Ikutaiju

Me, Andrés de Cisona, ta vole scrive esta testo afin algun pote leje lo en la futur. Me usa mea nom espaniol, car me no crede ce vos va conose me par la nom ce me porta aora, Moahaukärahá (Xef inviada), car esta popla ia crede ce me ia es enviada par sua dios.

Me abita en un loca de la Foresta Amazona, me no va dise esata do ma bon, distante de la rio. Acel rio ce la espanioles ia deside recore per trova “El Dorado”, la site de oro. Me ia es un de la prima, no, me ia es la prima ci ia fa lo, e ma ia trova acel site. No “El Dorado”, no, acel es un lejenda. Ma me ia trova un site construida con oro, do la abitores ia ave tan multe de esta ce per los no ia ave valua. Asi me ia reali ce la oro no ave valua inerente, nos dona esta valua a lo. Ma la plu importante de esta site no es sua oro no, lo es sua popla, sua forma en cual los vive, su forma de pensa. E me pote dise ce la site Ikutaijuk (site orosa du) es la sola ce no ia es visitada par la europeanes, car lo es ascondeda en la profondia de la foresta.

Como me ia fini asi? Bon, si vos vole sabe lo, esta es mea istoria.

I

Ma ia sorti de la porto de Santa Maria, en Huelva. Me ia vade con la concistores espaniol ce ia debe esplora teras nova en la zona de Orinoco, en Venezuela. La viaja asta ariva a America ia es nonsuportable: vertigo, vomiti… Ma final nos ia ariva a acel paradiso.

Nos ia comensa recore la rio Orinoco e, aora e alora, nos ia desende a tera per esplora. En la comensa me no ia fa lo ma, cuando me ia desende a tera, ma ia colpa con un ramo e me ia cade a tera, desmaiada. Mea colegas no ia vide me e me ia es lasada ala, oblidada. Me ia construi un barco peti con la matxete e la lenio ce me ia trova (lo ia es en tota locas) e me ia proba segue los, ma me ia vade tra otra afluente, e me ia fini en la profondia del Amazona. Con la lansa me ia pexa alga pexes del rio ma la corente ia es tan rapida ce me ia recore multe tereno en poca tempo. A la matina de la dia du, me ia trova lo: Ikutaiju. Me ia ariva a la porto de acel site locida en media de la foresta. Ma otras ia ariva ante. Un grupo de savajes ia ariva ja e ia comensa ja ataca la site, matante a tota om, fem e enfante ce los ia trova. Me ia desende ala e, cuando los ia vide me, con mea armur, los ia pensa ce me ia es un dio, e acel grupo de savajes ia reveni a sua balsas e abandona la site.

Sua abitores ia ajena a ante me, e sua re ia dona me sua corona (on va nomi lo tal). Me ia deveni sua re, sua dio, sola car me ia salva los de acel ataca. Acel ci ia es ja la re ia comensa mostra me la site e… o, acel site! Como descrive lo? Como parla de la paradiso en la tera? Lo ia es simple, ma cual bela lo ia es! Sua abitores no ia es sclavos de avaria, e los ia vive con tan multe oro ce los ia pote compra la renas de Espania, Frans, Italia e England con lo e ancora ave plu per prende statos de la Impero Roman Santa. Los ia ave un sistem de iriga, cultiva, construidas, templos. Tota en media de acel foresta nonfinable. Cuanto brilia e, an tal, cuanto simplia per vive!

Los sola porta covresesos e joalas, multe joalas de oro con safir e rubis. Me ia pensa ce los ia es savajes, ma los ia es plu pur ca me, con bon maneras, con un site plu pur ca tota la sites de Europa. Como esta popla ia descovre tota esta? E los mem no ia escuta parla de Nosa Senior! Como los ia pote vive asi?

La prete de Ikutaiju ia deveni mea servor, e el ia es un om estrema intelijente: el ia aprende mea lingua en poca tempo e esta ia aida me per aprende la sua e comprende plu sur sua sivilia. Aparente, on ia ave viletas diversa longo la rio, e la plu ia parteni a otra popla, ce ia concista la viletas de la mesma popla ci ia abita Ikutaiju. Los ia es la ultima e, cuando me ia ariva, me ia salva sua popla de destrui. Par esta, los ia pensa ce me ia es un dio o algun enviada para sua dios. Me ia deside dise no cosa sur me.

