Pronomes
Un pronom es un parola cual sustitui per un sintagma nomin plu longa.
Pronomes de person
- me – la person ci parla
- tu – la person a ci on parla
- el – alga otra person
- lo – un cosa
- nos – me e tu, o me e vos, o me e el, o me e lo, o me e los
- vos – la persones a ci on parla
- los – alga otra persones o cosas
Tu es singular e vos es plural en tota situas, e formal e casual.
El es usada per refere a persones, e a animales como mamales e avias. On pote estende metafor la usa a otra viventes, robotes, la luna, tempestas, etc.
Lo es usada per refere a cosas, viventes simple, ideas, consetas, etc.
Los es usada como la plural de ambos el e lo.
Elefen no distingui comun la seso de el. La formas ela (per refere a un fema) e elo (per refere a un mas) es rara, ma los pote es usada si, per esemplo, en un nara sur un om e un fem, on no desira repete tro frecuente la nomes propre.
- Do es Joana? El es en la jardin.
- Do es mea come de matina? Lo es en la cosina.
On pote segue un pronom de person con un suproposa ajetivin. Si la sinifia resta clar, on pote omete la pronom de person e lasa ce la pronom-sujunta fa un labora duple:
- El recorda sempre la nomes de los ci el ia encontra.
- Me respeta tu, ci es tan saja.
- El ci osa, gania.
- Ci osa, gania.
On es un pronom jeneral e nondefinida, como on en franses o man en deutx. Lo sinifia “persones jeneral” o “un person acaso e ipotesal”. Lo evita frecuente la nesesa de un verbo pasiva:
- On dise ce tu va parti.
- On debe repete la verbo. (la verbo debe es repeteda)
Se es la pronom refletante per la person tre, e singular e plural. Lo refere a la sujeto de la verbo corente, ma lo mesma es nunca la sujeto.
- Lo limpi se.
- Los lava se.
La pronomes de posese es la determinantes de posese, presededa par la:
- Me ia trova mea libros, ma tu no ia trova la tuas.
- Lo es ance plu grande ca la mea.
- No toca acel jueta! Lo no es la tua.
Pronomes determinante
Esata como on pote converti un ajetivo a un nom, on pote converti la plu de la determinantes a pronomes. La pronomes esta, acel e otra aseta sempre la -s pluralinte. On pote ajunta -s ance a alga otra pronomes, si esta clari la sinifia.
- tota, totas
- ambos
- esta, estas
- acel, aceles
- cualce, cualces
- cada
- alga, algas
- cual, cuales
- multe, multes
- poca, pocas
- plur, plures
- plu
- la plu
- min
- la min
- un/la otra, (la) otras
- la mesma, la mesmas
- un tal, tales
Esemplos:
- Estas aspeta bela!
- Prende cualce. (eleje un de la posibles)
- Me no vole judi, car me gusta egal cada.
- Me vole grasia cada de esta persones.
- Alga(s) pensa ancora ce la mundo es plata. (alga persones)
- Tu ia versa mal la vino. Alga es sur la table.
- Cual(es) tu va eleje?
- Multe(s) de nos es programores.
- Me no ia regarda multe(s) de acel filmas.
- Me reconose poca(s) de la persones en la fola.
- Plu va ariva pronto.
- Alga parolas es clar, ma on no pote leje fasil la plu. (la plu parolas)
- Tu ave min ca me.
- Me vole bonveni tota(s) de vos.
- Me ia compra sinco libros nova, ma me ia lasa tota(s) en la bus. (tota libros)
- Ambos de la enfantes jua felis.
On pote usa la numeros cardinal como pronomes cual indica grupos de la grandia spesifiada. Esta pronomes no aseta normal la -s pluralinte, e los no nesesa determinantes:
- Tre de mea amis va ariva a esta sera.
- Cuanto pizas tu ia come?
- Cuatro!
- La cuatro de nos va come en junta.
- Un de mea gatos manca.
- La tre ia abita en la mesma aparte.
Per indica multiples nonesata de numeros como sento, mil o milion, on ajunta la -s pluralinte:
- On ia ave miles de persones a la conserta.
- A cada anio, miliones migra a otra paises.
- On ia evacua miles de plu persones de locas inondada par la deluvias.
- On pote fatura plu sentos per servi.
On no pote converti la a un pronom. On usa el, lo o los en loca:
- La casa de mea padre es plu grande ca lo de mea frate.
- Lo es ance plu grande ca lo cual me intende compra.
On no pote usa no como un pronom, ma lo jenera nun e no cosa. On pote usa ance la numero zero como un pronom.
