Capitol 14

1. “No es ansiosa. Crede a Dio e ance a me.
2. En la Casa de mea Padre on ave multe salas; si lo no ta es tal, me ta dise a vos. Me va prepara un loca per vos.
3. E cuando me va vade ja e va prepara ja un loca per vos, me va reveni a otra ves per porta vos con me, afin do me es, vos va es ance con me.
4. Vos conose ja la via de la loca do me vade.”
5. Tomas ia dise a el: “Senior, nos no sabe do tu vade. Como nos va conose la via?”
6. Jesus ia responde: “Me es la Via, la Veria e la Vive. Nun vade a la Padre, estra tra me.
7. Si vos conose me, vos va conose ance mea Padre. Ja de aora vos conose el e ia vide el.”
8. Felipe ia dise a el: “Senior, mostra la Padre a nos, e acel va sufisi per nos.”
9. Jesus ia responde: “Felipe, an pos ce me es con vos tra un tempo tan longa, esce tu ancora no conose me? Cualcun ci vide me, ia vide la Padre. Como tu pote dise: ‘Mostra la Padre a nos’?
10. Esce tu no crede ce me es en la Padre e e la Padre es en me? La parolas cual me dise no es meas: la Padre ci abita en me es el ci fa sua atas.
11. Crede me: me es en la Padre e la Padre es en me. Crede lo, a la min, par la atas.
12. Me serti vos ce cualcun ci crede a me va fa ance la atas cual me fa, e ancora plu grandes, car me vade a la Padre.
13. E me va fa tota cual vos demanda par mea nom, afin la Padre es glorida en la Fio.
14. Si vos demanda per alga cosa a me par mea nom, me va fa lo.
15. Si vos ama me, vos va oserva mea comandas.
16. E me va demanda a la Padre, e el va dona un plu Avocato ci va es sempre con vos:
17. la Spirito de la Veria, ci la mundo no pote reseta, car lo no vide e no conose lo. Vos, an tal, conose lo, car lo resta con vos e va es en vos.
18. Me no va lasa vos como orfanes; me va reveni a vos.
19. Pos poca tempo la mundo no va vide me, ma vos va vide me, car me vive e ance vos va vive.
20. En acel dia vos va comprende ce me es en mea Padre, e ce vos es en me, e me en vos.
21. Cualcun ci reseta mea comandas e oserva los, esta es el ci ama me; e el ci ama me va es amada par mea Padre, e me va ama el e me va revela me a el.”
22. Judas (no la Iscariote) ia dise: “Senior, perce tu va revela tu a nos e no a la mundo?”
23. Jesus ia responde: “Cualcun ci ama me debe es fidosa a mea parolas, e mea Padre va ama el; nos va vade a el, e nos va abita en el.
24. Cualcun ci no ama me no es fidosa a mea parolas. La parolas cual vos oia no es de me, ma de la Padre ci ia envia me.
25. Me dise a vos esta cosas en cuando me resta con vos.
26. Ma la Avocato, la Spirito Santa, ci la Padre va envia par mea nom, va instrui tota de vos e va remente vos a tota cual me ia dise a vos.
27. Me lasa a vos la pas, me dona a vos mea pas, ma me no dona a vos como la mundo dona. No lasa ce vosa cores es turbada o asustada.
28. Vos ia oia me disente: ‘Me vade e me va reveni a vos.’ Si vos ta ama me, vos ta joia ce me revade a la Padre, car la Padre es plu grande ca me.
29. Me ia dise esta ante ce lo aveni, afin vos va crede cuando lo aveni.
30. Me no va parla multe plu con vos, car la Prinse de esta mundo es veninte: el pote fa no cosa contra me,
31. ma lo es nesesada ce la mundo sabe ce me ama la Padre e fa como el ia comanda a me. Leva vos, ta ce nos parti.”