Capitol 11

1 Cuando Jesus ia fini dona esta comandas a sua des-du apostoles, el ia parti de ala per ensenia e predica en la sites de la rejion.

2 Cuando Joan ia escuta en prison sur la obras de la Maxia, el ia envia sua disiplos a el 3 con esta demanda “Esce es tu ci debe veni o esce nos debe atende otra?” 4 Jesus ia responde a los: “Vade e conta a Juan lo ce vos oia e vide: 5 la sieca recovre sua vista, la coxeantes pasea, la leprosas es purida, la sordas oia, la moris revive e la Nova Bon es proclamada a la povres. 6 E bondise es per ci me no es causa de scandal”.

7 Cuando los ia es partinte, Jesus ia comensa parla a a folas sur Joan: Ce vos ia vade a vide a la deserto? Un anxa osilada par la venta? 8 Ce vos ia vade vide? Algun vestida con vestes valuada? Aceles cual veste vestes valuada es en palasios real. 9 Donce ce vos ia vade vide? Un profeta? Si, me dise vos, e plu ca un profeta. 10 Esta es acel sur ci es scriveda:

“Me envia un mesajor ante tu;
el va prepara tua via ante tu”.

11 Me serti vos ce entre aceles naseda de fem on ave nun plu grande ca Juan la Batiste; e, an tal, la plu peti en la rena de la sielos es plu grande ca el. 12 De la dias de Juan la Batiste asta aora, la rena de la sielo es combateda, e la violentes vole saisi lo. 13 Tota la profetas e la lege ia predise asta la tempo de Juan. 14 E si vos vole aseta lo, el es Elija, ci debe reveni. 15 Cualcun ci ave oreas debe oia.

16 Con ci me pote compara esta jenera? Lo es como enfantes ci senta en venderias e clama lunlotra: 17 “Nos ia jua la flauta per vos, ma vos no ia dansa, nos ia canta un lamenta ma vos no ia plora”. 18 Car Joan ia ariva, ci no come no bebe, e los ia dise “El es poseseda par un demon”. 19 La Fio de Om veni comente e bevinte e los dise “Vide, el es un gloton e un enebriada, un ami de la coliores de impostas e pecores”. Ma la Sajia ia es justida par sua obras.

20 A pos el ia comensa reproxa a acel sites do el ia fa la plu de sua miracles, car los no ia repenti. 21 “Mal fortuna a tu Corazin! Mal fortuna a tu Betsaida! Car si la miracles fada entre vos ta es fada en Tiro e Sidon, los a multe tempo ante aora ia repenti con juta e sene. 22 Ma me dise vos, Tiro e Sidon va es tratada con min severia ca vos en la dia de la judi. 23 E tu, Capernaun:

Esce tu crede ce va es altida a la sielo?
Tu va desende a la enferno.

Car si la miracles fada en tu ta es fada en Sodo, lo ta resta asta esta dia. 24 Ma me dise tu, la tera de Sodom va es tratada con min severia ca vos en la dia de la judi”.

25 En acel tempo, Jesus ia dise: “Me loda tu, Padre, Senior de la sielo e la tera, car an si tu ia asconde esta cosas a la sajas e la educada, tu ia revela los a la enfantin. 26 Si, Padre, tal ia es tua volunta. 27 Tota cosa ia es donada a me par mea Padre. Nun conose la Fio eseta la Padre, e nun conose la Padre eseta la Fio e cualcun a ci la Fio vole revela el.

28 “Veni a me, tota vos cargada e doleda, e me va dona vos reposa. 29 Prende vos mea iugo e aprende de me, car me es pasiente e umil de cor, e vos va trova reposa per vos. 30 Car mea iugo es fasil e mea carga lejera”.

Capitol 11

Evanjelio de San Mateo
1 · 2 · 3 · 4 · 5 · 6 · 7 · 8 · 9 · 10 · 11 · 12 · 13 · 14 · 15 · 16 · 17 · 18 · 19 · 20 · 21 · 22 · 23 · 24 · 25 · 26 · 27 · 28