La viaja

La barcon de Picton va parti a des-un e un dui. La note es bela, temperada, stelosa, an tal cuando los sorti de la taxi e comensa vade a su sur la Doca Vea cual protende a via a la porto, un venta cuieta movente de la acua fronsida su la xapo de Fenella, e la xica leva sua mano a la xapo per manteni lo. En la Doca Vea lo es oscur, multe oscur; la cabanas de lana, la camiones de boves, la grus cual sta tan alta, un locomotiva peti e truncin, tota cosas pare es taliada a via par la oscuria solida. Asi e ala sur un pila ronda de lenio, cual es como la tronceta de un xampinion, negra e jigante, ala un lampa es pendeda, ma esta pare como teme desenrola sua lus timida tremante a tota acel negria; lo arde mol, como per se mesma.

La padre de Fenella presa per avansa con paseas rapida e nervosa. A sua lado la ava de Fenella luta a longo en sua jacon asustante negra; los vade tan rapida ce Fenella debe aora e alora fa un salteta nondiniosa per manteni se con los. Como ance sua bagaje bandada a un salsix ordinada, Fenella porta la parapluve de sua ava, fisada a el mesma, e la manico, cual es un colo de sinie, dona continuante picas peti agu a la spala de la xica, como lo ta vole ce el freta… Omes, con sua xapetas traeda a su, con sua colares turnada a supra, penduli; alga femes, tota de los amortida, freta entre los; e un xico peti, videda sola par sua brasos peti negra cual mostra se de su un xal de lana blanca, es coler arancada a ante, entre sua padre e madre; el pare como un bebe de mosca ci ia cade en crema.

Alora, subita, tan subita ce Fenella e sua ava ambos salta, de pos la cabana de lana la plus grande on oia Miao-u-u-u-U-U! On vide ance un trasa de fuma cual pende a supra.

“La denunsia prima”, la padre dise corta, e a esta momento los pote vide la barcon de Picton. Situada a lado de doca, tota cadenida, tota ensircada par lampas ronda con lus de oro, la barcon de Picton pare como si lo ta es plu preparada per naviga entre la stelas ca sur la mar fria.

Umanas freta a longo la plance de embarca. La ava es la prima ci vade, a pos vade la padre, a pos Fenella. Los ave un paso alta a su sur la nivel de barcon, e un marinor vea en sueter, stante prosima, dona sua mano, seca e dur, a Fenella. Aora los es ala; los pasea a via de umanas fretante, e cuando los sta su un scalera peti de fero cual gida a la nivel alta, los comensa dise adio.

“Ala, mama, tua bagaje es ala!” la padre de Fenella dise, e dona un otra salsix bandida a la ava.

“Grasias, Frank.”

“E tu ave la biletas de cabina en securia?”

“Si, mea cara.”

“E la otra biletas?”

La ava sensa per los en sua ganto e mostra la apicos a el.

“Si, coreta.”

La padre sona sever, ma Fenella, ci regarda zelosa el, vide ce sua padre pare fatiga e triste. Miao-u-u-u-U-U! La denunsia du ruido supra la testas, e un vos como un plora cria: “Alga plu per la plance de embarca?”

“Tu va dona mea ama a papa!”, Fenella vide la labios de sua padre dise. E la ava responde multe ajitada: “Natural, me va fa lo, mea cara. Vade aora, tu debe parti! Vade aora, Frank! Vade aora!”

“Tota es bon, mama. Me ave tre plu minutos.” Per sua surprende Fenella vide ce la padre prende la xapo a su. La padre abrasa la ava e junta el a se. “Ta ce Dio bondise tu, mama!”, Fenella oia.

E la ava pone sua mano, con la ganto de filos negra cual es a tra gastada sirca la dito de anelo, contra la jena de sua fio, e el sanglota: “Ta ce Dio bondise tu, mea propre fio corajosa!”

Esta es tan asustante ce Fenella turna sua dorso a los, engoli un ves, du ves, e grima asustante a un stela peti verde sur la culmina de un masto. Ma el debe turna se denova, car sua padre va vade.

“Adio, Fenella. Es un bon xica!”, La mustax, fria e moia, de la padre brosi la jena de Fenella. Ma Fenella saisi la suprapones de la jacon de el.

“Como longa me va permane?” la fia xuxa ansiosa. La padre no vole vide el. El secute jentil la fia a via e dise: “Nos va vide lo. Asi! Do es tua mano?” El presa alga cosa en la palma de Fenella. “Ala es un xiling per caso.”

