Capitol 2. Returna eterna

A la dia prevideda, me ia asende la monte de la Rocas Roja, paseante laborosa sur la rueta de tera, per retrae mea corpo gastada par la anios. Me ia senta sur acel spesie de banca, ante la mar movente a su.

Como a cada ves, un barcon de vapor de un otra sentenio pasa a via, gidada par la constela Crus del Sude, a dirije de un porto, un vileta de pexores, do lo va pausa.

Como a cada ves, la sicle de mea respira, lentinte de sofla a sofla, remente me de la sicle de la tempos. Me comensa ja persepi la ronrona veninte de la sala de la macinas, a su — cisa la macinas de move eterna cual me ia conseta!

E me reseta la imajes, cual neti: me vide me mesma, vagante en la coredores oscur e vacua de acel barcon, sempre xercante tu.

A cada lado de la coredor, la portes es abrida; an la salas es vacua. Cisa tu es ancora en la sala de permane.

En acel sala, me va senta a tua lado e me va frota cada paje de la palimpsesto de mea vive per rescrive lo plu bon. La coredores resta oscur asta ce me lasa mea corpo vea sur la banca.

Alora, a supra, sur la nivel alta de la barcon, la lus clari: ala, me respira la aira liscante sur la mar, me regarda — e, distante, me vide la riva, la vila blanca, la porto, cual prosimi dulse.

Me sabe, e me felisi: pronto, ala, me vade a retrova tu. Tota vade a recomensa. Me no va perde tu. A esta ves.