Los ia ave un sola templo per la tota dios. Ala, los ia ofre nuris la dios per demanda sua aida e per ne es destruida par los. Los ia ave scultas de oro en acel loca, e los ia puri los a cada dia. A, esta paganes! Me ia comensa cambia sua relijio e me ia dise a la prete ce on no nesesa ave un sculta de cada dio, car sola un dio esiste en realia. La prete, surprendeda par cual me ia dise, ia por me a la templo e ia mostra me la ieroglifos cual ia parla de la comensa de la mundo e la vive de la dios. Me ia dise ce si, ce lo es vera, ma ce me ia desende de la sielos perce, pos un batalia entre la dios, me ia es la sola survivor.

Multe stonada, la prete ia dise a me ce la tota popla ia debe sabe sur esta aveni, e acel note me ia nara acel raconta ce me ia inventa ja a ante. Los ia crede me e me ia deveni la sola dio de Ikutaiju. An tal, me ia demanda ce los no adora me (car la om sola debe adora a Nosa Senior) e me ia comensa ensenia los cual me ia conose de la Scrivedas Santa e acel cosas ce la pretes ia ensenia a nos en la eglesas. Lo es tal como Ikutaiju ia deveni un rena cristian.

II

Pos alga menses, me ia oblida ja la espanioles, la esploras e asta mea site de nase. Me ia es la re de Ikutaiju e me ia aprende de esta popla tan multe cosas ce si mea amis ta trova me, los no ta pote reconose me. Me ia ance ensenia los como developa spadas plu potiosa, plu bon scermos, taticas avansada de gera… Esta ia servi per luta contra la otra nativas, ci ia deside proba concista nos. An tal, la nova ce la “Dio Prometeda de Ikutaiju” ia veni ja ia estende se tra la foresta, e multe de los ia deside no ataca nos.

Acel popla ia ensenia me como naviga con sua canoas e me ia vide monstros en acel rio ce la plu omes en Europa ne ta pote an pensa sur los, como pexes carnivor. Poca a pos, la viletas visina, temosa par causa de me presentia, ia veni per demanda pas, lo cual ma ia aseta. Plu, me ia promove la uni entre tota la poplas ci ia deside deveni la amis de Ikutaiju, e asi me ia evita un gera en acel loca. Asi, Ikutaiju ia estende sua influe longo la rio Amazona, e me ia developa un sistem de comunica entre la viletas de la rio, con canoas bonida, plu rapida, per porta mesajes plu rapida.

Tota la poplas de la viletas ce pasa a es parte de Ikutaiju ia comensa adora me como la unica dio, e me ia proba cambia sua ideas, ma lo ia es nonposible. A la min me ia ateni ce los no ia ajena se cuando me ia pasa a sua lado.

Tota esta me ia fa en cuatro anios, e la site Ikutaiju ia deveni un impero, la plu grande de la Amazona. Me ia fa ce los ia prepara se car me ia sabe ce, como me ia trova los, ance la espanioles ta trova la site, e en acel momento, la gera ta es la solve unica.

La espanioles ia comensa naviga longo la rio e, a la fini, los ia ariva a la frontera de Ikutaiju. En acel momento, la impero ia es formida par cuatro sites, pos lunlotra longo la rio. La prima en cade ia es Bimoati (vila distante), cual la espanioles ia ataca par surprende. Nun ia survive, sola la person encargada de avisa a la vila seguente, Kihijati (vila secur), nomida tal car me ia ensirca lo con mures (de alga petra e oro, car lo es difisil trova multe petra asi) e ia institui un grupo de garda, formida par soldatos con arcos e flexas ci ia pote vide de la mures ci ia prosimi a acel site.

La site ia resiste la atacas prima de la esplorores espaniol. Ma me ia sabe ce los no ia pote resiste multe. Par causa de esta, me ia forti la mures de Ikutaiju e de Aguipetati (vila prosima), la otra vileta de la impero. Cual me ia fa en acel sinco anios, esta es, prepara la popla per acel momento, esplicante lo cual los ta trova, ia fa ce la abitores de la impero no ia teme la espanioles (como ia aveni en otra partes de America) cuando los ia apare, ma ce los ia luta contra los.

Kihijati ia resiste du semanas plu, ma lo ia es nonposible fa plu. En acel tempo, la femes e la enfantes ia es moveda a Aguipetati e me ia invia plu soldatos per aida a la garnison del site. Me ia vade e vide la situa, e en la note, me ia gida la soldatos estra Kihijati. Nos ia prepara alga trapas per la concistores, ma nos ia sabe ce nos no ta pote multe. Me ia sabe ce la fini de Ikutaiju ia prosimi, la fini de acel loca do la persones no ia cura per mone, ricia o fama, ma per bonia, sania, joia, amia e vive un vive bon ia ariva ja.