Un xiling! El va serta vade a via per sempre! “Papa!”, Fenella cria. Ma la om es ja a via, esente la ultima, ci ia lasa la barcon. La marinores pone sua spalas a la plance de embarca. Un enrola enorme de corda negra move volente tra la aira e cade “pum!” sur la doca. Un campana sona, un denunsia xilia. Silente la doca negra comensa fuji, lisca, borda a via de los. Aora los vide acua crasente a entre. Fenella tensa per vide con sua tota potia. “Esce padre es la person ci turna?” - “o ci saluta?” - “o ci sta solitar?” - “o ci vade nonacompaniada a via?” La banda de acua cresce plu larga, plu oscur. Aora la barcon de Picton comensa pivote stable, indicante a la mar. Regarda plu es futil. La sola cosas videda es la poca puntos de lus e la fas de la orolojo de la site, e alga plu puntos de lus sur la montes oscura.

La venta frescinte aranca la faldas de Fenella; el vade a retro a sua ava. A un lejeri de Fenella, sua ava pare no ancora triste. La fem ia pone la du salsixes de bagaje sur lunlotra, e es aora sentante sur los, la manos crusada, sua testa pico a un lado. El ave un regarda, intendosa e luminosa, sur sua fas. Alora Fenella vide ce la labios de la fem move, e el pensa ce la ava prea. La fem vea dona un inclina luminosa con sua testa como per dise ce la prea va fini pronto. La fem dejunta sua manos, suspira, crusa los denova, curvida a ante, e a fini dona se un secute cuieta.

“E aora, enfante,” el dise ditinte la cordas de sua capeta, “me pensa ce nos debe esamina nosa cabinas. Resta prosima me, e atende afin no lisca!”

“Si, ava!”

“E atende ce la parapluves no es saisida par la reles de scalera. En mea viaja asi me ia vide un parapluve bela cual ia rompe rapida a du.”

“Si, ava!”

Figures oscura de omes pigri contra la reles. En la arde de sua pipas on vide un nas, o la apico de un xapeta, o un duple de suprasils parente stonada.

Fenella regarda a supra. Alta en la aira, un figur peti, con sua manos puxada en la poxes de sua jaceta, sta regardante la mar. La barcon osila sempre pico, e la xica pensa ce ance la stelas osila. Aora un manejor pal en un jaca de lino, manteninte un platon en altia sur sua palma de mano, fa un paso a estra de un porte luminada, e pasa rapida los. Los vade tra la mesma porte. Atendente, a supra de la paso alta de lata a sur la tapeteta de cauxo, e alora a su con un desende tan presipe ce la ava debe pone ambos pedes sur cada paso, e Fenella teni la rel umida e oblida tota diseda de la parapluve con la colo de sinie.

A basa la ava sesa; Fenella teme peti ce la fem ta prea denova. Ma no, la ava sesa mera per tira a estra la biletas de cabina. Aora los es en la salon. Esta es briliante lusosa ma sofocante; la aira malodori de pinta, e osos de costeletas ardeda, e cauxo. Fenella vole ce sua ava ta vade a ante, ma la fem vea no pote es fretada. Un sesto jigante con sanduitxes de jamon catura sua oios. El vade a los e toca delicata un de los a alta con sua dito.

“Cuanto custa la sanduitxes?” el demanda.

“Du-sentim!”, un manejor mas noncortes cria batente un cotel e un force a su.

La ava pote apena crede lo.

“Du sentimes per cada?” el demanda.

“Si”, dise la manejor e ginia a sua camerada.

La ava mostra un grima peti, stonante. Alora el xuxa apical a Fenella: “Tal malvole!”

E los naviga a via a la porte plu distante, e longo un coredor con cabinas a ambos lados. Un manejor fema, multe amable veni per encontra los. El es vestida intera en blu, e sua colar e mangas es fisada par botones grande de lata. Lo pare ce el conose bon la ava.

“Alo, seniora Crane”, el dise desclavinte la lavabo per los. “Nos ave tu denova. Lo no es comun ce tu permete tu un cabina.”

“No,” dise la ava “ma a esta ves lo es la pensosia de mea fio, cual -”

“Me espera – ”, la manejor comensa. Alora el turna se e ave un regarda longa e lamentosa a la negria de la ava, e a la jaca e falda de Fenella, ambos negra, a sua blusa negra e la xapo con un rosa de crepe.

La ava inclina sua testa. “Lo ia es la vole de Dio”, el dise.

La manejor clui sua labios e, enspirante profonda, el pare crese a parla.

“Cual me dise sempre es,” la fem dise, como si lo ta es sua propre trova, “plu temprana o plu tarda cada de nos debe vade a via, esta es serta.” El pausa. “Aora, esce vos vole ce me va trae alga cosa, seniora Crane? Un copa de te? Cisa ofre alga caldinte a vos es aora nonusosa?”

La ava nega con testa. “No cosa, grasias. Nos ave alga biscotos, e Fenella ave un multe bon banana.”

