Capitol 3

A nove oras e un minuto Itxaso e Irati ia apare en la plaza.

“Esce Sua Altia ia dormi ja bon?” Eneko ia demanda sarcasmosa.

“No parla a me,” Irati ia responde. “Me ia espeta Itxaso.”

“Esta es nonumana,” Itxaso ia dise, baliante.

“Bon, aora cuando la Bela Dorminte ia velia, on pote vade,” Joan ia dise.

“O para!” Itxaso ia dise.

La dia ia es alga plu calda ca la dias anterior ma los ia joia la pasea. Irati ia pote vide un coneo entre la eliantos.

“Esce vos ia vide lo?” el ia demanda a la otras.

“No,” los ia responde.

“O, regarda!” Luca ia cria.

“Cual lo es? Cual lo es?” Irati ia demanda, vadente a sua lado.

“O, un gamusino, ma el ia asconde se,” Luca ia dise, e a pos el ia comensa rie.

“Bufon!” Irati ia dise, e el ia colpa el a la dorso.

“Xicos, tal nos va ariva nunca a la castel,” Joan ia dise. E los ia lasa parla e ia comensa pedali denova.

A fini, los ia ariva a la mineria.

“Lo resta segue un pico plu per vide la castel,” Irati ia dise.

“Ala lo es!” Eneko ia cria.

“Lo es bela,” Elisenda ia comenta, perdeda en sua pensas.

“Esce Sua Altia, Irati, trova ce la castel es sufisinte bon?” Luka ia demanda, ajenante se ante Irati.

“O, silenti!” el ia dise.

Los ia resta tra alga minutos, regardante, cuando subita un ruido ia veni de interna de la castel.

“Cual es acel?” Eneko ia demanda.

“Lo pare un elicotor,” Elisenda ia dise.

E vera un elicotor, alga peti, ia sorti de interna de la castel e ia dirije se a la mineria.

“Lo veni asi,” Eneko ia dise.

“Totas a la bosce!” Joan ia cria. E la grupo ia core per asconde en la bosce prosima a la mineria.

La elicotor ia atera prosima a la mineria e alga omes ia sorti de lo per vade a en la interna.

“Cual los xerca?” Luka ia demanda.

“Oro,” Elisenda ia dise.

“Ha! Ha! Multe comica!” Itxaso ia responde.

“Lo no es un broma,” Elisenda ia dise. “Acel mineria ia es conoseda a causa de la oro cual lo ia ave. Lo ia es cluida en la desenio 60 car alga cosa cual me no recorda ia aveni. Aora lo no es vijilada car en esta area on ave apena persones.”

“Esce tu crede ce los fura la oro de la…,” Joan ia comensa dise.

“Regarda mesma lo,” Elisenda ia responde, indicante con sua dito la elicotor, a do la omes ia entra con bolsas plenida de alga cosa.

“Lo ta pote es un otra cosa…” Eneko ia dise.

“Clar, los ia veni a un mineria per pleni bolsas con arena,” Elisenda ia dise.

“Bon, aora nos debe fa alga cosa,” Irati ia dise.

“Cisa lo va es plu bon parla con la ofisia munisipal. Me ia fa lo en la estate pasada,” Joan ia sujesta.

“Ta ce nos rexerca alga plu,” Itxaso ia dise. “E si nos vade a la mineria por vide cual cosa on ave ala?”

La elicotor ia abandona ja la mineria e ia es dirijente se a la castel.

“Aora!” Irati ia dise e el ia comensa vade a la mineria.

“Ta ce nos vade con el,” Joan ia dise, regardante la otras. E el lasa pasa a la otras, prendente a Elisenda de la mano.

“Esce tu ta pote fa otra cosa?” el ia demanda.

“Cual cosa?”

“Me crede ce tu ta debe vade a la ofisia munisipal. Lo va es plu bon ce algun sabe ce nos es asi.”

“E perce tu demanda a me e no a un otra?” el ia demanda.

“Car me crede ce tu va fa multe bon lo…” Joan ia comensa dise, intuinte cual el ia intende dise.

“E esce lo es la sola causa?” el ia continua.

“O, tu ia sabe como me ia regarda tu tra tota esta tempo…” Joan ia dise.

“Tu no sabe asconde tua sentis,” el ia responde, giniante un oculo a el.

“Vade,” Joan ia dise, suriente.

“On ave un conversa pendente,” el ia dise.

“Vade!”

Elisenda ia prende la bisicle e ia vade en dirije a la Vileta de la Marci, en cuando Joan ia entra a la mineria.

“Do tu ia es?” Eneko ia demanda.

“Do tu crede?” Luca ia responde. “Declarante se a Elisenda.”

“Ma, cual cosa tu dise!” Joan ia responde, finjente surprende.

“Esce tu crede ce nos no ia nota como tu regarda el?” Itxaso ia demanda.

“A, la ama, la ama,” Irati ia responde.

“Nos es en un mineria, un pico de consentra,” Joan ia dise por cambia la tema.

“Bon, car aora tota sabe ce Romeo debe reveni vivente a sua Julieta, ta ce on vade atendosa,” Eneko ia dise.

La sinco amis ia continua la via, aidada de la lanterna de sua telefonetas. La via, plu streta a cada paso, ia pare ave no fini. Pos alga minutos, la xicos ia comensa escuta ruidos de la fondo de la mineria.

“Algun es ala,” Itxaso ia responde.

Los ia prosimi e, ascondeda, ia regarda como tre omes estrae oro de la mineria.

“Esta es un mineria nonlegal,” Eneko ia dise.

“E cual nos pote fa?” Itxaso ia demanda.

“Prima, fotos,” Luca ia dise. E los ia fotografi tota.

“Bon, e aora?,” Joan ia demanda.

“Aora vos va dona vosa telefonetas a me,” un vose ia dise pos los.