El ia lasa la tas sur la mesa peti cual ia es a fronte de la sejon do el ia es sentada. Pos multe pensa, el no ia ateni un deside clar sur lo cual el ia es pensante per tan multe tempo.
“La eserse de pensa es alga cosa nonfasil”, el ia dise ante bevi alga te denova.
En sua casa, ensircada de sua biblioteca, el ia senti se secur e, supra tota, calmida, lo cual es nesesada per pensa.
Jon no ia es un filosofiste profesal: el no ia vade a universia per studia filosofia, ma el ia leje sempre la libros de filosofia de la biblioteca e el “ia eserse”, en la solitaria de sua salon, acel ativia tan antica como oblidada en la mundo moderna en cual Jon ia vive.
“Car, per pensa, on debe ante conose, e per conose, on debe esperimenta e studia”, el ia dise a se. “Ma, cuando on ateni un responde, cuando on pote dise ‘me ia deside alga cosa’, on debe ata, car si on no ata, la tota eserse de pensa ia es futil”.
Esta ia es cual Jon ia dise, e pos bevi denova sua te, el ia deside dormeta. El nunca ia ata, el sola ia pensa. Cual el no ia sabe, es ce acel dormeta ia es sua ultima: el no ia abri sua oculos denova.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 16 maio 2024 (21:21 UTC).