LETERATUR
Testos orijinal · Cantas traduida · Dramas traduida · Naras traduida · Poesias traduida · Sitas traduida · Testos diversa

La paneta ronda

Un fable rusce, multe simple e corta, per bebes vera peti.

Traduida par Veslav

A un ves pasada, on ia ave un om vea con sua fem vea. La om vea demanda:

— Fem vea, forni un paneta ronda per me.

— Me ta fa la paneta de cual? Me ave no farina.

— Eh, eh, mea fem vea! Scopi la solo de la graneria, raspa la fondo de la caxa en cual nos reteni farina, e tu va trova un cuantia sufisinte!

La fem vea prende la brosa de plumas de ganso, scopi la graneria, raspa la fondo de la caxa, e colie sirca du manos plen de farina. El misca la farina con crema asida, fa alga pasta, formi lo como un globo, frita lo en bur, e pone la paneta ronda sur la cornisa per fa ce lo es min calda.

La paneta reposa cuieta per alga tempo, ma alora lo comensa subita rola: de la cornisa a la banca, de la banca a la solo, sur la solo a la porte. Lo salta supra la grado de porte a la sala de entra, de la sala de entra a la porticeta, de la porticeta a la patio, de la patio a ultra la porteta – a via, plu e plu.

La paneta rola longo la rua e encontra un lepre.

— Paneta, paneta! Me va come tu!

— No come me, Lepre con oios crusante! Me va fa un canta per tu, — la paneta dise e comensa canta:

On scopi me de la graneria,
Raspa me de la caxa farinal,
Misca me con crema asida,
Frita me en bur,
Fri me sur la cornisa.
Me fuji ja de la om vea,
Me fuji ja de la fem vea,
E de tu, Lepre, me va fuji an plu fasil!

El comensa rola denova e multe pronto es ja ultra vista de la lepre.

La paneta rola e rola, e encontra un lupo.

— Paneta, paneta! Me va come tu!

— No come me, Lupo con pelo gris! Me va fa un canta per tu! – e la paneta canta:

On scopi me de la graneria,
Raspa me de la caxa farinal,
Misca me con crema asida,
Frita me en bur,
Fri me sur la cornisa.
Me fuji ja de la om vea,
Me fuji ja de la fem vea,
Me fuji ja de la lepre,
E de tu, Lupo, me va fuji an plu fasil!

El comensa rola denova, e multe pronto es ja ultra vista de la lupo.

La paneta continua rola e encontra un urso.

— Paneta, paneta! Me va come tu!

— Esta es ultra tu capasia, Urso con la pedes verjente a interna! — e la paneta canta:

On scopi me de la graneria,
Raspa me de la caxa farinal,
Misca me con crema asida,
Frita me en bur,
Fri me sur la cornisa.
Me fuji ja de la om vea,
Me fuji ja de la fem vea,
Me fuji ja de la lepre,
Me fuji ja de la lupo,
E de tu, Urso, me va fuji an plu fasil!

El comensa rola denova, e multe pronto es ja ultra vista de la urso.

La paneta rola plu e plu, e encontra un volpe fema.

— Alo, Paneta ronda! Tu es tan bon!

La paneta comensa canta:

On scopi me de la graneria,
Raspa me de la caxa farinal,
Misca me con crema asida,
Frita me en bur,
Fri me sur la cornisa.
Me fuji ja de la om vea,
Me fuji ja de la fem vea,
Me fuji ja de la lepre,
Me fuji ja de la lupo,
Me fuji ja de la urso,
E de tu, Volpe fema, me va fuji an plu fasil!

— Tu canta es tan bonsonante! — la volpe dise. — Ma me, Paneta, ia deveni tro vea e oia multe mal. Per favore, sta sur mea nas e repete tua canta, ma plu forte.

La paneta salta a sur la nas de la volpe e fa la mesma canta.

— Grasias, Paneta! Tua canta es tan dulse per la oreas, ce me ta escuta denova lo! Sta sur mea lingua, e canta a la ves final! – la volpe dise e protende sua lingua. La paneta ave stupidia sufisinte per salta a sua lingua, ma la volpe fema dise: “Am!”, e engoli el.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 21 april 2022 (17:21 UTC).