Libro 4

Entretempo la Rea, ferida a multe tempo a ante per un ama intensa, nuri la dole con sua sangue, debilida per un foco ascondeda. La coraje de la eroe frecuente reveni a sua mente e ance la nobilia de sua linia de familia: sua imaje e sua parolas adereda es a sua cor e la ama no dona calmia a sua corpo.

La aurora seguente ia lumina la tera con la torxa de Febo, e ia sperde de la sielo la ombras rosiosa cuando, deliriosa, tal ia parla Dido a sua sore, con ci compati sua cor: “Ana, sore mea, cual sonias es esta ce atera me? Ci es esta invitada stranjer ci ia entra en nosa casa? Tan nobil, tan corajosa e tan jenerosa! Me crede lo ben (e lo no es un ilusa vana, ce el veni de la linia de familia de la dios. Lo es la teme cual demostra la spiritos, ma ai!, per cual destinas no ia es probada! Cual geras el ia referi a nos! Si me no ta porta en mea mente, fisada e nonmovable, la deside de uni con zero om en la lia de sposia de cuando la mori ia froda mea prima amor, si me no es fatigada de la leto e la torxa de sposi, a esta fali, cisa, me ta sede! Me confesa a tua, sore, de la mori de mea nonfortunosa spos Siceo, e la frati de mea casa par la asasina de mea frate, el sola ia convinse mea desira e ia suverti mea anima bambolante. Me senti denova un sintil de la foco pasada, ma me prefere ce la tera engoli me asta sua profondia, o ce la Padre omnipotente lansa me con sua raio a la ombras (la ombras pal e la note deplorable de Erebo) ante, o vergonia! me viole o rompe tua leges! Acel ci prima ia lia a me, acel ia porta mea cor: ta ce el manteni lo, el garda lo en la tomba! Parlante tal, el ia pleni sua peto con sua larmas.