La site de Xukaijera, en la profondia de Africa, ia concista ja la zonas visina, creante sua propri impero. Acel impero ia uni plu de sento tribus, cada con sua lingua, cultur, relijio, tradisiones; totas diferente, ma totas con un sola rea: la bela Aksujaitema I. La impero Xukaijera ia es diferente de la otras, car la imperor ia es un fem. Par causa de esta, tota la otra res de la renas visina ta proba concista la site e, como responde, la rena Aksujaitema ia concista la rena atacante. Tal asta la dia de oji, en cual la impero es la mas grande de Africa.
Xukaijera, la site capital, ia deveni un sentro de conose, car la rena ia vole ce sua sitadanes ia es la plu sivilida de la tota mundo. Par esta, en loca de spende sua mone en joias e palasios, el ia construi bibliotecas e universias. O, la rena de Xukaijera! La cuantia de manoscritos ce lo ia ave ia es tan multe como sua minas de arjento. La cuantia de injeniores ce la rena ia ave ia es noncontable. La impero ia deveni un tera de pontes e vias, sites con acua en la casas, fontes e asta parces per pasea. La plantas ia aida refresci la temperatures, cual ia es nonsuportable estra la fronteras norde, cual ia limita con un deserto tan estendosa ce nun ia conose sua fini.
Lo ia sembla perfeta, ma, en la fondo de la cor de Aksujaitema I, la tristia ia nidi ja. Su fios ia mori ja par causa de la gera ultima, e el ia es tro vea per ave plu. La fronteras sude, cual ia borda con la mar, ia comensa es atacada par la impero brites e el no ia sabe ce la franseses ta ariva tra la deserto.
Xukaijera ia ateni ja sua culmina, ma Aksujaitema ia sola comensa reali lo.
La jeneral Moris ia ariva ja a la delta de la rio.
“Nos va prosegue la rio asta ariva a sua orijina”, el ia dia a sua soldatos, tota en la nave Stillman, un del naves a vapor la plu moderna del armada brites.
La jeneral Moris ia es un om de tredes-sinco anios, alta, con la pel tre blanca, oculos blu, e un mustax. Sua vestes ia es simil a acel con cual on imajina la dotor Livingston. Educada en la plu bon scolas de England, la jeneral ia deside, de cuando el ia leje la atas de Charles George Gordon en Khartoum, ce el ia vole es como su eroe (ma sin mori en un batalia, si lo ta es posible). El no ia sposi, e el ia es enviada prima a India e a pos a Africa, car la franseses ia concista ja multe teras en la parte ueste e sua mision ia es evita sua estende tra tota Africa ueste.
La Stillman ia segue la curso de la rio sin multe problemes, e la fato ce la viaja ia es tan calmida no ia calma Moris.
“Alga va aveni”, el ia pensa. Ma el no ia sabe ce lo no ia es un ataca a sua soldatos, ma a sua cor.
Acel note, Aksujaitema I ia velia se. Un suo fria ia recore sua fas.
“Me ia vide el, denova”, el ia dise.
Rapida, la rea ia sorti de sua leto e ia vade a la templo, ci ia es unida a la palasio per un coredor secreta. Ala, el ia trova a la prete.
“Tu veni denova par causa de acel sonia?”, el ia dise sin turna per vide a la rea.
“Si”, el ia responde, ajitada. “Me no pote vide sua cara, ma sua manos es blanca como la culminas de la Montes de la Este”.
“Multe ia recore la om per veni asta asi, ma el no sabe cual es sua futur”, la prete ia dise. “Tu va perde tua rena, ma esta no va tristi tu. Ci va fa te perde un rena va dona te joia”.
“Como?”, Aksujaitema ia demanda. “Esta es asurda!”
La prete ia turna, el ia es en transe.
“Ja veni, tu futur ja veni a tu. La venta de la sude-ueste puxa el a tu. Tu pote prepara la soldatos, ma nun va defende tua cor. Dur es la flexa ce va traversa lo, ma sua sabor es plu dulse ca miel. Sola tu sabe si cual el va dona tu es plu valuosa ca un impero”.
