Marvin e la materas

Un otra mundo, un otra dia, un otra leva de sol.

La ago la plu magra de la lus prima matinal ia apare silente.

Alga biliones de triliones de tones de nucleos esplodente de idrojen supracalda ia asende lenta supra la orizon e ia susede aspeta peti, fria, e alga umida.

On ave en cada matini un momento cuando la lus flota – on ave la posiblia de majia. La universo pausa sua respira.

La momento ia pasa como normal sur Scuornxelo Zeta, sin avenis.

La nebleta ia teni la surfas de la pantanes. La arbores de pantan ia es gris par lo, la juncos alta ia es nonclar. Lo ia pende nonmovente como un respira pausada.

No cosa ia move.

On ia ave silentia.

La sol ia luta debil con la nebleta, ia atenta ajunta asi alga caldia, lansa ala alga lus, ma lo ia es clar ce oji va es denova mera un plu traversa laborosa de la sielo.

No cosa ia move.

Denova, silentia.

No cosa ia move.

Silentia.

No cosa ia move.

Multe comun sur Scuornxelo Zeta, dias intera pote pasa en esta modo, e vera, esta va es un de los.

Pos des-cuatro oras, la sol ia afonda desperosa su la orizon oposante con un senti de labora completa perida.

E pos alga oras, lo ia reapare, ia reti sua spalas, e ia comensa denova asende la sielo.

A esta ves, an tal, alga cosa es aveninte. Un materas es encontrante un robot.

“Alo, robot.” – la materas dise.

“Blaaa.” – la robot dise, e continua la cosa cual el fa, cual es pasea multe lenta sirca un sirculo multe pico.

“Felis?” – la materas dise.

La robot pausa e regarda la materas. El regarda lo con un confonde curiosa. Clar, lo es un materas multe stupida. La materas reregarda el con oios larga.

Pos un pausa de un longia cual el ia calcula a des desimales como esata la plu probable per espresa un odia jeneral per tota cosas materasin, la robot continua pasea a sirca en sirculos streta.

“Nos ta pote fa un conversa.” – la materas dise. “Tu ta gusta?”

Lo es un materas grande, e probable de cualia alga alta. En nosa eda, on fabrica vera poca cosas, car en un universo infinita grande como, per esemplo, lo en cual nos abita, la plu de la cosas imajinable – e multe cosas cual on ta prefere no imajina – crese en alga loca. On ia descovre resente un foresta en cual la plu de la arbores produi como frutas turnavises de cliceta. La sicle de vive frutal de un turnavise de cliceta es alga interesante. Pos es prendeda de la arbor, lo nesesa un caxeta oscur e polvosa en cual lo pote reposa nonturbada tra anios. Alora, a alga note, lo cambia subita, rejetante sua casca esterna cual desintegra a polvo, e emerji como un ojeto metal, peti e intera nonidentifiable, con un flanje a cada fini, un spesie de cresta, e un spesie de buco per un vise. Cuando on trova esta, on lansa lo a via. Nun comprende como la turnavise pote benefica de esta. On suposa ce la natur, en sua sajia nonlimitada, labora ancora a la problem.

Simil, nun comprende vera como materases pote benefica de sua vives. Los es bestias grande, amin, e plen de molas poxida, cual fa vives cuieta e privata en la pantanes de Scuornxelo Zeta. Multe de los deveni caturada, masacrada, secida, vendeda, e usada per letos. Nun de los pare es ofendeda par esta, e tota de los ave la nom Zem.

“No.” – Marvin dise.

“Mea nom” – la materas dise – “es Zem. Nos ta pote discute alga la clima.”

Marvin pausa denova en sua pasos fatigada e sirculo.

“La rosio” – el oserva – “ia cade a esta matina con, clar, un pum spesial repulsante.”

El recomensa sua pasea, como si esta relasa conversal ia inspira el a altias fresca de sombria e depresa. El fa ostinosa sua pasos pesosa. Si el ta ave dentes, el ta tensa aora los. El no ave. El no tensa. La pasos mesma espresa tota.

Tra un tempo, la materas frambula. Esta es un ata cual sola materases cual vive en pantanes pote fa, e per esta razona la parola no es plu comun usada. Lo frambula en modo alga compatiosa, movente un cuantia notable de acua par la ata. Lo sofla encantante alga bolas a supra tra la acua. Sua bandas blu e blanca sintili tempora su un raio subita de sol debil cual ariva nonprevidable tra la nebleta, e la bestia bani en esta per un momento.

Marvin fa pasos.

“Tu ave alga cosa en tua pensas, lo pare.” – la materas dise, flaupin.

“Plu ca tu pote an imajina.” – Marvin sombri. “Mea capasia per ativia mental de tota spesies es tan nonlimitada como la estende infinita de la spasio mesma. Estra, natural, mea capasia per felisia.”

Paso, paso, el fa.

“Mea capasia per felisia” – el ajunta – “ta pote es contenida en un caxa de fosfores, sin estrae prima la fosfores.”

