Frases
La plu frases en elefen conteni un sintagma verbin cual indica comun la aveni de un ata. Un sintagma verbin es composada de un verbo e cualce elementos cual descrive lo, como averbos e sintagmas de preposada.
La plu frases conteni ance a la min un sintagma nomin, cual indica comun un person o un cosa. Un sintagma nomin es composada de un nom e cualce elementos cual descrive lo, como determinantes, ajetivos e sintagmas de preposada.
Sujeto e ojeto
La du sintagmas nomin la plu importante es los con la rol de sujeto e ojeto. Sua sinifias esata depende de la verbo elejeda, ma on pote dise laxe ce la sujeto es la person o cosa cual fa la ata, e la ojeto es la person o cosa direta tocada par la ata.
En elefen, la sujeto presede sempre la verbo e la ojeto segue:
- La gato (sujeto) xasa (verbo) la scural (ojeto).
- La xica (sujeto) gusta (verbo) la musica (ojeto).
- La can (sujeto) dormi (verbo).
En alga casos, per stilo o clari, on pote pone la ojeto de la verbo a la comensa de la frase:
- La gatos me no gusta. (Me no gusta la gatos. La gatos, me no gusta los.)
La plu verbos nesesa un sujeto, ma multe no nesesa un ojeto.
Predicativas
Un otra composante comun de frases es la predicativa o completinte. Esta es un descrive ajuntada de la sujeto, e lo pote segue verbos como es, deveni, pare, e resta:
- Computadores (sujeto) es (verbo) macinas (predicativa).
- La aira (sujeto) pare (verbo) umida (predicativa).
- La comeda (sujeto) deveni (verbo) fria (predicativa).
- La patatas (sujeto) ia resta (verbo) calda (predicativa).
- Nosa taxe (sujeto) es (verbo) reconstrui la mur (predicativa: un frase suordinada).
- La idea (sujeto) es (verbo) ce tu canta (predicativa: un frase suordinada).
Alga linguas permete ce ance la ojeto ave un predicativa, como en *“los ia eleje el presidente”. Esta spesie de predicativa no esiste en elefen.
Preposadas
Un otra composante major de frases es la sintagma de preposada. Lo ajunta un detalia a un nom o verbo presedente, o a la frase intera:
- La om (sujeto) ia cade (verbo) tra sua seja (sintagma de preposada).
- En la note (sintagma de preposada), la stelas (sujeto) apare (verbo).
- Me (sujeto) dona (verbo) esta poma (ojeto) a tu (sintagma de preposada).
- Tu (sujeto) no aspeta (verbo) como tua foto (sintagma de preposada).
Proposas
En ajunta a sintagmas, alga frases conteni proposas, cual sembla frases minor situada en la frase major. Los pote descrive sintagmas nomin, sintagmas verbin, o la intera de la frase major:
- La om ci ia abita asi ia vade a Paris.
- El va visita en julio, cuando la clima es bon.
- On no ia permete me a fa la cosas como me ia desira.
- Me pensa ce el es bela.