El la prete ia cade a tera. Sin conose.
Aksujaitema ia reveni a la palasio e ia parla con la xef de la garda:
“Prepara la soldatos. Avisa a los ci es en la fronteras, algun va veni a nosa rena e nos debe preveni un ataca”.
“Si, mea rea”, el ia dise.
E la xef de la garda ia desapare en la oscuria de la note.
La Stillman ia segue sua via a norde, a la curso alta de la rio.
“Nos debe trova sua fontes”, la jeneral Moris ia dise a sua comandor, la senior Philips.
“E perce nos debe trova los?”, la senior Philips ia demanda.
“Car de ala nos pote dirije nosa atacas contra la franseses, e concista plu teras ca los”.
“E cual aveni si la nativas ataca nos?”, un soldato ia demanda.
“Nos debe es preparada per tota cual ta pote aveni”, la jeneral Moris ia responde.
“Esta savajes pote fa no cosa contra la plu nave de la armada brites”, la senior Philips ia ajunta.
“Me recorda a te”, la jeneral Moris ia ajunta, “ce los es umana como nos”.
“Tu e tua educa cristian!”, la senior Philips ia cria. “Me ta vole vide tu ensircada par acel savajes, si tu va defende te o va continua con tua asurdas”.
E el ia abandona la nivel.
La jeneral Moris ia regarda la sielo.
“Me no sabe cual pote sinifia acel sonia”, el ia pensa. Un vose ia dise el la note pasada: “Tu no va es la mesma pos esta, car la ama va colpa tu tan forte ce tu va cambia e no va es reconoseda entre la tuas”.
“Ama”, el ia pensa. “Ci va fa me asi, en media de esta tera de savajes? Enama un Cleopatra african?” E el ia rie en cuando la Stillma ia prosegue sua via a la norde.
Acel dia la sol ia apare roja en la orizon. Lo ia sembla ce lo ia anunsia la cuantia de sangue ce ta inonda Xukaijera.
La rea Aksujaitema I ia fini dorminte par causa de fatiga e sola la cria de un soldato ci ia entra en sua sala de dormi ia velia el.
“Mea rea”, el ia dise, “un nave de fero ia entra en la note a nosa rena. Nosa soldatos es vijilante lo, ma nos vole sabe cual tu desira ce nos fa”.
“Destrui lo”, el ia ajunta.
E la soldato ia sorti de la sala.
“La problem va fini a esta sera”, el ia dise.
Aksujaitema I ia reveni a sua sonia.
La Stillman ia segue con la mesma rapidia ce lo ia porta en la note.
“Comandor Philips”, la jeneral Moris ia dise. “Esce tu vide la moves en la rivas de la rio?”
“Si”, el ia responde. “Los ia segue nos de cuando nos ia pasa acel punto en la rio”, el ia dise, puntante a retro.
“Prepara la omes, me crede ce los va ataca nos cuando nos ariva a acel loca do la rio turna a destra”, la jeneral Moris ia dise.
La tensa ia pote es sentida par totas en la nave. La omes, preparada con sua fusiles, ia loci se en sua postos, esperante la comanda de la comandor.
Ma, ante ce los ia ariva a la turna a destra, la savajes ia comensa lansa los flexas, lansas e petras.
“Aora”, la jeneral Moris ia dise. “Fusili esta savajes”.
La odor a polvo negra ia estende se tra la nave. La crias de acel omes ia fa ce la rio velia se ma en alga minutos, la silentia ia covre acel loca de la foresta.
“Problem solveda, mi jeneral”, la comandor Philips ia dise a la jeneral Moris.
“Bon, alora nos pote segue asta acel site ce nos pote vide ala”, la jeneral ia ajunta, puntante con sua mano la site Xukaijera.
A acel momento, la soldato ia entra subita a la sala de la rea, veliante la.
