La sinco amis ia turna e ia vide un om con un pistol.
“Ci es tu?” Luca ia demanda.
“Me es la Baron LaForesta, de la familia Foresta.”
“E ci es acel familia?” Eneko ia demanda.
“Un de la familias la plu rica en Francia,” el ia responde. “E me es ance la proprior de esta mineria, do vos ia entra nonlegal.”
“E do es la contrata cual mostra ce tu es la proprior de esta mineria?” Itxaso ia demanda.
“O, la judor va demanda de me la contrata… Esta es mea contrata,” la om ia dise mostrante la pistol a los. “Aora, vos va resta silentida asta ce mea omes prende la oro.”
“E cual tu va fa con la oro?” Luca ia demanda.
“Vera? Tu fa esta demanda?” Joan ia dise a Luca.
“Me no sabe, me es nervosa,” Luca ia responde.
“Clar, el va fura la oro en la elicotor, porta lo a la castel e de ala…” Joan ia dise, regardante la Baron.
“… de ala me va porta lo a mea imobilas en Francia.”
“Donce tu fura la oro, e porta lo a otra pais. Esta no es sola un fura, ma un fura de recursos nasional,” Itxaso ia dise.
“Multe bon!” la Baron ia dise. “Aora, lia los,” el ia dise a la tre omes ci ia es ja laborante en la mineria.
“Aora nos depende de tu,” Joan ia dise en vose basa, pensante a Elisenda.
Entretempo, Elisenda ia ariva ja a la ofisia munisipal, e entrante sin toca la porte, el ia trova la maior.
“Senior,” el ia dise. “Me veni de la mineria cual es ultra la Vileta de la Marci.
“Alo, joven, esce tu no sabe ce esta no es un forma…” la maior ia comensa dise.
“Silenti!” el ia parla. “Nos ia trova ce algun prende oro de la mineria e porta lo a un castel construida prosima a la mineria.”
La maior ia pali.
“Cual?” ia es la sola cual el ia pote dise.
“Cual tu ia escuta!” Elisenda ia dise. “Mea sinco amis ia entra a la mineria por vide cual es aveninte. Tu debe envia la polisia ala!”
La maior ia prende la telefon e ia parla con la polisia, ci ia ave sua ofisia en la capital de la provinse.
“Oce, los va envia alga scuadrones a la mineria.”
“Bon!” Elisanda ia dise con un surie.
“Ma perce vos ia es en la mineria?” la maior ia demanda.
“Cual otra cosa nos pote fa? En nosa vileta on ave no interede, no linia de telefon.”
“Lo es vera,” la maior ia dise. “Bon, reveni a tua vileta e la polisia va fa tota.”
“Grasias,” el ia dise e, prendente sua bisicle, el ia deside reveni a la mineria.
Pos sincodes minutos en cual el ia dirije la laboras de estrae de oro, la Baron ia reveni a la sinco amis, liada e sentada sur la solo, e ia dise:
“Esce vos no sabe ce curiosia es lo cual ia mata la gato?” el ia demanda. “Aora, vos va mori, tan joven!” e el ia rie.
“Bufon!” Eneko ia dise. “Esce tu crede ce nos es tan stupida? Nosa familias sabe do nos es e, cuando los vide ce nos no reveni a la sera…”
“… los va veni asi e va trova sinco corpos mor, cada pistolida.”
Irati ia comensa plora, e a pos Itxaso ia fa la mesma.
En acel momento, Elisenda ia entra a la mineria, e ia resta ascondeda, vidente cual aveni:
“O, silenti!” la Baron ia dise. E, turnante a sua omes, el ia ajunta: “Esce vos ia fini ja con la oro?”
“La bagaje es plen,” un de los ia dise.
“Bon, on va porta esta a la elicotor e a pos nos va vade a la castel,” el ia dise. “Adio, jovenes, joia vosa oras ultima en esta mineria.”
“Fio de p…” Joan ia comensa dise.
La Baron ia silenti el, palminte el a la fas: “Aprende un vocabulo plu bon!”
“Tua madre,” Joan ia responde, e el ia sputa a el.
“Como tu osa…!” la Baron ia dise, e el ia comensa leva la braso cuando Elisenda ia puxa el.
“Lasa mea amis en pas, cretin!” el ia dise.
La Baron ia cade a tera, ma la omes ia comensa persegue Elisenda ci ia atenta sorti de la mineria, ma, cuando el ia prosimi a la sorti, el ia es prendeda, liada e lasada con sua amis.
“Bon, aora nosa sola espera ia desapare ja,” Joan ia dise.