“Donce me va visita vos plu tarda”, la manejor fema dise e vade a via cluinte la porte.

La cabina es multe peti! Fenella senti como cluida en un caxa con sua ava. La oio ronda oscura supra la lavabo sintili stupida a los. Fenella senti timida. El sta contra la porte, continuante teninte sua bagaje e parapluve. Esce los va desvesti se asi? La ava ia desapone ja sua capeta, e enrolante la cordetas a supra, el fisa cada cordeta con un ago a la fore ante ce el pende la capeta a supra. Sua capeles blanca brilia como seda; la xinion peti a pos es covreda par un rede negra. Fenella ia vide cuasi nunca sua ava con la testa noncovreda; la vea aspeta strana.

“Me va apone la fasinor de lana, cual tua madre cara ia croxe a me”, dise la ava, e, desbandinte la salsix el tira a estra acel cosa, cual el enrola sirca sua testa; la franje de borlas gris dansa a la suprasiles de la fem cuando esta surie mol e lamentosa a Fenella. Alora el laxi sua corseto e alga cosa su lo, e ance un otra cosa su esta. A pos ala pare es un luta, corta e agu, e la ava roji pico. Snip, snap, el ia abri la suportadores. El suspira de lejeri, e sentante sur la sofa de pelux, el desapone lenta e atendente sua botas con lados elastica, e pone los a lado de lunlotra.

Cuando Fenella ia desapone sua jacon e falda e ia apone sua roba de bani, la ava es intera preparada.

“Esce me debe desapone mea botas, ava? Los es liada.”

La ava dona a los un considera profonda. “Tu va sensa multe plu comfortosa, si tu fa lo, enfante”, el dise. El besa Fenella. “No oblida la preas. Nosa Senior cara es con nos cuando nos es a mar, an plu multe ca cuando nos es a tera. E, car me es un viajor esperiosa,” la ava dise enerjiosa, “me va ocupa la leteta superior.”

“Ma, ava, como - an pos tota - tu ateni lo?”

Tre pasos peti e aranin es la sola cual Fenella vide. La fem vea fa un rie peti cuieta ante cuando el asende la pasos en un modo ajil, e el egali la leteta supra la xica stonada.

“Tu no ia crede ce tua ava ta pote fa lo, si?” el dise. E cuando el afonda a retro, Fenella oia denova un rieta lejera.

La cuadro dur de sapon gris no vole spuma, e la acua en la botela es como jelatin blu. Como difisil lo es ance turna acel telones rijida a su; on debe simple rompe sua via a en. Si tota la cosas ta es diferente, Fenella ta pote es rietosa…. Final el es a en, e cuando el reclina ala respirante rapida, el oia de supra un xuxa, longa e mol, como si algun es xuxante entre teletas de paper afin trova alga cosa. Lo es la ava preante.

Un tempo longa pasa. Alora la manejor entra; el pasea mol e apoia sua mano sur la leteta de la ava.

“Nos es aora entrante la Stretas”, el dise.

“O!”

“La note es eselente ma nos es alga vacua. Lo es posible ce nos va osila pico.”

E vera, en esta momento la barcon de Picton leva e leva e pende en la aira esata sufisinte longa per dona un trema ante ce lo es a retro lansada a su. On pote oia la sona de acua pesosa cual colpa la lados de la barcon. Fenella recorda ce el ia lasa la parapluve con la colo de sinie sta sur un sofa peti. Si lo ta cade, esce lo ta es rompeda? Ma ance la ava recorda lo, simultan.

“Me demanda a me, esce tu vole pone mea parapluve sur la solo, manejor”, el xuxa.

“Con plaser, sra Crane.” E la manejor, reveninte a la ava, xuxa: “Tua neta peti dormi tan bela.”

“Grasias a Dio!”, la ava dise.

“Enfante nonfortunosa sin madre!” dise la manejor, e la ava es ancora narante a el tota la avenis, cuando Fenella adormi.

“An tal Fenella no ia dormi sufisinte longa per sonia ante cuando el revelia e vide como alga cosa penduli en la aira supra sua testa. Cual es lo? Cual lo pote es? Lo es un pede peti, gris. Aora un otra junta con lo. Los pare xerca alga cosa; aora veni un suspira.

“Me es veliada, ava”, Fenella dise.

“O, la cara, esce me es prosima de la scala?” la ava demanda. “Me pensa ce lo es en esta fini.”

“No, ava, en la otra fini. Me pone tua pede sur lo. Esce nos es ala?” Fenella demanda.

“En la porto,” la ava dise. “Nos debe vesti nos, enfante. Come un biscoto afin stabli tu ante tu move!”