La materas gluvra. Esta es la sona fada par un materas vivente cual abita un pantan, cuando lo es profonda emosiada par un raconta de trajedia personal. Si on crede La disionario Masimegal ultracompleta de tota linguas conoseda, la parola pote sinifia ance la sona fada par la Baron Grande Sanvalvuac de Olopo pos descovre ce el ia oblida la aniversario de sua sposa a la anio du en segue. Car sola un Baron Grande Sanvalvuac de Olopo ia esiste an, e el ia sposi nunca, on pote usa la parola sola con un sinifia negativa o ipotesal, e on ave un grupo sempre cresente de persones ci opina ce La disionario Masimegal ultracompleta no merita la fola de camiones nesesada per transporta sua edita microconservada. Alga strana, la disionario omete la parola flaupin, cual sinifia simple “simil a un flaupa”.

La materas gluvra denova.

“Me sensa un descoraji profonda en tua diodos,” – el velui (per la sinifia de la parola velui, ta ce tu compra un copia de La parla pantanal de Scuornxelo a cualce boteca de libros nonvendable, o, per alternativa, compra La disionario Masimegal ultracompleta, car la Universia Masimegal va es deletada per libri se de lo e regania multe spasios valuada per parci veculos – “e esta tristi me. Tu debe es plu materasin. Nos fa vives cuieta e retirada en la pantan, do nos es contente de frambula e velui e regarda la moia en un manera vera flaupin. Alga de nos es matada, ma tota de nos ave la nom Zem, donce nos sabe nunca ci, e a esta modo nos manteni la gluvras a un grado minima. Perce tu pasea en sirculos?”

“Car mea gama es fisada.” – Marvin dise simple.

“Lo pare a me” – la materas dise, oservante compatiosa la gama – “ce lo es de un spesie vera povre.”

“Tu parla coreta.” – Marvin dise. “Lo es tal.”

“Vun.” – la materas dise.

“Suposable.” – Marvin dise. “E me suposa ance ce tu trova ce la idea de un robot con un gama artifisial es alga comica. Tu debe fa la raconta a tua amis Zem e Zem cuando tu vide los a pos. Los va rie, si me conose los – e natural, me no conose los, estra cuanto me conose tota formas de vive organal, per dise a un grado multe plu bon ca me ta desira. Ha, ma mea vive es no cosa plu ca un caxa de vises spiral.”

El piafa denova en sua sirculo pico, sirca sua palo de gama cual jira en la fango ma pare en otra modos es fisada.

“Ma perce tu pasea constante en sirculo pos sirculo?” – la materas dise.

“Sola per sulini la problem.” – Marvin dise, e continua, en sirculo pos sirculo.

“Lo es ja bon sulinida, mea ami cara.” – la materas flumbi. “Ja bon sulinida.”

“Sola un plu milion de anios,” – Marvin dise – “sola un plu milion rapida. Alora, cisa me va proba un reversa de dirije. Sola per diversia, tu comprende.”

Profonda en la plu internas de sua molas poxida, la materas pote senti ce la robot desira forte ce on demanda a el tra cuanto tempo el pasea ja en esta manera futil e noncompensada – e con denova un flumbi cuieta, la materas fa la demanda.

“O, alga plu longa ca un milion e un dui, alga plu.” – Marvin dise casual. “Demanda esce me deveni noiada de tempo a tempo – vade, demanda a me.”

La materas fa la demanda.

Marvin iniora la demanda, e fa sola sua pasos con un asentua ajuntada.

“Me ia fa un parla formal a un ves.” – el dise subita, e sin pertine parente. “Cisa tu no vide direta perce me refere a la tema, ma esta es car mea mente opera tan estracomun rapida, e me es, prosima estimada, tredes bilionuple plu intelijente ca tu. Me va dona un esemplo a tu. Pensa a un numero, cualce numero.”

“Em, sinco.” – la materas dise.

“Falsa.” – Marvin dise. “Tu vide?”

La materas es multe impresada par esta, e lo persepi ce lo es en la presentia de un mente alga notable. Lo salsasa tra tota sua longia, stimulante ondetas peti a moves tra sua stange basa e algosa.

Lo gope.

“Nara” – lo speroni – “sur la parla cual tu ia fa – me anela oia lo.”

“On ia reseta lo en un modo multe mal” – Marvin dise – “per razonas variosa. Me ia pronunsia lo” – el ajunta, pausante per fa un jesti torpe de un spesie jibada par un braso no vera bon, ma par la braso cual es plu bon ca la otra, cual es descorajinte soldada a sua lado sinistra – “ala, a distantia de sirca un cilometre.”

El fa la plu bon cual el pote per indica la dirije – e el vole evidente clari plen ce esta es la plu bon cual el pote – tra la nebleta, ultra la juncos, a un parte de la pantan cual aspeta esata la mesma como tota otra partes de la pantan.

“Ala.” – el repete. “Me ia es alga selebrada a acel tempo.”