Me ia comanda crea otra mur ensircante Ikutaiju, e un parte de la femes e enfantes ia es portada a la profondia de la foresta, do me ia fa ja ce los construi un site nova, perdeda, distante an de la rio. La soldatos, e me con los, ia resta en Aguipetati. Ma me no ia vole atende, me ia prepara alga atacas contra la espanioles, e nos ia ateni alga vinses: nos ia fura alga cavalos e mata la otras, nos ia arde alga naves, nos ia catura un soldatos espaniol, con ci me ia parla. El ia es surprendeda par escuta me parla espaniol.

“Ma, perce tu aida esta savajes?,” el ia demanda me. “Tu ta debe dona esta sites a la re de Espania, car tu es su sujeto!”

“Me sola es sujeto de Dio,” me ia responde. “Vade e dise a la capitan ce nos nos vole gera, ce nos nos vole es sclavos de la re de Espania, e ce nos sola vole resta asi, vivente como nos ia vive sempre”.

“Tu es fol!,” el ia cria a me.

Me ia lasa invia el a Kihijati, en la note. Me no sabe cual el ia dise a la otras ma a la dia seguente, cuando la espanioles ia es prosima a Aguipetati, me ia escuta la vose de la capitan disente:

“Andrés de Cisona, sujeto de la re de Espania, me comanda te sede la sites de esta savajes a la re de Espania, tu senior”.

Me ia apare sur la mur e ia responde:

“Me ia vive asi per sinco anios…”

“Sinco anios?,” la capitan ia dise, stonada. “Esta es la ves prima ce nos veni asi”.

“Me ia veni con la prima soldatos a la concista de la Orinoco, e me ia perde en la foresta, desende la rio, e trova esta sivilia”.

“E tu ia deside abita con los?,” la capitan ia demanda. “Esce los es cristian?”

“Me es enseniante los nosa relijio,” me ia responde. “La relijio de ama ce Nosa Senior ia ensenia a nos”.

“Tu no va convinse me,” la capitan ia responde. “O tu sede la site, o tu va arde con tota los”.

“Nos vole pas, ma nos prefere es morida ca es sclavos,” me ia dise.

“Soldatos! Ataca!,” ia es la responde de la capitan.

Me ia previde acel e mea soldatos ia comensa lansa flexas e lansas a la enemis, ma lo ia es en vano. La site de Aguipetati ia arde tra la note, e me ia porta mea soldatos a Ikutaiju, la site ultima de la impero, do tota ia comensa.

Me ia sabe ce la espanioles ta tarda alga tempo en ariva, e me ia profita per envia a tota la resta de femes e enfantes a la otra site ascondeda, con alga omes. Ala me ia sabe ce los nunca ta es trovada.

Me ia continua la gera de gerilia contra acel concistores: los ia debe pasea, car me ia arde tota sua barcos; e lo ia es plu fasil ataca los. Ma Aguipetati ia es prosima a Ikutaiju, e los ia trova final nosa capital. Pos un semana, otra barcos con otra capitan ia ariva ja e, pos sabe lo cual ia aveni a ante, la du capitanes ia uni sua fortias e la tota armada espaniol ia aseja la site orosa.

Me ia sabe ce, pos cuando los ia vide la templo de oro, los no ta para asta concista lo, e esta es lo cual ia aveni: “Oro, oro,” me ia escuta dise la omes a la otra lado de la mures.

“Perce los vole oro?,” un de mea soldatos ia demanda.

“En Europa, la oro ave un valua multe alta, car con lo on pote compra multe cosas”.

“Cual cosas vos compra con oro?”

“Joias, teras, casas, proprias, vestes, produidas de paises distante”.

“Esce en Europa vos no ave produidas propri?,” el ia demanda me.

“Alga cosas, ma no tota. Grasias a la comersia, nos pote ave cosas de otra locas”.

“E perce vos vole tan multe cosas?,” el ia demanda. “Si nos ave multe cosas, nosa casas no va ave spasio per nos. Cual cosa vos fa cuando vos no ave spasio en vosa casas par causa de tota la proprias?”

“On compra otra casa plu grande?”

“E a pos?”

“La prosede comensa denova”.

“Me no comprende vosa forma de pensa”.

“Me debe dise ce, pos tan multe tempo asi, me ance no comprende lo”.

