DENOVA EN LA MARCIA
Capitol 1 · Capitol 2 · Capitol 3 · Capitol 4

Capitol 1

Joan ia sorti de la casa de sua avo en la Vileta de la Marci. Acel estate ia es diferente: a esta ves el no ia es solitar. Joan no ia sabe ce otra familias ia ave sua orijinas en acel vileta e, en acel anio, la majoria de la persones relatada con la Vileta de la Marcia ia deside vade par causa de la aniversario de sua crea. Si, esta ia es vera: la Vileta de la Marci ia nase en la comensa de la eda medieval cuando la invadores barbar ia misca con la romanes ci ia abita ala. Per evita es concistada par la muslimes, los ia crea la vileta.

La familia de Joan ia ariva plu tarda, e par causa de esta, los ia abita en un loca separada. An tal, acel ia es alga cosa de la pasada e aora nun ia cura sur acel cosas.

Joan ia vade a la sala de come. La come de matina ia es espetante el: ovos con lardo.

“Avo, si me come esta a cada dia me va fini obesa.”

“Asi, en la Vileta de la Marci, nos come tal. Tu nesesa enerjia per la dia.”

Joan ia come la come prima e ia sorti de la casa per vide ci ia ariva. La sentro de la vileta ia es reformida e aora lo ia ave un fonte, e alga bancas. El ia senta ala e ia regarda como, a cada tempo definida, un automobil ia entra en la vileta.

Pos alga tempo, un xica ia desende de sua casa a la fonte.

“Alo,” el ia dise, “me es Elisenda. Como tu es nomida?”

“Me es Joan,” el ia responde.

“Espeta, esce tu es el ci ia trova la documentos de la Marcia?”

“Si, me es el ci ia fa acel a la estate pasada.”

“U! Me no pote crede ce me conose tu,” el ia dise. “Par tua causa mea madre ia deside veni denova asi. A la ves ultima cuando me ia veni, me ia es multe peti”.

La xica ia es bela: con capeles roja e longa, oios verde e puntetas en sua fas. El ia porta un jina e sapatos de sporte e un jaca de denim multe magra.

“E cual tu fa asi?” el ia demanda.

“No cosa,” ia es la responde de Joan. “Asi nos no pote fa multe cosas.”

“Si, esta es vera. Me ia trae alga libros per leje car me no ia sabe cual cosa me va trova asi.”

“Bon, aora tu ia trova me,” Joan ia dise.

“Cisa on pote ave un aventura como tu ia ave en la estate pasada?” la xica ia dise.

“Me espera ce Dio escuta tu, car si nos resta asi fante no cosa tra tan multe tempo, mea sania mental va fini.”

Elisenda ia rie e, en acel momento, un xico de la mesma eda como Joan ia apare:

“Grasias a Dio!” el ia dise, e el ia core en dirije a los.

“Me ia pensa ce me va resta asi sola con veas!” el ia dise. “Me es Luca.”

“Me es Joan.”

“E me, Elisenda.”

“Esce tu es la famosa Joan, Joan Tardavenida?” el ia demanda.

“Si,” Elisenda la dise. “Me no ia pote crede lo.”

Un vose de un xica ia interompe la conversa: “Core, Irati. On ave jovenes en esta vileta!”

“Cual? Jovenes!”

Du jemelos xica ia apare en la plaza.

“Alo!” los ia dise a la mesma tempo. “Nos es Irati e Itxaso.”

“Alo!” Elisenda ia dise. “Bonveni a la Vileta de la Marci.”

“An con tota nos no va es sola asi,” Irati ia dise.

Ambos ia es egal: capeles blonde, oios azul, jina corta, camisetas de nuca blanca e sapatos de sporte.

“U!” Luca ia dise. “On ave un bon grupo per ativia diferente en esta estate! Me es Luca.”

“Me, Elisenda.”

“Joan asi,” Joan ia dise.

“Esce tu es…” la du jemelos ia comensa dise.

“Si, si, me es Joan,” el ia responde, alga fatigada.

En acel momento un xico con capeles blonde, oios blu e jina e camiseta ia apare.

“Luca?” el ia dise.

“No…” Luca ia comensa dise. “Eneko?”

“Si!!!”

“Me no pote crede lo,” Luca ia dise, abrasante el.

“Cuando ia es la ves ultima cuando nos ia vide lunlotra?” Eneko ia demanda.

“Uf, me no recorda,” Luca ia responde. E turnante a la otras, el ia dise: “Esta es Eneko.”

“Alo,” Eneko ia cria.

“Alo,” la resta ia responde.

Pos presenta se, Eneko ia dise: “Esce vos sabe ce en la vileta prosima, on ave un mineria abandonada?”

“Ma la mineria es perilosa, no?” Elisenda ia demanda.

“No, lo va es un dia diferente,” Eneko ia responde.

“Me crede ce nos ta pote visita lo e, si nos vide ce lo es alga perilosa, nos pote para e reveni,” Joan ia dise.

“Lo va es un dia interesante,” Irati e Itxaso ia dise.

“Bon, me crede ce nos ave ja un projeta per fa doman,” Luca ia dise, regardante la nubes.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 23 marto 2024 (17:14 UTC).