No ave jemelos!

Mea jemelos identica
Los pare es telepatica
No ave tempo per senta
Sola tempo per ostenta
Sesa turba la caneta!
Per ce sempre freta?
Mea enfantes joven
Per favore,
Espeta, espeta, espeta!

“Cual un es cual?”
Demanda sua madre
“No sabe”, me dise
“Me es mera sua padre!”

Mea jemelos identica
Me no vole critica
No ave tempo per retarda
Sola tempo per bombarda
Sesa turba vosa frate!
Perce sempre bate?
Mea enfantes joven
Per favore,
No combate, no combate, no combate!

Los intercambia entre se
Es esta acel o acel esta?
Me no pote dise
Me no pote atesta

Mea jemelos identica
A los me pare antica
No ave tempo per regulas
Sola tempo per sua juas
Sesa es tan ostenta!
Perce como la venta?
Mea enfantes joven,
Per favore,
Lenta, lenta, lenta!

Esce el es Pedro o cisa Paulo
An los no sabe, me pensa
Los ia deveni miscada
Pronto de la comensa

Mea jemelos identica
Un fortuna de jenetica
No ave tempo per sua letos
Sola tempo per confetos
Sesa es tan peca!
Perce ance tan cara?
Mea enfantes joven,
Per favore,
Para, para, para!

Los sempre truci persones
Ci no conose los
Los dise, “No atenta
Distingui entre nos!”

Mea jemelos identica
Atende mea mendica
No ave tempo per noia
Sola tempo per joia
Sesa turba vosa sore!
Perce sempre core?
Mea enfantes joven
Me prea recorente,
Per favore, per favore, per favore!

Me ia dise,
Per favore, per favore, PER FAVORE!