traduida par Chabi
Capitol 17
- Pos parla tal, Jesus ia leva sua oios a la sielo, disente: “Padre, la ora ia ariva: glori tua Fio, afin la Fio glori tu,
- car tu ia dona autoria a el sur tota la omes, afin el dona Vive eterna a totas cual tu ia dona a el.
- Esta es la Vive eterna: ce los conose tu, la sola Dio vera, e tua Enviada, Jesus Cristo.
- Me ia glori tu sur la tera, realinte la labora cual tu ia dona a me per fa.
- Aora, Padre, glori me en tua presentia, con la gloria cual me ia ave con tu ante la esiste de la mundo.
- Me ia revela tua Nom a los ci tu ia separa de la mundo per confida los a me. Los ia es tuas, e tu ia dona los a me, e los ia es fidosa a tua mesaje.
- Aora los sabe ce tota cual tu ia dona a me veni de tu,
- car me ia comunica tua mesaje cual tu ia dona a me: los ia reconose vera ce me ia veni de tu, e los ia crede ce tu ia envia me.
- Me prea per los: me no prea per la mundo, ma por los ci tu ia dona a me, car los es tuas.
- Tota cual es mea es tua e tota la tua es mea, e en los me ia es glorida.
- Me no va resta plu en la mundo, ma los es ancora en lo; e me reveni a tu. Padre santa, proteje par la nom de tua autoria los ci tu ia dona a me, afin los es un, como nos es un.
- En cuando me ia es con los, me ia proteje par tua nom los ci tu ia dona a me; me ia proteje los e nun de los es perdeda, estra el ci ia debe perde se, afin la Scrivedas Santa es completida.
- Ma aora me vade a tu, e me dise esta esente en la mundo, afin mea joia es la joia de los e sua joia es perfeta.
- Me ia comunica tua mesaje a los, e la mundo ia odia los car los no es de esta mundo, como ance me no es de la mundo.
- Me no demanda ce tu estrae los de la mundo, ma ce tu proteje los de la malvolente.
- Los no es de esta mundo, como ance me no es de esta mundo.
- Santi los en la veria: tua mesaje es veria.
- Tal como tu ia envia me a la mundo, me envia los a la mundo.
- E me santi me per los, afin ance los es santida en la veria.
- Me no prea sola per los, ma ance per los ci, par causa de lora mesaje, va crede a me.
- Ta ce totas es un: como tu, Padre, es en me, e me en tu, ce ance los es un en nos, afin la mundo crede ce tu ia envia me.
- Me ia dona a los la gloria cual tu ia dona a me, afin los es un, como nos es un
- – me en los e tu en me – afin los es en unia perfeta e la mundo conose ce tu ia envia me, e ce me ia ama los como tu ia ama me.
- Padre, me vole ce los ci tu ia dona a me es con me do me es, afin los contempla la gloria cual tu ia dona a me, car tu ia ama me ante la crea de la mundo.
- Padre justa, la mundo no ia conose tu, ma me ia conose tu, e los ia reconose ce tu ia envia me.
- Me ia fa ce tua Nom es conoseda a los, e me va continua fa ce lo es conoseda, afin la ama con cual tu ia ama me es con los, e me es ance con los.”