Me es la lingua

Me es la lingua
en cual xuxa la voses de la pasada,
en cual, ascondeda, es la profondia de tua cultur.

Me, oblidada par totas,
ancora xuxa a tua cor,
la recordas de la pasada,
un pasada oji odiada,
de cual totas vergonia.

Ma tu, escuta mea vose,
fa tua mea parolas
e luta per me,
parlante me,
lejente me.

Recorda, recorda la dias
en cual tua asendentes
ia construi tua dia de oji,
acel dias cual oji nun recorda,
ma tu, con mea parolas,
memori la vinses e la defetas,
la dias en cual tu ia debe silenti,
en cual tu no ia es libre.
Recorda la dias en cual
tu ia debe xerca tua tera,
en cual tu ia debe fuji
per es libre e vive tua vive
e pote parla me.

Ta ce acel recorda fa
ce tu no abandona mea parolas,
ce tu no vergonia de mea vocabulo,
ce tu no cambia me per otra,
plu estendeda, plu “usosa”;
car me es la lingua de tua cor,
la lingua en cual tua asendentes
ia deside lasa la pasada scriveda,
afin lo ariva a la futur
e aida tu recorda
ce los ia debe xerca un tera
per adora sua dio,
per vive sua cultur,
sin vergonia,
e per es libre parlante
mea parolas.