“Mea rea!”, el ia cria. “La nave de metal veni asi. Lo resiste la foco e la petras! Nos ia proba destrui lo ma lo ia es nonposible. Los ave arcos con flexas diferente al nosa, plu rapida e plu mortal. Me es la sola soldato ci resta de los ci ia vade ataca los”.
“Oce”, Aksujaitema I ia dise. “Tu pote vade”.
Pos cuando la soldato ia sorti, el ia leva se e ia cambia sua vestes per la corasa reial.
“Jaiksume!”, el ia nomi a sua servor.
“Si, mea rea?”
“Prepara mea caro e dise a la xef de la garda ce el debe prepara la soldatos per defende la capital. Femes e enfantes debe vade a este, gidada para la jeneral Sumiaje”.
“Bon, mi rea”, el ia dise. E el ia abandona la sala rapida.
“Cisa oji la dias de pas de Xukaijera ia ariva a sua fini”, el ia dise ponente se la casco en sua testa.
La Stillman ia comensa canoni la mures de la site, ci no ia resiste la ataca.
La soldatos de Aksujaitema I ia retira se e la brites ia concista la porto en poca tempo.
“Esta es cual gusta me”, la comandor Philips ia dise. “Alga rapida e eficas. Nos va pote bevi la te en acel palasio”.
“No tan rapida, comandor Philips”, la jeneral Moris ia dise. “Nos no sabe cuanto omes on ave asi”.
“Me no cura, me va mata los”, el ia responde, e el ia vade gida la soldatos. “Avansa!”
Vera la comandor Philips ia gusta mata. El ia es un xasor conoseda en la campas de England: la xasa de la volpe es alga ce el ia fa a cada anio. Ma por el, acel campania ia es como la xasa de la volpe. El ia vole mata, e vide sangue core tra acel site.
La soldatos ia fuji a la palasio, do la rea ia refuja se.
“Clui la portas”, el ia dise. “La armas de esta omes es alga cosa contra cual nos no pote luta”, el ia dise. “Nos debe fuji e prepara un contrataca”.
Ma lo ia es nonposible. La palasio ia es ensircada e la comandor Philips e la jeneral Moris ia comensa xerca el tra la salas.
“Si on ave un palasio, on debe ave un re”, la jeneral ia dise. “Me vole el vivente”.
Un sala pos otra, la du ofisiores ia mata la soldatos de la rea, ce ia pote fa no cosa contra la pistoles de la brites.
La comandor Moris ia vade con otra soldatos e ia pote entra en la sala de dormi de la rea. El ia mata la du omes ci ia resta con el, ma Aksujaitema I ia lansa un flexa, la ultima, contra el. La comandor ia usa sua propre soldato como scermo.
El, vidente, ce la rea no ia pote sorti car la palasio ia es tro alta, ia clui la porta.
“Bon, bon, bon, lo sembla ce me ia trova la rea”, la comandor ia dise. “Me crede ce nos va pasa un bon momento”.
La rea, imajinante la intendes de la comandor, ia comensa xerca alga cosa per defende se. El ia colpa la comandor ma esta ia bate el en la fas, fante el cade a tera, aturdida. La comandor ia comensa rompe sua vestes cuando alga om ia puxa el.
“Comandor Philips”, la jeneral Moris ia dise. “Me recorda tu ce tu es ofisior de la armada de Sua Altia la Rea de England, no un vulgar soldato franses”.
“Pardona, mea jeneral, ma el es un savaje e…”
“Me no cura!”, la jeneral Moris ia cria tan multe ce tota la palasio ia silenti. “An con la plu savaje de la omes, tu continua es brites, mostra tua maneras!”
“Si, mea jeneral”, la comandor ia dise.
“Tu pote retira”, el ia dise.
“Si, mea jeneral”, e el ia abandona la sala.
La jeneral ia prosimi a Aksujaitema I, ci ia deveni enamada de el en cuando ambos ia crusa sua regardas. An tal, el ia proba leva se, e ataca el, ma la jeneral Moris ia bloci sua ataca e obliga el senta en la leto.
