Ordinas nonormal

Regardante la discute resente sur la usa de “es…”, asi es un colie de regulas cual me ia colie en un anio pasada:

Reordina de parolas en un frase

Averbos

On pote pone averbos (cual altera la verbo) a multe locas.

• Parolas solitar: normal direta pos la verbo, ma ance a la comensa de la frase o a la fini, si lo no causa problemes. Si ave plu ce un, los pote es separada par virgulas e “e”.
• Formulas preposadal cual opera como averbos: pos la verbo e cualce ojeto, o a la comensa de la frase (segueda par un virgula). Si ave plu ca un, la ordina de los es elejable.
• Proposas averbal: a la fini de la frase, pos la proposa xef, o a la comensa de la frase (segueda par un virgula).
• Cuando a la comensa de la frase, espresas averbal comun ave un sinifia cual indica la state mental de la parlor/scrivor, simil a la engles “hopefully…”.

Ajetivos

La move de ajetivos es multe restrinjeda.

• Parolas solitar: direta pos la nom. si ave plu ce un, los pote es separada par virgulas e “e”.
• Formulas preposadal cual opera como ajetivos: pos la nom e cualce ajetivos.
• Proposas ajetival: pos la nom e cualce ajetivos e formulas preposadal

Sujeto e ojeto

SVO >

• es S ci/cual V O
• es O ci/cual S V
• S es el/lo ci/cual V S
• O es el/lo ci/cual S V

Me ama Maria. >

• Es Maria ci me ama; Maria es el ci me ama.
• Es me ci ama Maria; Me es el ci ama Maria.

Suproposas

Prop Sujunt Suprop > Sujunt Suprop, Prop

• Me va dona lo a tu si tu paia per lo > Si tu paia per lo, me va dona lo a tu.
• Me sabe ce tu fa lo > Ce tu fa lo, me sabe.
• Me ia telefoni el en cuando el ia es comente. > En cuando el ia es comente, me ia telefoni el.

Esta es un bon colie de regulas. La paragraf sur SVO implica la esiste un regula spesial per frases como “es la cade cual mata”. Cisa nos debe ajunta esta regula a la gramatica? Simon

• si tu pensa ce los ta aida.
• Me proposa ajunta la testo seguente entre la paragrafes du e tre esistente en la parte sur verbos sin sujetos:

Cuando la sujeto es un pronom (tipal el, lo, o los) segueda par un proposa ajetival, on pote omete la pronom e move la proposa ajetival a la fini de la frase:

• Es me ci ama Maria. = El ci ama Maria es me.
• Es Maria ci me ama. = El ci me ama es Maria.

Eselente. Posible ance un esemplo con “ce”? jorj

• Nos ave ja la du esemplos en la paragraf du esistente. Nos ta pote ajunta “= Ce me no oblida esta es importante”, ma acel ta es un frase strana e nonrecomendada. E “= Ce tu es coreta pare” ta es an plu strana. Simon
  • pardona - me ia intende “cual”. me sujeste esta, o alga cosa simil: jorj

• Es me ci ama Maria. = El ci ama Maria es me. = Me es el ci ama Maria.
  • Es Maria ci me ama. = El ci me ama es Maria. = Maria es el ci me ama.
    • Es la bal blu cual me perde. = Lo cual me perde es la bal blu. = La bal blu es lo cual me perde.

• Multe bon. “Ia perde” ta es plu probable ca “perde”. Me va ajusta doman la gramatica. Simon

• Simon, me suposa ce on pote ance dise “me es el ci ama Maria”. Personal, me prefere pone “me” ante la verbo “es”. Sunido
• Si A es B, es ance vera ce B es A. Donce ambos de “me es el ci ama Maria” e “el ci ama Maria es me” es bon. Como tu, me ta prefere pone “me” ante la verbo en acel frase, car la resulta es plu clar: par pospone la parte longa “el ci ama Maria”, on preveni ce lo complica la parte prima cual es corta e simple. Ma me vide un difere sutil de asentua entre la du: en “me es el ci ama Maria”, es posible ce an la informa ce algun ama Maria es nova. Si on dise “el ci ama Maria es me”, es plu serta ce on sabe ja ce algun ama el, e ce la informa nova es ce me ama el. (Jeneral, on comensa un frase con un cosa ja sabeda e on ajunta informas nova a pos. Si un testo no segue esta prinsipe, lo pote pare confusante, car la flue de informas nova en la testo cambia se dirije de ves a ves, sin segue la flue linial de la parolas.) La difere entre la du ordinas “A es B” e “B es A” ave alga similia con la difere entre verbos ativa e pasiva (un difere cual no pertine a la verbo “es”). Simon
• La gramatica dona esta esemplo: “no ave pexes en esta dia”. Ce es la difere con “ave no pexes en esta dia”? Sunido
  • la difere es pico. “ave no…” sinifia “ave zero…”, paralel a “ave dudes-oto…”, e asentua la cuantia. “no ave…” asentua la situa, como “ave pexes…”. jorj
  • Si. La difere es mera entre la usa de “no” como un determinante de cuantia e la usa de “no” como un averbo negante. E considera ance “no ave des pexes en esta lago”. (“Lago”, no “dia”: tra un momento, me ia es consernada ce la gramatica conteni un esemplo bizara 🙂 Simon