“No, espeta mera,” Elisenda ia dise.
Pos alga minutos, la xicos ia vide como la omes, la Baron e la oro ia sorti de la mineria.
“Cual on debe espeta, Elisenda?” Itxaso ia demanda.
“La maior ia dise a me ce el ia telefoni a la polisia,” Elisenda ia dise.
“Bon,” Luca ia dise en cuando el ia leva se. “Entretempo, nos va proba sorti de asi. Eneko, aida atenta deslia me.”
Eneko ia fa como sua ami ia dise e pos des minutos ambos ia es desliada. Los ia deslia la otras e los ia sorti de la mineria.
“Nos debe vade a la castel,” Joan ia dise.
“No, per favore, no plu aventuras,” Irati ia dise.
“Regarda! La castel es ensircada par autos de polisia!” Elisenda ia dise.
Los ia vade a la castel e ia vide ce, vera, lo es ensircada. La polisia ia espeta la Baron en la castel afin el no va pote fuji en la elicotor.
La amis ia ariva cuando la Baron ia es acompaniada par la polisia, con polsos securida.
“Ajentes, esta om ia secuestra nos en la mineria e ia colpa me a la jena,” Joan ia dise.
“Xicos fodeda! Vos va vide cuando me prende vos…,” la Baron ia dise. E la polisia ia fa ce el entra a la auto.
La maior ia ariva e ia vade a los. “Xicos, me ta vole grasia vos. La Baron ia compra la teras prosima a la mineria ma nos no ia sabe ce el fura la oro. La polisia ia parla con la colegas de Francia e los ia trova multe oro en sua casa, cual va es redonada a nosa pais.”
“U!” la xicos ia cria.
La maior ia regarda a Joan e ia dise: “Me vide ce tu ia trova amis per segue con la aventuras.”
“Si,” el ia dise, “la Club de la Marcia es preparada per solve la misterio seguente.”
“Bon, atenta es calmida tra la resta de la estate, e vade per vide vosa familias, car los es serta ansiosa.”
La maior ia lasa los e Elisenda ia demanda el: “La Club de la Marcia? Ma cual es acel?”
“Me gusta lo,” Eneko ia dise.
“Ance me,” Luka ia ajunta.
“U! Un sosia secreta!” la jemelos ia cria.
“Me suposa ce la Club de la Marcia ia nase ja,” Elisenda ia dise.
La amis ia reveni a la Vileta, esata cuando la festa de la aniversario ia comensa.
La plaza de la Vieleta ia es plen de persones cuando la grupo ia ariva.
“Me no pote crede ce la Vileta de la Marci ave tan multe persones!” Eneko ia dise.
“Bon,” Luka ia parla. “Cada a sua casa, duxi, e asi en un ora.”
Cada de la cuatro ia vade a sua casa, do los ia raconta la istoria a sua jenitores, ci no ia pote crede lo. Cuando los ia reveni a la plaza, la polisia e la maior ia es ala.
“Me ta vole anunsia cual ia aveni oji en la mineria,” la maior ia comensa dise. E a pos, el ia raconta la istoria completa.
“Me ta vole grasia la Club de la Marcia car los ia es la persones ci ia para la fura de nosa mineria!” el ia dise. E la viletanes ia comensa aplaudi.
“E aora, on pote comensa la festa de aniversario de la nase de la Vileta de la Marci!”
La sinco amis ia senta sur un banca ma, pos alga tempo, Joan ia leva se e ia comensa vade en dirije a la fini de la vileta. Elisenda ia fa la mesma e, cuando Luka ia atenta segue los, Eneko ia para el.
“Los debe parla sur un cosa importante,” el ia dise.
“Romeo e Julieta,” Itxaso ia dise.
“Tan romantica!” Irati ia dise.
Joan ia es regardante la stelas.
“Perdeda en tua pensas?” Elisenda ia demanda.
“A, tu es ala!” el ia dise.
“Me ia dise ce nos va debe parla de alga cosa,” el ia dise, prosiminte.
“E… bon… me…,” Joan ia comensa dise.
E Elisenda ia besa el a la labios.
“Tota la grupo ia vide como tu regarda me,” el ia dise.
“Tan multe on nota me?” Joan ia demanda.
“Tan multe,” ia es la responde de Elisenda.
“Me no sabe perce, ma cuando on ia encontra, e on parla, me… me no sabe, ma tu ave alga cosa cual fasina me.”
“Ance tu,” Elisenda ia responde.
E ambos ia regarda la sielo, abrasada.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 28 novembre 2024 (08:56 UTC).