Istoria de elefen
Myaleee demanda si me ave ancora alga de lfn orijinal. Me trove el en un foli peti (en ce me ia scrive un lista de regulas e parolas de esperanto ce me ia leje en un biblioteca en Brisbane, Australia cuando me ave 15 anios, e notas supra Loglan, de la jornal Scientific American), e en un libro supra linguas. Alora, me no ia ave un nom per la lingua.
Multe parolas basal ia es la mesma, o simile a, la parolas en lfn aora! (me es surprende!) - la preposadas e la juntadas, per esemplo. Me ia ave “cosa,” “persona,” “loca,” e “tempo.”
La pronomes ia es mi, ti, li, nos, vos, e los, con un pronom refletante “si.”
Diferes inclui “a” per pasada, “na” per presente, e “sa” per la futur.
Me ia ave alga parolas de elenica: tele, pan, para, apo…
Nonusual ia es “ie” per serta, “be” per probable, e “me” per posable. Simile, me ia “iei” per nesesa, “bei” per debe, e “mei” per permetada.
No ia es “no” ma si ia es “ia!” Esta e acel ia es “to” e “ta.”
Un parola engles entra la vocabula alga veses: la numeros ia es on, du, tri, cuat, fif, ses, set, at, nin, con nul per zero. ia es no parolas per des o sento; on construi numeros grande par seguente la numeros simple: 320 es tri-du-un. Ma la punto de la mil ia es clamada “mil.”
La ordina de parolas ia es como oji, eseta la ajetivos ia es ante la nomes e averbos es ante la verbos. Ma la parolas no cambia con sufises e prefises, sola par loca en la frase. Nota la influe de Loglan:
- li doni - el dona
- la doni - donar, la ata de dona
- la doni omo - la om donante
- li cato - el ata como un gato
- la cato - la gato
- la cato omo - la om ci es como un gato
- li bono - el es bon
- la bono - la bonia
- la bono omo - la bon om
La alfabeta ia es la mesma como oji, ma parolas pote fini con cada letera.
La vocabula ia es multe limitada alora, e ia es prende de la lista de vocabula romanica en un libro par Lancelot Bodmer clamada “The Loom of Language.” Me ave la libro ancora, e multe pajes ave parolas scriveda en peneta!
Per favore no judi sever la limitas de esta comensa - me ia es en lise alora!
On ia nesesa sempre usa un prenom. Los ia es la, un, las, e unas. La plural ia es indica par la pronom.
E on ia nesesa sempre usa un preverbo (a, na, o sa).
Ance, la ajetivo verbal pasiva no esiste. On ia debe usa “se” (si me recorda coreta) ante la verbo, como “la om se colpa…” - la om colpada.
Nota ce la ajetivo verbal ativa no esiste ance. On usa simple la verbo: “la om colpa…” - la om colpante.
Myaleee ia demanda per la progresa de lfn de se orijines asta la interede.
No es multe per dise. En lise, me ia compra libros per studia nederlandes, islansce, e svensce, e ia trova libros supra suomi e otras a la biblioteca. Me no es vera un bon studiante de linguas, spesial de memora de listas de parolas, ce posable es la radis de me interesa en linguas creada!
Cuando me ia vade a universia, me ia studia psicolojia a scola, e linguistica par me mesma. Me ia deveni multe interesada en pijines e creoles, como bislama, creole aitian, e papiamento. Me ance ia studia ance la gramaticas de otra linguas.
En la anios pos universia, me no ia labora con lfn asta sirca 1990 (me no recorda la data esata). Per me plase, me ia retorna a la lista de parolas de la libro de Bodmer. Cuando me ia completa la lista, me ia deside ce la lingua ia es sufisinte bon per junta a la interede (do me ia pone ja articles per me studentes de psicolojia).
Me ia es surprende ce alga persones ia scrive a me per plu informa! Bjorn Madsen ia crea un grupo de Yahoo, e la aventur ia comensa!
Esce la creole tu usa per inspira a franca es vivente aora ? Ce es lia de rede per studia el ?
- me ia referi per la plu parte a la creoles romanica: creol aitian, creol de louisiana, chavacano (de la pilipinas), e papiamento (de aruba, bonair, e curasau). me regarda ance la creoles engles: bislama, pijin, e tok pisin (la tre es multe simile). vade a la wikipedia engles per plu. Jorj
- me ia es lejente “senior de la anelos” cuando me ia es en liseo (sirca 1974) e ia ave la idea de crea lo cual ia deveni lfn. la “sona” de quenya ia influe la fonotatica de lfn (pd la restrinje de consonantes final de silabas e parolas a -f, -s, -m, -n, -l, e -r). ma me ia reteni alga cosas min bela de la linguas romanica, como str- e scr- per redui la cuantia de silabas. an si, lfn sona multe bela, me opina.
- Esta es un revela multe interesante! Me acorda sur la sonas: elefen es entre la linguas la plu bela sonante cual me ia encontra, e esta ia es un de la cualias major cual ia atrae me a lo. Simon
- Me acorda! Guido
- Esta es un revela multe interesante! Me acorda sur la sonas: elefen es entre la linguas la plu bela sonante cual me ia encontra, e esta ia es un de la cualias major cual ia atrae me a lo. Simon
- multe persones gusta italian como un lingua bela. me ia nota ance ce, en italian, la fini de silabas es limitada a la mesma consonantes, ma la silaba final debe fini con un vocale. ma esta tende causa ce la lingua es pronunsiada con un ritmo alga monotonosa repetente. la inclui de alga consonantes final rompe esta ritmo en un modo bela (en me opina, natural!), e permete ce alga asentuas ariva a la silaba final - un cualia bela de franses.
- Si. La truco es eleje la bon consonantes. Lo tu eleje – de la fricantes sin vose e la nasales e licuidas – susede. (A supra, tu ia omete inclui -x.) Simon
Vide ance un gramatica e disionario vea de elefen.