Stimulas saisi la materas. Lo ia oia nunca sur parlas formal pronunsiada sur Scuornxelo Zeta, e serta nunca par selebradas. Acua salpica de lo en cuando un vibra glera longo sua dorso.

Lo fa un cosa laborosa cual materases fa sola a veses estrema rara. Coliente cada peso de sua fortia, lo reti sua corpo retangulo, forsa esta a un asende en la aira, e manteni lo ala per alga secondos de trema, en cuando lo regarda difisil tra la nebleta e ultra la juncos a la parte de la pantan cual Marvin ia indica – oservante, sin delude, ce acel parte es esata la mesma como tota otra partes de la pantan. La labora es tro grande, e lo fladre a su en sua stange, deluviante Marvin con fango, mos, e malerbas apestante.

“Me ia es selebrada” – Marvin zumbi triste – “tra un tempo corta, car me ia evade, en modo miraclosa e amarga odiada, un fortuna cuasi tan bon como la moria, en la cor de un sol incandesente. Tu pote divina par mea state” – el ajunta – “la grado par cual me ia evade apena lo. Me ia es salvada par un mercator de metal resiclable, imajina lo. Me sta asi, con un serebro tan grande como … ma lo no importa.”

El fa pasos savaje per alga secondos.

“El ia es la person ci ia repara me con esta gama. Despetable, no? El ia vende me a un Zo Mental. Me ia es la esibida xef. On ia obliga me a senta sur un caxa e raconta mea istoria a persones ci proposa ce me debe felisi e pensa positiva. ‘Surie per nos, robot peti.’ – los ia cria a me. ‘Fa un cacareta.’ Me ia esplica a los ce, per pone un surie sur mea fas, on ta nesesa a la min du oras en un laboreria con un clave de torcas – e la fola ia responde multe bon a esta.”

“La parla.” – la materas insiste. “Me anela oia sur la parla cual tu ia fa en la pantanes.”

“On ia construi un ponte tra la pantanes. Un iperponte de siberstrutur, longa de sentos de cilometres, afin camiones ionida e barcones de carga va pote traversa la pantan.”

“Un ponte?” – la materas curcuera. “Asi en la pantan?”

“Un ponte,” – Marvin confirma – “asi en la pantan. La intende ia es ce lo va revive la economia de la Sistem de Scuornxelo. On ia consuma la economia intera de la Sistem de Scuornxelo en construi lo. On ia invita me per abri lo. La foles povre!”

Lo comensa pluve alga – un salpica delicata lisca tra la nebleta.

“Me ia sta sur la plataforma. Tra sentos de cilometres ante me, e sentos de cilometres pos me, la ponte ia estende.”

“Esce lo ia brilia?”

“Lo ia brilia.”

“Esce lo ia aspeta merveliosa tra tota sua longia?”

“Lo ia aspeta merveliosa tra tota sua longia.”

“Esce lo ia estende como un filo de arjento en la profondas nonvidable de la nebleta?”

“Si.” – Marvin dise. “Tu vole oia esta raconta?”

“Me vole oia la parla cual tu ia fa.” – la materas dise.

“Esta es lo cual me ia dise. Me ia dise – ‘Me ta vole declara ce la abri de esta ponte es per me un plaser, un onora, e un benefica multe grande, ma me no pote, car tota mea sircuitos de menti es nonoperante. Me odia e despeta cadun de vos. Me declara aora ce esta siberstrutur nonfortunosa es abrida a la maltrata nonpensante par tota la persones desbridida ci va traversa lo.’ E me ia lia me a la sircuitos de abri.”

Marvin pausa, recordante la momento.

La materas flomi e glera. Lo frambula, gope, e salsasa, e fa esta ultima en modo spesial flaupin.

“Vun.” – lo verfa final. “E esce la aveni ia es gloriosa?”

“Relativa gloriosa. La ponte intera, longa par mil cilometres, ia plia spontan sua arcos sintilinte e ia afonda plorante en la fango, prendente con se cadun.”

A esta punto en la conversa, on ave un pausa triste e temable, en cual, nonespetada, lo pare ce sento mil persones dise “ua” e un ecipo de robotes blanca desende de la sielo como semes de denteleon vagante sur la venta en un posa sever militar. Tra un momento subita e violente, tota de los es ala en la pantan, torsente a via la gama falsa de Marvin, e pos acel los desapare denova en sua barcon, cual dise “uf”.

“Tu vide la spesie de cosas contra cual me debe luta?” – Marvin dise a la materas gabelante.

Subita, pos un momento, la robotes reveni per un plu ata violente, e pos sua parti a esta ves, la materas es solitar en la pantan. Lo fa frambulas de stona e alarma. Lo teme tan multe ce lo lurgula cuasi. Lo reti se per vide ultra la juncos, ma on ave no cosa per vide, no robot, no ponte briliante, no barcon, ma sola plu juncos. Lo escuta, ma la venta trae no sona plu ca la voses aora bon conoseda de la etimolojistes partal bobo ci clama a lunlotra supra la fango sombre.