Me ia regarda la sielo: me ia sabe ce la Ikutaiju ta cade en alga dias. Me ia trova la om ci ia es re entre nos, e me ia prosimi el:

“Segue me,” me ia dise.

Cuando nos ia es sola, me ia parla con el:

“Si me cade en la batalia, cual tu debe fa es salva la plu cuantia de omes e vade a la site ascondeda, e no reveni asi”.

“Ma tu es un dio, tu no pote cade en la batalia”.

“Me no es un dio, sola esiste un Dio en la sielo, de Ci me ia parla con tota vos en esta anios”.

“Si, ma acel es otra dio,” el ia dise.

“Acel es la sola dio,” me ia ajunta, “a ci vos debe segue. No segue me”.

Acel om ia es triste, me crede ce lo ia es par causa ce el ia comprende cual ia es mea plano per la dia seguente.

III

La sol ia apare, dirijente sua raios a la templo de Ikutaiju.

“Asta la sol sabe ja ce oji va ave un sacrifia,” me ia pensa.

Me ia prepara la soldatos, e ia divide los en cuatro grupos: un grupo ta ensirca la espanioles e ataca los de a pos, la otra ta resta en la templo, ci ia es en un lado de la site, en la via per fuji, la otra ta es divideda en la diferente vias de la site, per defende lo asta la ultima momento; e la ultima, do me ia es, ia ta es un “grupo de ata rapida,” per move do la otra grupos ta nesesa aida. La re ia es en la grupo de la templo, asi los ta pote ave un gidor si me ta cade.

La espanioles ia comensa usa sua caniones contra la mures: acel caniones nova ia funsiona ancor car la capitan ia pote preveni ce umidia ia fa los nonusosa.

La grupo ci ia ensirca la espanioles ia comensa ataca los, obligante los a divide se en dos: un atacante la site, otra defendente se de la atacas. Esta ia dona tempo a me per prende un de la du caniones ce los ia ave e, locinte lo en dirije a la otra, ia destrui lo. La canion no ia ave plu polvo negra e, donce, ia resta nonusosa. An tal, la mures ia cade ja e la espanioles ia entra en la site. Mea grupo de soldatos ce ia ataca los de a pos ia es ja masacrada.

---

Cuando me ia entra en la site, me no ia reconose lo: casas ardente, lutas e sangue en cada via.

Me ia vide a la du capitanes vade a la templo, e ala me ia dirije mea scuadron.

“Ala es la trador,” un de los ia dise, e puntante me con sua pistol, el ia proba fini con me. Ma me ia lisca con la sangue e cade a tera (e esta ia salva mea vive).

Me ia lansa un cotel a el, ferinte le en un mano e, pos esta, me ia vade aida la antica re, ci ia perde ja la plu parte de sua omes. Me ia gida el estra la templo e, fante le monta un cavalo, me ia colpa la gama afin el ia comensa core e porta le estra la luta.

“Vade e no reveni asi,” me ia dise a el.

Me ia sorti de la templo, cual ia es perdeda, e me ia deside proba reuni la omes per sorti de la site.

“La sita es perdeda,” me ia anunsia. “Ta ce nos vade estra lo e reuni con la otras”.

La soldatos ia divide en du grupos: un ci ta debe fuji, e la otra, proteje la via per cual tota nos ia debe sorti de la site.

Acel momento, me va recorda lo sempre: acel soldatos con sua scermos, fatigada par causa de la tempo ce los ia es lutante, ferida, vidente cade sua site, ancor ia ave fortias per esta mision ultima ce ia es sorti de Ikutaiju. Multe de acel soldatos ia mori defendente acel via afin la otras ta pote fuji. Acel omes, recordada como la “Eroes de Ikutaiju,” ave sua nomes gardada en la memoria de la popla ci ia survive.

Me ia pote sorti de la site, an si me ia vole mori ala, ma la soldatos ia prende me e obliga me vade con los.

La ultima ce me ia fa ante sorti de Ikutaiju ia es prende un lansa e, vidente como un de la du capitanes ia des distraeda lutante, me ia traversa sua corpo con lo. La otra capitan, ci ia es en la sortinte de la templo cuando nos ia es pasante a sua lado, ia reseta me donada ultima, un flexa, cual ia traversa sua jena.

“No mori asi Ikutaiju,” me ia cria a la soldatos ci ia veni con me e, turnante mea testa a un ultima ves de la distantia, me ia plora en cuando me ia dise adio a acel site ce ia ensenia me como la om ta debe vive.