La idiom la un la otra (o lunlotra) sinifia ce du persones o cosas ata mutua a se. Lo ave varias como la un o la otra, la un pos la otra (o pos lunlotra), e la un sur la otra (o sur lunlotra):
- La xicos colpa la un la otra / lunlotra. – (cada xico colpa un – o plu – otra xico)
- Me pila mea crepes la un sur la otra / sur lunlotra. – (me pone un crepe sur un otra, cisa a plu ca un ves)
En alga frases, un pronom es direta segueda par un verbo e pote es malcomprendeda como un determinante segueda par un verbo reusada como un nom. Per esemplo, sin contesto, on no pote sabe serta esce acel veni de Italia sinifia la veni de Italia o lo veni de Italia. En la plu de casos, la intende es intera evidentida par la situa. Ma si on es un comensor en elefen, o on desira evita es malcomprendeda, on pote pone un nom simple – como person o cosa – pos la determinante en loca de converti lo a un pronom:
- Acel cosa veni de Italia.
- Recorda ce alga persones (o algas) abita en sua auto.
En alga casos, on vole clari ce la nom verbal no es un verbo. Con parolas como alga, multe e poca, on pote ajunta de entre la determinante e la nom; la determinante deveni alora un pronom, ma la nom no deveni un verbo. Con otra determinantes, como esta e acel, on pote usa la ante la determinante:
- La profesor ia demanda alga de atende.
- Multe de labora pote es evitada.
- La esta deside no es un bon resulta.
Pronomes de demanda
Elefen ave tre pronomes cual on usa per crea demandas direta:
- cua? = cual cosa(s)? (en modo la plu jeneral)
- ci? = cual person(es)? (en modo la plu jeneral)
- cual(es)? = cual cosa(s) o cual person(es)? (elejente entre un grupo de cosas o persones)
Cua e ci es sola pronomes, e on debe no usa los como determinantes.
Cual es fundal un determinante, ma on usa comun lo ance como un pronom.
Esemplos:
- Cua es en la caxa?
- Cua tu come?
- Cua es estas?
- De cua esta gaxa es composada?
- La armario es plen de cua?
- Cual tu ia gusta plu, la libro o la filma?
- Cual de la enfantes ia come la torta?
- Vos prefere cual(es), la rojas o la verdes?
- Cual(es) entre vos vole come esta torta de xocolada?
- Ci vole es un milionor?
- Tu vade a la sinema con ci?
- Ci los es?
On usa cua, ci e cual ance en demandas reportada.
Pronomes-sujuntas
Cual e ci servi ance como pronomes-sujuntas, per introdui suproposas ajetivin:
- cual
- ci (= la person cual…)
La pronom-sujunta per un person o animal es ci. La pronom-sujunta per otra cosas es cual:
- Esta es la fem de ci me ia compra mea auto.
- La fem de ci me ia oblida sua nom es denova a la porte.
- A, vide la patetas ci segue sua madre!
- La libro cual me leje es tro longa.
- La casa en cual nos abita es tro peti.
- La superstisios – me gusta esta parola! – cual me ia investiga es riable.
- El esperia un sonia cual el teme. – El teme un sonia, e alora el esperia esta sonia.
- Compara: El esperia un sonia ce el teme. – El esperia un sonia, e en la sonia el ave un teme.
Con alga suproposas ajetivin, la frase xef omete la nom cual la proposa descrive. La pronom-sujunta mesma apare en loca de acel nom. Alora, on pote usa lo cual en loca de cual e el ci en loca de ci si on vole evita confusa:
- Acel es (lo) cual me ia comprende. – Me ia comprende acel informa.
- Me comprende (lo) sur cual on ia instrui me. – On ia instrui me sur alga cosa, e me comprende lo.
- Me no recorda (el) ci me ia vide. – Me ia vide el, ma me no recorda el.
- Me no recorda (el) a ci me ia parla. – Me ia parla a el, ma me no recorda el.
Otra pronomes
On ave cuatro pronomes spesial cual refere a persones. On usa los sola a modo singular:
- algun (= alga un, alga person)
- cualcun (= cualce un, cualce person)
- cadun (= cada un, cada person)
- nun (= no un, no person)
Esemplos:
- Algun entre nos es la asasinor.
- Dise acel broma a cualcun, e el va rie.
- Cadun debe reseta un premio.
- Me senta en la atrio per un ora, e nun ia parla a me.
La corespondentes de algun, cualcun, cadun, e nun per cosas es alga cosa, cualce cosa, cada cosa, e no cosa.
Sintagmas pronomin
Normal, on no descrive pronomes con determinantes o ajetivos, ma on pote descrive los con sintagmas de preposada:
- Nos en la sindicato esije plu diretos.
- Tota de la lenio es danada.
- La plu de esta linguas es difisil.