La mofo de la mundo

Me ia es en Puławy con un botaniciste. Nos ia senta prosima a la Templo de la Sibila sur un banca, su un rocon jigante covreda con moses o mofo, cual mea acompanior erudita ia studia tra alga anios.

Me ia demanda: cual cosa interesante el trova en regarda la manxas nonregulada gris, beje, verde, jala o rojin?

El ia regarda me con desfida, ma, convinseda ce el ave un noninisiada ante se, el ia comensa esplica: “Esta manxas, cual tu vide, no es mera un susia mor, ma un colie de esentes vivente. Nonvidable par la oio nuda, los nase, los fa moves cual nos no pote persepi, los sposi, los produi fies, e final los mori.

Lo cual es plu notable es ce los forma un spesie de sosia, cual tu vide asi en forma de manxas multicolorosa. Los cultiva la tera su se per la jeneras seguente, los crese, los coloni locas nonocupada, e los gera lunlotra.

A du anios a ante, esta manxa gris, tan grande como un palma, no ia es plu grande ca un moneta peti. Esta marca gris no ia esiste a un anio a ante, e lo veni de acel manxa grande cual ocupa la culmina de la rocon.

E esta du, la jala e la rojin, gera. A un ves, la jala ia es multe vasta, ma la visina ia espulsa lo lenta e ia prende sua loca. E regarda la verde: vide como la visina gris fa avansas en lo, e cuanto bandas, puntos e bultos gris es vidable sur la fondo verde?…”

“Lo es alga cosa como entre umanas,” — me ia interjeta.

“No, no.” — la botaniciste ia responde. “Esta sosias manca de lingua, artes, siensas, consensia, emosias; en un parola, los manca de almas e cores cual nos umanas ave. Tota cosa asi aveni sieca, macinal, sin simpatias e sin antipatias.”

A alga anios a pos, me ia es denova a lado de la mesma rocon a note e, en la lus de luna, me ia oserva la cambias cual ia aveni en la formas e grandias de la mofos diversa.

Subita, algun ia toca me. Lo ia es mea botaniciste. Me ia demanda ce el senta, ma el ia sta ante me en un modo cual ia bloci la luna, e ia xuxa alga cosa con un vose sin sona.

La Sibila, la banca e la rocon ia desapare. Me ia senti sirca me un brilia pal e un vacua enorme. E cuando me ia turna mea testa a lado, me ia vide un cosa simil a un globo de scola, briliante con un lus debil, tan grande como acel rocon a lado de cual nos ia es a un momento a ante.

La globo ia jira lenta, mostrante sempre rejiones nova. Asi es la continente asian con la penisola peti Europa; asi es Africa, ambos Americas…

Regardante plu atendosa, me ia persepi sur la teras abitada la mesma manxas gris, beje, verde, jala e rojin como sur la rocon. Los ia es composada de un fola de puntos debil, parente nonmovente, ma en realia movente multe pigra: un sola punto ia move a la plu tra un minuto de arco en un ora, e no en un linia reta, ma como si lo vasila sirca sua propre sentro de move.

La puntos ia junta, ia divide, ia desapare, ia apare sur la surfas de la globo; ma tota esta fenomenos no ia merita atende spesial. Sola la move de manxas intera, cual ia diminui o ia aumenta, ia apare en nova locas, ia permea lunlotra o ia es espulsada de sua locas, ia importa. Entretempo, la globo ia continua jira, e lo ia pare a me ce lo ia fa sentos de miles de jiras.

“Esce esta debe es la istoria de umanas?” — me ia demanda a la botaniciste stante a mea lado.

El ia anui sua testa per confirma.

“Bon, ma do es la artes, la sabe?…”

El ia surie triste.

“Do es consensia, ama, odia, desiras?…”

“Ha! ha! ha!…” — el ia rie cuieta.

“En un parola, do es la almas e cores umana asi?…”

“Ha! ha! ha!…”

Sua condui ia ofende me.

“Ci es tu?…” — me ia demanda.

A acel momento, me ia es denova en la jardin, a lado de la rocon, de cual sua manxas nonformida ia bani se en la brilia de la luna.

Mea acompanior ia desapare, ma me ia reconose ja el par sua burla e sua melancolia.