Parla a Gettysburg

Ante otodes-sete anios, nosa asendentes ia funda sur esta continente un nasion nova, consepida en libria e dedicada a la idea ce tota persones es creada egal.

Aora nos es engranada en un gera interna grande, probante si acel nasion, o cualce nasion tan consepida e tan dedicada, pote dura longa. Nos encontra sur un campo de batalia grande de acel gera. Nos veni per dedica un parte de esta campo como un loca de reposa final per los ci ia dona sua vives afin esta nasion ta vive. Lo conveni completa ce nos ta fa esta.

Ma, en un sinifia plu grande, nos no pote dedica, nos no pote santi esta tera. La omes corajosa, vivente e mor, ci ia luta asi, ia santi ja lo multe plu ca nos potia povre de aumenta o diminui. La mundo va nota poca e no va recorda longa la cosas ce nos dise asi, ma lo no pote oblida la cosas ce los ia fa asi.

Lo es nos, la viventes, ci debe es dedicada asi a la labora nonfinida cual los ci ia combata asi ia avansa tan nobil. Lo es nos ci debe es dedicada asi a acel taxe restante ante nos ce de acel mores onorada nos ta prende un promete aumentada a acel ojeto per cual los ia dona la mesura plen final de la promete; ce nos ta deside ce acel mores no ia mori futil; ce esta nasion, su Dio, ta ave un nase nova de libria; e ce un governa de la popla, par la popla, per la popla no ta desapare de la tera.