Ambos ia entra a la ofisia munisipal per parla con la maior. La secretor ia es ala.
“Alo,” la avo ia dise, “nos ta vole parla con la maior. Lo es un cosa importante.”
“El es en sua sala – ta ce me informa el,” la secretor ia dise en sta se. “Per favore, espeta asi.” El ia entra a la sala de la maior e, pos parla alga con el, el ia lasa ce los entra.
“Alo,” la maior ia dise. “Per favore, senta vos. Bonveni a la ofisia munisipal. Como me pote aida vos?”
“Nos ia trova alga paperes importante cual nos vole mostra a tu,” la avo ia dise.
“Me ta vide los,” la maior ia responde.
Joan ia dona los a la maior, ci ia abri la covrente de cuoro e ia comensa silente leje los. Pos sinco minutos, el ia leva sua oios de la paperes e ia dise: “Nos debe parla con la corte. Esta paperes pote salva la Vileta de la Marci.”
El ia prende la telefon e, pos clica la numero, ia espeta nervosa asta oia ce algun prende la telefon. “Alo! Esce lo es la judor local? Si, esta es multe importante. Me ave asi alga paperes per cual me nesesa ce tu vide los. Si. Si. Esce tu pote veni asi? Cuando? Dudes minutos? Oce. Si. Adio.” Pos repone la telefon, el ia dise: “La judor local veni per vide la paperes. En cuando nos espeta, me va fotocopia los. Esce me pote ofre a vos alga cosa? Cafe? Te? Acua?”
“Acua ta es bon,” la avo ia responde.
“Bon,” la maior ia clama a sua secretor. “Per favore, trae acua per los. Me nesesa fotocopia esta paperes. Cuando la judor local ariva, per favore, dise a el ce el debe vade direta a mea sala.”
La judor local ia entra a la ofisia con un fas strana. Clar, la novas ce la maior ia dona a el ia es bon, car el ia ave un surie peti a la boca. An tal, el ia pare fatigada par la rapidia con cual el ia veni a la ofisia.
“Alo,” el ia dise. “Esce vos es los ci ia trova la paperes?”
“Mea neto ia trova los,” la avo ia dise.
“Bon, bon. Si lo es vera, lo cual la maior ia dise a me, los pote salva la Vileta de la Marci,” el ia dise.
En acel momento, la maior ia reveni con la documentos fotocopiada. “A, bon, tu ia ariva. Esta es un copia de la documentos. Me ia fa du: un per tu, e un otra per me. La orijinales va resta con esta senior e sua neto.”
“Si, lo es un bon idea. Esce me pote leje los asi?”
“Si, clar. Per favore, prende un seja de ala.”
La judor local ia senta se e ia comensa leje. Joan ia pote vide como sua fas cambia en cuando el continua leje la paperes. Pos fini, la judor ia dise: “Esta documentos debe es lejeda par la judores de la corte provinsal.”
“Como me ia suposa,” la maior ia dise. “Ma oji es venerdi e me no crede ce…”
“Lo no es un problem. Doman me va jua golf con la judor xef e el va leje los. Con esta, nos pote fini la projeta de la Marci – bon, de la marci falsa – per destrui la bosce.”
“Esce acel bosce es tan importante?” Joan ia demanda.
“Per la abitores de tota esta provinse,” la maior ia esplica, “la Marcia es la zona la plu importante de asi. Acel bosce ia es la fonte de ricia de nosa provinse e, an si oji lo es ja diferente, nos ama ancora lo, car tota nosa asendentes ia ensenia ce de la bosce tota la furnis de la provinse veni: la lenio es vendeda per fabrica mobilas, la aira es plu pur asi e tal nos no ave problemes de respira como en la otra provinses, la acua cual nos bevi es pur e sin elementos cimical…”
“A, oce,” Joan ia responde.
“Bon, lasa esta con me, e a lundi me va dona un responde a tu,” la judor ia dise a la maior.
“Grasias,” la maior ia responde.
“E grasias a vos – esta pote salva nosa provinse,” la judor ia dise a Joan e a sua avo.
La maior ia sorti de la sala e, pico a pos, Joan ia fa la mesma con sua avo.
“Me va telefoni a vos cuando me sabe alga cosa,” la maior ia dise a los.
