De totas es conoseda como Espania ia es concistada par la muslimes en la eda medieval. Multe naras raconta sur cual aveni ala ma esta istoria no apare en la libros, en la lejendas, en la cantas o en algun otra loca. No, esta istoria ia resta scriveda en un manoscrito ce ia es gardada en la monceria de San Joan, en la provinse Burgos, en un vileta cual me no recorda como lo ia es nomida… a, si, Grajazuela. Lo es un vileta ce oji es abitada par nun, xef par causa de es locida en un vale a cual on sola pote asede traversante la montes. La monceria de San Joan de Grajazuela ia es construida ala par causa de sua calmia. Me ia visita acel vileta car la monceria ia es multe importante en la eda medieval, par causa de sua biblioteca, cual ia ave tota la obras de autores elinica, cual ia es oblidada en la resta de Europa. Me no sabe como los ia pote manteni acel cuantia de manoscritos, como la monceria no ia es ardeda e mem como lo ia survive la confisca de Mendizábal, ma esta no es importante per la nara ce me trae vos asi. En acel monceria me ia trova la manoscrito cual ia parla de un popla cual ia ave no rena ofisial, ma cual ia vive separada de la renas cristian e muslim. Vos pote pensa ce los ia es iudi, ma no, los ia es cristian, ma alga… spesial. E no, los no ia es protestante car la protestantisme ia apare plu tarda.
La nara no ia ave un titulo ma me ia deside ajunta lo asi. Donce, vos ave asi la istoria de la enamadas de Grajazuela.
En esta manoscrito me vole lasa scriveda la orijina de la vileta de Grajazuela, do un popla libre abita de, me no sabe cuanto, ma me sabe ce mea padre ia nase asi, ance mea avo, e la avo de mea avo. Cisa on pote dise ce Grajazuela ia nase car lo ia debe nase, como un esemplo per la otras ci vive en esta tera bondiseda par Dio, cual la romanes ia nomina Hispania, e la elinicas, Iberia. Aora ce me pensa… si, Grajazuela ia nase cuando la muslimes ia veni de la otra lado de la mar, traente sua relijio nova, sua armas, sua conoses ce los ia prende de otra poplas ci abita an plu distante, como Persia e India.
La combates en la comensa ia es multe intensa ma temprana la plu parte de la popla de Hispania ia aseta los, e mem ia cambia sua relijio car los ia sufri multe con la lutas entre la visigotos. Si, la visigotos. Acel popla germanica ci ance veni asi, e con su monarcia elejal, ia comensa disputa ci ia debe asede a la trono de la rena. Los ia converti un tera bondiseda en un lago de sangue, e par esta la plu parte de abitores ia vide ce con la muslimes los ia pote trova alga pas e stablia.
Grajazuela es locida en la frontera entre la renas cristian e muslim, ma nun conose lo. Lo ia nase pos un batalia, en cual sola du persones ia survive: la jeneral del armada cristian, Roderico; e la prinsesa Ulaja bint Al-Hadasi fia del califa Al-Hadasi (me crede ce sua padre ia es califa, o amir, o alga cosa simil, ma me va lasa el como califa) Al-Mutasid. La cristianes ia ataca un convoia ce ia porta la prinsesa sin sabe ce el ia es ala, los ia sola pensa ce la convoia ia porta armas per aida al invadores muslim en sua concista plu al norde de la frontera. La grupo gidada par Roderico ia es sola ses persones, e sola Roderico ia survive. Cuando el ia mata tota la soldatos, el ia vade vide ci ia es acel person e, pos leva la velo de la prinsesa, ambos ia enama de lunlotra.
Roderico ia porta el a la capital de la rena… cual rena lo ia es? Me no recorda lo, ma bon, el ia porta acel prinsesa a la rena, do la re ia lasa Roderico sposi el. Ulaja no ia converti a cristianisme, ma esta ia es cual la re ia crede e Roderico ia crede. Ma cuando la damas de palasio ia descovre el preante como la muslimes ia fa, la re ia deside condena el a mori. Roderico no ia aseta lo e ambos ia es espulsada. Lo ia es cuando los ia es traversante la frontera de acel rena cuando los, en la mesma loca do la batalia ia aveni, ia trova un via multe peti ci ia porta los a un vale nonconoseda. Ala es do Grajazuela ia nase. Roderico ia labora como mersenario per alga res muslim, e el ia deveni multe rica. Cual el ia fa con sua ricia es compra sclavos cristian a la muslimes e porta los a Grajazuela; e anc el ia servi a alga res cristian e el ia compra sclavos muslim e porta los a Grajazuela. Asi nos, la popla de Grajazuela, es fios de muslimes e cristianes, e nos no cura sur la relijio del persones, ma sur su bon maneras. Acel es la orijina de nosa rena.
