Capitol 14

1 En acel tempo Herode la tetrarca ia oia de la reputa de Jesus 2 e el ia dise a sua servores: “Esta om es Joan la Batista. El ia revive, esta es la causa par cual potias miraclosa ata en el”.

3 Alora Herode ia aresta ja Joan, el ia cadeni el e ia prisoni el par causa de Herodias, la sposa de sua frate Filipo, 4 car Joan ia dise el: “Lo no es legal ce tu ave ela”. 5 An si el ia vole mata el, el ia teme la popla, car los ia regarda el como un profeta. 6 Ma en un selebra de aniversario de Herode, la fia de Herodias ia dansa entre la invitadas e ia deleta tan multe Herode 7 ce el ia jura a el dona el cualce cosa ce el ta demanda. 8 Puiada par sua madre, el ia dise “dona me asi sur un platon la testa de Joan la Batiste”. 9 La re ia es angusada, ma par causa de sua jura e la invitadas ci ia es presente, el ia ordina ce lo ta es donada, 10 e ia comanda destesti Joan en prison. 11 Sua testa ia es traeda sur un platon e donada a la xica, ci ia porta lo a sua madre. 12 Sua disiplos ia veni e ia sutrae la corpo mor e ia entera el; e los ia vade e ia dise a Jesus.

13 Cuando Jesus ia oia esta, el ia retira en un barco a un loca abandonada el sola. La folas ia oia esta e ia segue el par pede de sua vilas. 14 Cuando el ia desembarca e ia vide la fola enorme, sua cor ia es moveda con compatia par los e el ia cura la maladas. 15 A sera, la disiplos ia prosimi el e ia dise: “Esta es un loca abandonada e lo es ja tarda; envia la folas a via afin los pote vade a la viletas e compra comeda per los”. 16 Jesus ia dise a los: “Lo no es nesesada ce los vade a via, dona los alga comeda vos mesma”. 17 Ma los ia responde: “Tota cual nos ave es sinco panes e du pexes”. 18 Alora el ia dise: “Trae los a me”, 19 e el ia comanda la folas senta sur erba. Prendente la sinco panes e la du pexes, e regardante a sielo, el ia dise la bondise, el ia parti la panes, e ia dona los a sua disiplos, ci ia dona los a la fola”. 20 Tota los ia come asta es sasiada, e los ia recolie la fratos restante—des-du sestos de bastetas plen. 21 Aceles ci ia come ia es sirca sincomil omes, no contante femes e enfantes.

22 Alora el ia obliga la disiplos asende a la barco e ia presede el a la otra riva, en cuando el ia envia la fola a via. 23 A pos fa esta, el ia vade a la monte per prea sola. Cuando lo ia es sera, an el ia es ala sola. 24 Entretempo, la barco, ja distante de la costa, ia es secuteda par la ondas, car la venta ia es contra lo. 25 En la leva de sol, el ia veni a los, paseante sur la mar. 26 Cuando la disiplos ia vide el paseante sur la mar los ia es terorida. “Lo es un fantasma”, los ia dise, e los ia cria asustada. 27 Ma Jesus ia dise a los: “Calmi, lo es me; no teme”. 28 Pedro ia responde el: “Senior, si lo es tu, comanda me veni a tu sur la acua”. 29 El ia dise: “Veni”. Pedro ia sorti de la barco e ia comensa pasea sur la acua en dirije a Jesus. 30 Ma cuando el ia vide como forte ia es la venta, el asusta e, comensante afonda, el ia cria: “Senior, salva me!”. 31 Direta Jesus ia estende sua mano e ia prende el, disente a el: “Om de poca fida, perce tu ia duta?”. 32 A pos los ia asende a la barco, la venta ia calmi. 33 Aceles ci ia es en la barco ia onora el disente: “Vera, tu es la Fio de Dio”.

34 Cuando los ia ariva a la riva, los ia vade a Genesaret. 35 Cuando la omes de acel loca ia reconose el, los ia estende la nova a la locas prosima. Los ia trae a aceles ci ia es malada 36 e los ia suplica el ce el lasa LOS toca sola la borlas de sua capa, e tan multe como los ia toca lo ia es sanida.

Capitol 14