“Grasias,” los ia responde. E ambos ia sorti de la ofisia munisipal.
En acel fini de semana, Joan e sua avo ia es ajitada. Los ia vole sabe lo cual aveni con la documentos e la conversa entre la judor local e la judor xef.
“Me no pote an dormi,” Joan ia dise.
“Tu debe resta calma,” la avo ia responde. “Bevi un te de camomila.”
Ma an la te de camomila no ia calmi el. Joan ia sorti per core sirca la vileta. Asta la lago, a pos a la castel, e denova a la casa. Tal el ia fini fatigada e ia pote dormi.
La lundi ia ariva e la telefon ia sona a la ora des.
“Alo?” la avo ia dise.
“Alo, asi la maior. Veni direta a la ofisia munisipal. Me ave novas.”
E ambos, tan rapida como posible, ia sorti de la casa e ia vade a la ofisia munisipal.
“Alo,” la avo ia dise a la secretor.
“La maior espeta vos,” ia es la sola responde.
Los ia entra a la sala de la maior. La judor xef, la judor local e la maior ia es reunida, e los ia ave du sejas preparada per Joan e sua avo.
“Alo,” la judor xef ia dise en sta se. “Me es Javier, la judor xef de la provinse. Me crede ce vos conose ja lunlotra.”
“Si,” la avo ia responde.
“Per favore, prende un seja, cadun.”
Pos cuando los ia senta se, la judor xef ia comensa parla. “Nos ia reseta la documentos cual vos ia dona a la maior. Pos esamina los, nos ia comprende ce los es autentica, e me ia envia un letera a la Corte Suprema. A esta matina, la deside ia ariva. Lo es esta.”
E Javier ia dona a la avo un documento en cual on ia scrive: “Par causa de la atestas resente trovada, cual es multe clar e lasa no loca a duta, la Marcia de la Vileta es donada a Pedro Tardavenida e a sua desendentes con efeto instante. Par la potia donada a me par la Stato, me declara ce Pedro Tardavenida es la marci nova de la Marcia de la Vileta. – Suscriveda par la Corte Suprema de la Stato.”
Un surie ia apare en la fases de Joan e sua avo.
“Aora, senior Pedro Tardavenida, tu es la marci nova. Esta ia es publicida en la Avisa Ofisial de la Stato, e donce, lo es ofisial.”
“Esta es noncredable,” la avo ia dise, multe surprendeda.
“Esta es vera,” la maior ia dise.
“E, car aora tu pote deside lo cual pote aveni en la teritorios de la Marcia,” la judor local ia dise, “me consela ce tu scrive un letera a la compania con cual la marci vea ia suscrive un contrata per construi en la bosce, car me crede ce la idea ia es ce on va comensa a la lundi veninte.”
“Ma, como me va fa esta?” la avo ia demanda.
“A, tu ia scrive ja la letera,” Javier ia dise, mostrante un otra documento sur la table. “Lo es asi. Me ia scrive lo per tu.”
“Lo nesesa tua suscrive asi e nos va envia lo oji,” la maior ia ajunta.
Cuando la documento ia es suscriveda, la secretor ia prende lo per envia lo con la plu rapidia posible.
“A, un otra cosa,” la maior ia dise. “Nos ia contata la marci pasada e probable el va atenta contata vos per menasa o timidi vos. Si cualce cosa aveni, parla direta con nos.”
“Oce,” Joan ia dise, con fas asustada.
“Tu no debe es ansiosa. Nos no crede ce la marci va fa alga tal, ma lo es bon ce vos es avertida.”
“Bon,” la judor local ia dise, “lo es la ora de parti.” E el e la otra judor ia sta se e ia sorti de la sala pos dise adio a la otras.
“Me consela vos a no fa multe en esta semana,” la maior ia dise. “La mone cual la marci pasada va perde par causa de esta es multe, e me no crede ce el va lasa tal la situa, sin fa alga cosa.”
“No senti ansia,” la avo ia dise. “Nos veni de un vileta e nos conose nosa teras. Esta marci ia veni nunca, e me crede ce el an no sabe ci es la marci nova.”
“Bon, ma resta cauta,” la maior ia ajunta.
Joan e sua avo ia sorti de la ofisia e ia reveni a sua vileta.