Bon, la anios ia pasa e Al-Mutasid, la padre de Ulaja, ia es cavalinte e ia perde se en la monte, trovante la via per vade a Grajazuela. Ala, cuasi morida, ia es trovada par alga abitor e portada a la res Roderico e Ulaja. La rena ia reconose sua padre e lo ia es curada. Al-Mutasid, pos parla con sua fia, ia reconose el e, mem si el ia es joiosa, el no ia ama vide ce el ia deveni ja cristian. Roderico ia lasa la re reveni a sua rena, ma Al-Mutasid ia prende sua soldatos e ataca Grajazuela.
A! Como me pote espresa la dole cual me senti cuando me recorda acel destrui! Sola la monceria ia resta, me no sabe perce. La du res ia es prendeda, ma los ia fa ce la popla ia asconde en la montes per survive. Al-Mutasid ia porta la du res de Grajazuela a sua palasio e el ia proba forsa ce Ulaja deveni muslim denova. El ia proba ce Roderico deveni muslim ma nun ia vole fa lo. On debe dise ce Al-Mutasid ia es un re ce ia lasa a sua renadas ave sua relijio, ma con sua fia el no ia es tan condesendente. Roderico ia es torturada, e Al-Mutasid ia promete lasa el si ambos ia deveni muslim ma nun ia fa lo.
“Tortura me en loca de mea sposo,” Ulaja ia dise, “ma nos no va cambia nosa fida. Vos lasa, padre, vive en tua rena a persones con otra credes, ma los no ave la mesma diretos ce la muslimes. En Grajazuela, nos no ave diferes, car tota es fios de Dio”.
Al-Mutasid, triste, ia lasa a la du enamadas libre e los, librinte alga sclavos e portante los con los, ia pote reveni a Grajazuela, do sua popla ia es joiosa per vide ce los es ancor vive.
No plu muslimes ia vade a Grajazuela, ma la re cristian, con sua soldatos, ia trova la via al rena e ia reconose Roderico. Nosa re ia reseta al re cristian e a sua soldatos como amis, ma cuando la re ia vide la costumes de la popla, el ia deside destrui lo, car, an si los ia es cristian, los no ia segue la rituos catolica esata como los ia debe es segueda. Per evita un masacra, Roderico ia lasa deveni ostaje de la re, ci ance porta Ulaja con los (an si Roderico ia vole evita lo, ma la rena no ia vole lasa sua sposo sola). Tan forte ia es la ama entre los!
Cuando los ia es portada a la castel del re cristian, el ia proba convinse los per deveni cristian (alga cosa strana, car los ia es cristian). Ambos ia prea con sua fronte en la solo (simil a la forma muslim) e esta no ia es gustada par la re. Los ia ave la Biblia traduida a la lingua comun, e esta no es gustada par la pretes. Tal, la re ia deside tortura los, ma la resulta ia es la mesma. Cuando Ulaja ia es torturada, el no ia cria, el no ia plora, el no ia demanda es pardonada. Cuando la re ia vide esta, el ia dise:
“Fem, perce tu no demanda mea pardona? Esce tu es tan orgulosa?”
“Me sola demanda la pardona de Dio, e me sabe ce El pardona mea pecas, car Sua Fio Jesus Cristo ia veni con tal mision. Si El es nosa Mestre, e el ia es torturada, como me va demanda alga cosa cuando me segue Sua pasos?”
Surprendeda par la responde, la re ia lasa los parte (lo cual los ia fa, librinte alga sclavos muslim e portante los con los) e el no ia reveni a Grajazuela.
Per grasia Dio, la res Roderico e Ulaja ia construi la monceria de San Joan, cual ia deveni un loca multe importante par la cuantia de libros scriveda en tota linguas conoseda (arabi, farsi, latina, elinica). La popla de Grajazuela ia developa sua lingua propre, un misca del linguas romanica, germanica e arabi de la sclavos librida cual es deveni sitadanes de esta rena.
La manoscrito fini asi, e me ta vole ajunta ce me no ia trova otra esemplo como esta en tota la eda medieval en Espania. Un loca do persones de orijina diferente ia pote vive sin luta par causa de relijio sembla alga nonposible en acel epoca, ma Grajazuela es la proba ce on pote fa lo, sola si ama vinse.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 16 maio 2024 (21:21 UTC).