Capitol 4

1. Jesus, plenida con la Spirito Santa, ia reveni a la riva de la Rio Jordan e ia es conduida par la Spirito a la deserto,
2. do el ia es tentada par la demon per cuatrodes dias. El no ia come en acel dias, e pos los el ia fami.
3. La demon ia dise alora: “Si tu es la Fio de Dio, comanda esta petra deveni pan”.
4. Ma Jesus ia responde: “La Scrivedas Santa dise: ‘La om no vive sola de pan’.”
5. A pos la demon ia porta el a un loca plu alta, el ia mostra en un momento tota la renas de la tera,
6. e el ia dise a el: “Me va dona tota esta potia e brilia de esta renas, car los ia es donada a me, e me dona los a cualcun ce me vole.
7. Si tu proni ante me, tota es va parteni a tu”.
8. Ma Jesus ia responde: “Lo es scriveda: ‘Tu va adora a la Senior, tua Dio, e solo a el tu va servi”.
9. A pos el ia gida el a Ieruxalim, fa el sta sur la parapeto de la templo, e ia dise a el: “Si tu es la Fio de Dio, jeta tu mesma a basa de asi,
10. car lo es scriveda: ‘El va comanda sua anjeles consernante tu, per garda tu,’
11. e: ‘Con sua manos los va suporta tu, afin tua pede no tropeza con un petra.’”
12. Jesus ia responde a el: “Lo ance dise: ‘Tu no debe proba la Senior, tua Dio.’”
13. Pos cuando la demon ia fini ja cada tenta, el ia parti de el per un tempo.
14. Jesus ia reveni a Galil en la potia de la Spirito, e novas de el ia estende tra tota la rejion.
15. El ia ensenia en la sinagogas e ia es lodada par totas.
16. El ia veni a Nazaret, cuando el ia adulti ja, e ia vade seguente la costum a la sinagoga en la saturdi. El ia sta per leje
17. e los ia dona a el la libro enrolada de la profeta Isaia. El ia desenrola lo e ia trova la pasaje do lo ia es scriveda:
18. “La Spirito de la Senior es sur me, car el ia unje me per trae la Nova Bon a la povres. El ia envia me per proclama libria a la caturada se recovre la vide a la siecas, per dona libria a la opresadas,
19. e per proclama un anio asetable a la Senior.”
20. Enrolante la libro enrolada, el ia returna lo a la atendor e ia sedi, e la oios de totas en la sinagoga ia regarda el fisada.
21. El ia dise a los: “Oji esta pasaje de la Scrivedas Santa ci vos veni de escuta es plenida”.
22. E totas ia atesta en sua benefica e ia es stonada par la parolas de grasia cual ia sorti de sua boca. Los ia demanda ance: “Esce esta no es la fio de Josef?”
23. El ia dise a los: “Serta vos va sita esta proverbo a me: ‘Dotor medical, cura tu tu mesma”, e dise: “Fa asi en tua loca nativa la cosas ce nos ia oia ce ia es fada en Cafarnaum.”
24. E el ia dise: “Me serti vos ce no profeta es asetada en sua propre loca nativa.
25. Vera, me dise vos, on ia ave multe viduas en Israel en la dias de Elija cuando la sielo ia es cluida per tre anios e media e un fami sever ia estende tra la tota pais.
26. Elija ia es enviada a nun de los, ma sola a la vidua de Sarepta, en la pais de Sidon.
27. Denova, on ia ave multe leprosas en Israel en la tempo de la profeta Eliseo; ma nun de los ia es purida, sola Naaman la suri.”
28. Cuando la persones de la sinagoga ia escuta esta, los ia es tota plenida con furia.
29. Los ia revolta, ia espulsa el de la site, e ia porta el a la culmina de un colina en cual sua site ia es ja construida, per lansa el con prima sua testa.
30. Ma el ia pasa tra la media de los e ia continua sua via.
31. Pos esta, Jesus ia vade a Cafarnaum, un site en Galil. El ia ensenia los en la saturdi,
32. e los ia es stonada par sua ensenia car el ia parla con autoria.
33. En la sinagoga on ia ave un om con la spirito de un demon nonpur, e el ia cria en vose alta,
34. “Ha! Cual tu vole de nos, Jesus de Nazaret? Esce tu ia veni per destrui nos? Me sabe ci tu es - la Santa de Dio!”
35. Jesus ia reproxa el e ia dise: “Silenti! Sorti de el!” Alora la demon ia jeta la om a basa ante los e ia sorti de el sin dana el.
36. Tota los ia es stonada e ia dise lunlotra: “Cual ave sua parola? El comanda con potia e autoria a la spiritos nonpur, e los sorti!”.
37. E sua fama ia estende per tota la areas de acel rejion.
38. A pos, el ia abandona la sinagoga, el ia entra en la casa de Simon. La madre par sposi de Simon ia sufri un febre sever, e los ia interveni con el per ela.
39. Apoiante se sur el, Jesus ia reproxa la febre, e lo ia abandona el. Direta, el ia leva e ia comensa servi los.
40. Cuando la sera ia veni, totas ci ia ave persones malada o sufrinte maladias diversa ia trae los a el, e el ia pone sua manos sur cadun e ia sani los.
41. Demones ia sorti de multe persones, criante: “Tu es la Fio de Dio!” Ma el ia reproxa los e no ta lasa los parla, car los ia sabe ce el ia es la Maxia.
42. Cuando la matina ia veni, Jesus ia sorti e ia vade a un deserto. La fola ia comensa xerca el, e cuando los ia trova el, los ia vole reteni el afin el no ia abandona los.
43. Ma el ia dise a los: “Me debe ance predica la novas bon de la rena de Dio a otra sites, car per esta me ia es enviada”.
44. El ia predica en la sinagogas de Judea.