Capitol 18

1 En acel tempo, la disiplos ia prosimi Jesus e ia dise: “Ci es la plu grande en la rena de sielo?” 2 El ia clama un enfante, situante el entre los, 3 e el ia dise: “Amen, me dise a vos, a min ce vos cambia e deveni como enfantes, vos no va entre en la rena de sielo. 4 Cualcun ci umili se mesma como esta enfante es la plu grande en la rena de sielo. 5 E cualcun ci reseta un enfante como esta en mea nom reseta me.

6 “Cualcun ci fa ce un de esta peti ci crede en me peca, lo ta es plu bon per el ave un petra de molin pendeda de sua colo e ce el es afocada a la profundia de la mar. 7 Mal fortun a a la mundo par causa de la cosas cual causa peca! Tal cosas debe veni, ma mal fortuna a acel tra ci los veni! 8 Si tua mano o pede causa vos peca, corti lo e dejeta lo. Lo es plu bon per los entre en la vive eterna ferida o descapasida ca con du manos o du pedes es lansada a la foco eternal. 9 E si vosa oio causa vos peca, estrae lo e dejeta lo. Lo es plu bon entre a vive con un oio ca con du oios es lansada a la focosa Gehena.

10 “Vide ce vos no despeta un de esta petis, car me dise a vos ce sua anjeles en sielo sempre regarda la fas de mea Padre sielal. 11 “Car la Fio de Om ia veni per salva cual ia es perdeda”. 12 Cual es vosa opina? Si un om ave sento oveas e un de los es perdeda, esce es no va lasa la otra novedes-nove en la colinas e vade per xerca acel perdeda? 13 E si el trova lo, amen, me dise a vos, el joia plu par acel ca par la novedes-nove cual no ia es perdeda. 14 En la mesma modo, lo no es la vole de vosa Padre sielal ce un de esta petis es perdeda.

15 “Si tua frate peca contra tu, vade e dise a el sua falia entre tu e el sola. Si el escuta tu, tu ia vinse tua frate. 16 Si el no escuta, prende un o du otra con tu afin ‘ta ce tota ata es instituida sur la atesta de du o tres atestores’. 17 Si el refusa escuta los, dise a la eglesa. Si el refusa escuta an a la eglesa, alora trata el como tu ta trata un pagan o un colior de impostas. 18 Amen me dise a vos, cualce cosa ce vos lia en tera va es liada en sielo, e cualce cosa ce vos deslia en tera va es desliada en sielo. 19 Denova, (amen) me dise a vos, ce si du de vos acorda per demanda alga cosa, mea Padre sielal va dona a los”. 20 Ca cuando du o tre es asemblada en mea nom, ala me es entre los”.

21 Alora Pedro ia prosimi el e ia dise: “Senior, si mea frate peca contra me, cuanta veses me debe pardona el? Tan multe como sete veses?” 22 Jesus ia responde: “Me dise a vos, no sete veses, ma setedes-sete veses. 23 Par esta la Rena de Sielo es como un re ci ia vole salda sua contas con sua servores. 24 Cuando el ia comensa la contablia, un detor ci ia debe el un cuantia enorme ia es traeda ante el. 25 Car el no ia ave forma de paia el, sua mestre ia comanda ce el es vendeda con sua fem, sua fios, e tota sua proprias per paia la deta. 26 La servor ia cade a sua pedes disente: “Es pasiente mcon me, e me va paia tota”. 27 Compatiada con el, la mestre de acel servor ia lasa el vade e ia pardona el la deta. 28 Cuando la servor ia sorti, el ia trova un de sua cameradas ci ia debe el un cuanti multe plu peti. El ia prende el, e ia comensa strangula el esijente: ‘Pai cual tu debe’. 29 Cadente a sua jenos, sua camerada ia suplica el: ‘Es pasiente con me, e me va paia tu’. 30 Ma el ia refusa. En loca, el ia pone el en prison asta ce el paia cual el ia debe. 31 Aora cuando sua companiores ia vide cual ia aveni, los ia es multe disturbada, e los ia vade a sua mestre e ia reporta la caso intera. 32 Sua mestre ia clama el e ia dise a el: ‘Tu mal servor! me ia pardona tu tua deta completa car tu suplica me. 33 Esce tu no ia ave compatia con tua camerada?’ 34 Alora colerida sua mestre ia entrega el a la torturores asta ce el ia paia la deta completa. 35 Tal mea Padre sielal va fa con vos, a min cada un de vos pardona sua frate de sua cor”.

Capitol 18