La monceria de Parma

Milano en 1796

A 15 maio 1796, Jeneral Bonaparte ia entra a Milano a la testa de acel armada joven cual, par traversa la ponte de Lodi, ia veni de fa ce la mundo aprende, pos tan multe sentenios, ce Cesar e Alexandro ave un seguor. La miracles de coraje e de jenio, atestada par Italia, va velia pos alga menses un popla dorminte; ma a un semana ante la ariva de la franseses, la milananes ia regarda los como ancora sola un colie de banditos, abituada a fuji sempre ante la soldatos de Sua Altia Imperal e Rial: a la min, esta ia es repeteda a los a tre veses semanal en un jornal peti, no plu grande ca un mano, primida sur paper susia.

En la Eda Media, la lombardianes republiciste ia mostra un coraje egal a acel de la franseses, e sua premio ia es vide la destrui intera de sua site par la imperores de Deutxland. De cuando los ia deveni sujetos fidosa, sua conserna xef ia es la primi de sonetos sur teletas de tafeta ros a la aveni de la sposi de un fem joven parteninte a alga familia nobil o rica. A du o tre anios pos acel epoca grande de sua vive, esta fem joven ia aseta usual un amiror: la nom de esta “cavalor servinte”, elejeda par la familia de la sposo, ia ocupa a veses un loca onorosa en la contrata de sposi. On ia ave un canion entre esta costumes femin e la emosias profonda provocada par la ariva nonprevideda de la armada franses. Costumes nova e pasionosa ia apare pronto. Un popla intera ia persepi, a 15 maio 1796, ce tota cosas cual lo ia respeta a ante es suprema riable e, a veses, odiosa.

La parti de la rejimento final de Austria ia indica la cade de la ideas antica: risca sua vive ia deveni aora modosa; on ia vide ce, per es felis pos sentenios de sensas blanda, on debe ama sua pais con un pasion real, e xerca atas eroin. A ante, on ia es afondada en un note profonda par la continua de la tirania jelosa de Carolus Sinco e de Philippus Du; pos cade la scultas de estas, on ia es subita inondada par lus. Ja tra sincodes anios, cuando la Ensiclopedia e Voltaire ia broti en Frans, la monces ia cria a la bon popla de Milano ce aprende leje, o aprende an cualce cosa de la mundo, es un labora forte nonusosa, e ce, si on va paia bon sua desi esata a sua prete e ta reconta fidosa a el cada de sua pecas peti, on va es cuasi serta de ave un loca bela en paradiso. Per completi la irita de esta popla tan temable e razonosa a ante, Austria ia vende barata a los la vantaje de no debe furni soldatos nova a sua armada.