Jorj
Alo! Me es Jorj – a min en esta vici – o George Boeree, si tu prefere. Me abita en Pennsylvania en la SUA, e es un profesor de psicolojia jubilada. En ajunta a psicolojia, me es interesada en filosofia, cultures antica, e linguas. Mea sposa Judy e me joia vide programes de misterios, spesial los de Britan e Er. Nos ave tre fias e tre netes.
Me ia crea elefen a multe anios a ante, e lo ia es perfetida (si cualce lingua pote es perfetida) par la sujestas de multe otra persones. Ance, me ia contribui multe articles e traduis a nosa vici e vicipedia. An si elefen ia asende e desende en popularia tra la anios, me espera ce cualcun ci leje esta ta aprende la lingua (un taxe multe fasil) e contribui asi, a la vicipedia, o en nosa paje de Facebook.
un letera
alo a tota!
pardona per mea abita de envia mea mesajes tra Simon (e un spesial demanda per pardona de Simon!).
me es en la ospital a esta momento, pos un opera cual lia mea stomaco e me jejuno, en un atenta a dona un vive plu bon - posible un piza. (me ave canser de la pancreas🙁)
me ave sirca un anio per completa mea vive. la vives de mea fem e enfantes (adulte!) e netes (enfantes!) es mea conserna major, natural. me no es relijiosa, ma me suposa ce mea vive pos vive va es multe simil como mea vive ante vive! (me crea ce Mozart ia dise alga cosa como esta - musica e filosofia!)
no plu. esta situa comanda ce me pensa de la futur. me ia discute esta con mea multe bon ami Simon, e el ia acorda ce el pote manaje la elefen.org, e elefen jeneral. la paje de facebook es ja controlada par armando, ma me es serta ce el ta bonveni alga aida de otras.
(o, simon: me gusta multe to ajuntas a definis en la disionaio xercable, pe abita /abita/ v (tr) live in, inhabit, reside in, dwell in, settle in [usa (un loca) como sua casa] « el abita un aparte; el abita en Moscva; el abita en la campania; el abita un caseta en la campania » Nota: La ojeto de abita es tipal un spesie de casa. On usa en per presenta un loca plu jeneral, como un strada o pais.
bela!
Simon ia colie un ecipo de elefenistes - Chris, Isaac, Mixel, e otras - en ajunta a la contribuores de la istoria temprana de lfn. me no pote partisipa multe en esta parte de nosa entreprende, triste. Ance, me no ia reconose ce nos ave un musicist e un album! sua ave un talento per metricali lfn.
(perce no “metrici”?)
me va continua con crea articles per la vicipedia. si algun nesesa aida con lo, me es tua om. (cual remente me: si tu pensa de corta espresas jergin - los ajunta un nota comic, sinsera, familial, umil, e franca a la lingua!
mea consernas sur la futur de la lingua (e si, me espeta ce lo continua es de interesa per anios en la futur - lo es un lingua plasente!) es la mesmas ce me ia ave de la comensa de sua esiste sur la interede:
un sona bela. a veses, sola un cambia de vocales sufise per fa ce un parola es bela (o stonante, si esta es la intende).
un cualia natural, relatada a la linguas romanica (“dise a me: cual dialeto es tua lingua?)
la fato ce lo NO es un lingua romanica
la fato ce lo NO es esperanto, interlingua, loglan, etc. lo es un lingua unica con sua propre intendes.
esperanto: lfn no es aglutinante. usa determinantes, averbos, e preposadas cuando los sufisi!
interlingua: lfn no es xef per siensistes
loglan: lfn, como linguas natural, no debe segue la prinsipes de lojica. lfn nesesa bon comunica. como un de nosa fundores, “the point is to understand and be understood”,
como vos pote vide, la ospital es un loca multe noiante. si vos ave comentas o demandas tu pote envia un eposta, e me va atenta responde.
com amia 😌,
jorj
3 novembre 2020
- Un letera vera emosiante. Multe pensas amiosa a Jorj. — Mixel 2020/11/03 17:12
- Si, ance par me. — Cris 2020/11/03 20:30
Mesajes
(Ajunta tua mesajes asi)