Libro 6

Tal ia parla Enea, plorante, e permete tota controla a sua capitanes e ia lisca a fini a la costas eubean de Cumas. Los ia turna sua proas a la mar, ia securi la ancores e la barcos curva ia linia la plaia.

La grupo joven ia salta zelosa a la costa hesperian: alga ia xerca la modo per fa foco contenida en venas de petra focosa, alga ia invade la bosces, nido densa de bestias, e ia mostra a sua cameradas la rios cual los ia descovre. Ma la relijiosa Enea ia xerca la culminas, do Apolo governa en la altia, e la cavon enorme prosima, la loca secreta de la Sibila asustante, a ci la profeta delian inspira eselentia de mente e spirito e revela la futur.

Pronto los ia entre la bosce de Diana e la casa orosa. Dedalo, tal la istoria developa, fujinte de la rena de la re Minos, ia osa fida se mesma a la aira con alas rapida, e liscante su vias nonconoseda en dirije a la jelada Norde, e ia flota en aira su la colina de Calcis. Asi, arivante per prima ves a tera, el ia dedica a tu, Febo, sua remos con alas e ia construi un templo enorme. Sur la portas, la mori de Androgeo; alora la desendentes de Cecrops, comandada (miseria!) a paia la puni de un seti de sua fios vivente a cada anio; la vaso sta pos la estrae de sortes*. A fas, asendente de la mar, la isola Creta: asi representada es la cruel ama de la bove mas, la delirio de Pasifae e la Minotauro, sua enfantes ibride, rejistra de sua ama monstrin.