Ma Fenella ia salta ja de sua leteta. La lampa es ancora ardente, ma la note es a fini, e lo es fria. Regardante tra la oio ronda Fenella pote vide alga rocas distante. Aora los es sperdeda de supra par spuma; aora un gavota pasa volante; e aora veni un peso longa de tera real.

“Lo es tera, ava”, Fenella dise, merveliante como si los ia es a mar en semanas en junta. El abrasa se; el sta sur un gama e frica lo con la ditos de la otra pede; el trema. O! Tota cosas ia es tan triste resente. Esce esta va cambia? Ma la sola cual la ava dise, es “Freta, enfante, me ta debe dona tua banana bela a la manejor, car tu no ia come lo.” E Fenella apone denova sua vestes negra, e un boton salta a via de un ganto de la xica, rolante a un plaso a do Fenella no ateni. Los vade a la nivel.

Si lo ia es fria en la cabina, sur la nivel lo es jelin. Ancora la sol no es a supra, ma la stelas es oscur, e la sielo, fria e blancin, ave la mesma color como la mar, fria e blancin. A tera un nebla blanca asende e desende. Aora los pote vide intera clar alga bosce oscur. An la formas de la filisis parapluvin es mostrada, e acel arbores arjentin, strana pliada, cual pare sceletos…

Aora los pote vide la stadio de atera e alga casas peti, ance blancin, grupida a junta, como sur la covre de un caxa. La otra viajores pasea a supra e su, ma plu lenta ca los ia fa en la note ante aora, e los pare sombre. Aora la stadio de atera veni per encontra los. Lenta lo flota contra la barcon Picton, e ala veni ance un om tenante un enrola de cordon, e un caro con un cavalo, peti e pendente, e un otra om sentante sur la paso.

“Lo es Senior Penreddy, Fenella, el ia veni per nos”, dise la ava. El sona plaseda. Sua jenas sirin es blu de fria, sua mento trema, e el debe frota continuante sua oios e sua nas peti ros.

“Tu ave mea –”

“Si, ava.” Fenella mostra lo a el.

La cordon veni volante tra la aira, e “pum” lo cade sur la nivel. La plance de embarca deveni basida. Alora Fenella segue sua ava a la doca e sur la caro peti, e pos un momento los es rolante a via. La ungulas de la cavalo peti tamburi sur la pila de lenio, alora los afonda mol a la via arenosa. No un person es videda; an no indica de fuma. La nebla asende e desende, e la mar sona ancora como dorminte, tan lenta lo turna a la plaia.

“Me ya vid’ Sr Crane yir”, Sr Penreddy dise. “El ya par’ com’ mesma alor’. S’nyora ya bat’ un grup’ de scon’s en la seman’ pres’dent’.”

E aora la cavalo peti es retirada ante un de la casas concin. Los desmonta la caro. Fenella pone sua mano sur la porte, e la gotas de nebla, grande e tremante, moia intera la puntos de ganto de Fenella. Los vade a supra longo un rueta de calculos ronda, blanca, con flores moiada dorminte a ambos lados. La picotes blanca e delicata de la ava es tan pesosa de nebla, ce los es pendente, ma sua bon odor dulse es un parte de la matina fria. La blindas es a basa en la casa peti; la ava e la neta asende la pasos a sur la veranda. Un duple de botas vea de cauxo sta sur un lado de la porte, e un grande bote roja de acua sur la otra lado.

“Tut, tut, tua avo”, la ava dise. El turna la manico. No un sona. El clama “Walter!”. E sin retarda un vose profonda cual sona dui sofoca, clama a retro: “Acel es tu, Mary?”

“Para, mea cara!”, la ava dise. “Entra.” El puia mol Fenella a en un salon peti oscur.

Sur la table un gato blanca ci ia plia se como un dromedario, leva, estende se, miaui, e a pos salta sur la puntos de sua ditos de pede. Fenella entera un mano peti e fria en la pelo blanca e calda, e surie timida en cuando el caresa e escuta la vose mol de la ava e la sonas rolante de la avo.

Un porte cruji. “Entra, mea cara.” La fem vea jesti, Fenella segue. Ala sur un lado de un leto jigante la avo reclina. Sola sua testa con un mexa blanca e la fas rosin e la barba longa arjentin es mostrada supra la covreleto. El es como un avia multe vea ma atendente.

“Aora, mea xica,” la avo dise, “Dona nos un besa!” Fenella besa la om. “U!” la avo dise. “Sua nas peti es tan fria como un boton. Cual cosa el es teninte? La parapluve de sua ava?”

Fenella surie denova e pende la colo de sinie sur la rel de leto. Supra la leto un testo grande es mostrada en un moldur negra:

“Tua avo ia pinti acel”, la avo dise. El fronsi sua mexa blanca e regarda Fenella tan joiosa ce esta pensa cuasi ce la om ginia a el.