en la mundo.
Comparas de egalia usa la combina tan… como…:
- La arbor ia es tan alta como un casa.
- On es tan joven como on senti.
Ajetivos como nomes
On pote reusa cualce ajetivo, sin cambia, como un nom per un person o cosa cual ave la cualia de acel ajetivo. La nom resultante obedi la regulas normal per nomes – lo aseta -s cuando plural, lo nesesa un determinante, e on pote an descrive lo con ajetivos:
- Esta anelo es perfeta sirculo. Lo es un sirculo perfeta.
- Marilyn es un blonde, e seniores prefere blondes.