“Mea seniora, pardona la maneras de mea soldatos,” el ia dise. “Esta no es la forma en cual nos, la brites, trata la femas”.
El ia abri la porta e ia demanda ce la traduor ia veni.
“Demanda el ci es”, la jeneral Moris ia dise.
“Me no nesesa fa lo, mea senior, totas conose el: el es Aksujaitema I, la rea de Xukaijera”.
“La…rea?”, la jeneral Moris ia dise. “E do es la re?”
“Esta rena ave no re”, la traduor ia dise. La impero Xukaijera ia es concistada par el e el ia governa lo sin un sposo”.
“Bon…”, la jeneral Moris no ia sabe multe bon como reata. “Dise a el ce el pote prende sua vestes e ce el va acompania nos a la barco”.
Pos reseta la tradui, la rea ia dise alga cosa a la traduor:
“Me no vade con tu a la monstro de metal, si tu vole fa me alga cosa, me va mori a ante ce cade en desonora”.
“Demanda el esta: ‘Ci es tu?’”
“Me es la rea Aksujaitema I, ci ia concista la impero Xukaijera de un site peti asta crea la impero la plu grande de tota Africa. Ma la ricia de esta tera no es la oro o la diamantes, ma sua popla”, la traduor ia dise a la jeneral.
“Dise esta a el: ‘Si tu es la rea, como tu vole es tratada?’”
“Como rea”
“Tal va es”, la jeneral ia dise a la traduor. “Dise a el ce el pote prende sua cosas e ce debe ave fida en me, tota va es bon”.
La rea, stonada, ia prepara lo plu nesesada de sua proprias e ia segue la jeneral Moris asta la nave Stillman. An si el no ia mostra lo, el ia enama ja acel om, tan jentil. An si el ia destrui sua rena, an si el ia es sola con el en la sala, el ia trata ja el como rea, no como sclavo. No concistor fa acel ma, fante lo, la jeneral Moris no ia sola concista sua rena, ma ance sua cor.
La comandor Philips no ia es contente con la forma en cual la major Moris ia es tratante la rea.
“Perce el trata acel fem como un rea?”, el ia demanda se, sin pote comprende sua condui.
La jeneral Moris ia lasa sua sala de capitan en la nave per la rea, e el ia move a la sala contatante. Cuando el no ia es ala, el ia lasa un soldato vijilante la porta per evita problemes, spesial con la comandor Philips.
La jeneral Moris ia sorti de la nave per comensa dirije la forti de la palasio de Aksujaitema. La obras ia vade multe rapida, car el ia vole evita ce la franseses ia pote ariva e concista la site. A la min los no ia sabe la situa real de la site… o acel el ia pensa.
Pos la concista de Xukaijerqa, la comandor Philips ia envia un telegram a la franseses, afin los sabe ce los ia pote veni concista la site a la engleses. Si, la comandor Philips ia es un trador, vendeda a la Impero Colonial Franses. La governa engles no ia sabe ce sua avo ia vade a England de Bres, e ce sua familia sempre ia es patriota… de Frans. La ora ia es prosima per reveni a sua pais natal con onora.
La dias ia pasa, e la forti de la palasio ia vade tre lenta car la materiales ia debe es traeda de otra colonias engles e transportada tra la rio.
“Me no sabe ca nos va pote fini a tempo”, la jeneral Moris ia dise.
“Ma no es ajitada, jeneral”, la comandor Philips ia dise. “La franseses es distante e los no sabe ce nosa armada ia concista esta site”.
“Nos no sabe acel”, ia es la responde de la jeneral Moris. “Lo va es plu bon es preparada”.
Aksujaitema, ci ia es un fem tre intelijente, ia aprende la lingua de la jeneral Moris e no ia nesesa plu traduor. Cisa, el ia es plu interesada en resta sola con el, car cuando la dos ia es sola, el no ia sabe cual ia aveni, ma el ia es diferente. El ia sempre es un fem secur, el teme nunca a otras, ma con el, el ia senti se sin defende.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 16 maio 2024 (21:21 UTC).