“Cisa la marci pasada va atenta fa alga cosa en la fini de la semana,” la avo ia dise. “Car la novas ia apare oji, me crede ce asta mercurdi nos pote reposa.”
El no ia sabe cuanto el era.
Cuando los ia ariva a sua casa, un om ia es espetante los – con oculo de sol, botas militar, e un camiseta negra corpin.
“Esce tu crede ce el pote respira?” la avo ia demanda a Joan ante sorti de la auto.
“Esta es seria,” Joan ia dise. “Probable la marci ia envia el.”
“Probable,” el ia dise, sortinte.
“Alo,” la om ia dise seria.
“Alo, como me pote aida vos?” la avo ia demanda.
“La marci envia me per negosia con tu la compra de la titulo e de la teras de la Marcia.”
“A, vera?” la avo ia responde. “E cuanto el vole paia?”
“La marci es multe rica e multe jenerosa,” el ia responde. “Ma me crede ce lo va es plu bon si on parla a interna de la casa.”
“Acel no importa a me,” la avo ia responde. “A esta oras on no ave persones asi.”
“Bon,” la om ia segue, “la marci vole dona a vos des milion per tota.”
“Interesante…” la avo ia dise. “Ma la marci pasada – no la marci – ia ave un contrata con un compania per multe plu. Donce, me crede ce des milion no es multe. Cisa el ta debe fa un ofre plu bon.”
La om no ia sabe responde. El ia pensa ce esta avo vea va dise no a tota ofres, ma acel responde ia fa ce el resta silente.
“Alo?” la avo ia demanda.
“Me debe consulta mea xef,” la om ia dise.
“Vade,” la avo ia responde. “Pasa un bon dia.”
La om ia vade a sua auto (si, ance de color negra) e ia sorti de la vileta.
“Bon, Joan,” la avo ia dise en cuando ambos ia entra a la casa, “on debe es preparada, car nos no sabe lo cual va pote aveni en esta semana.”
“Si, ma cual nos pote fa?” Joan ia demanda.
“Aora, nos va prepara un come e a pos, on va pensa a alga cosa,” ia es la responde de la avo.
Pos alga oras, ambos ia deside ce la plu bon es resta en la casa e no sorti. Los ia ave comedas per multe tempo e los va debe sola espeta tra ses dias.
“Tu sabe ja,” la avo ia dise. “No sorti de la casa.”
“Bon,” Joan ia dise. E el ia vade a sua sala de dormi. “Me revade a la comensa: un estate noiante.” Sin persepi lo, el ia adormi.
Sua avo ia velia el.
“Lo es la ora de come,” el ia dise.
“Esce me ia dormi tra tota la sera?” Joan ia demanda.
“Si, tu ia es multe fatigada car tu no ia dormi en la finisemana.”
“Cual nos ave per come?”
“Oveta.”
“Deletosa,” Joan ia dise en cuando los ia desende la scalera.
En la come, la avo ia dise a Joan: “Me ia oblida dise a tu: me debe vade a la dotor doman. Me no vole lasa la casa sin person, car algun ta pote entra e fa cualce cosa, donce tu va resta asi – ma no abri la porte. Me ave claves per entra, oce?”
“No problem,” Joan ia dise pos prende un otra costela de oveta.
“E lasa alga per doman…” la avo ia dise, prendente la plato con la resta de la costelas.
Pos come, los ia sorti a la jardin e ia senta.
“Avo, cual tu vole fa con la marcia, cuando nos ia solve la problem con la otra senior?” Joan ia demanda.
“Joan,” la avo ia responde en regarda la sielo. “Vera, me no cura sur la marcia. Per me, lo cual es importante es ce, grasias a esta, un person ci no es de asi e ci ia veni nunca asi va destrui nosa teras. La marcia, la mone… los no es importante per me car me es ja vea. Ma tu, tu ave alga cosa sur cual tu debe cauti: me dise a tu, no deveni oseseda con titulos e mone, car tu no va pote prende los a pos; ma usa lo cual tu ave per fa lo cual es bon per tu e per la otras. E no lasa ce mone domina tu. No lasa ce avaria domina tu, car ricia no es importante en la mundo, an si lo pare tal. Tu vide la sielo? Lo apare sempre, a cada dia, supra ricas e povres. La Senior fa esta car El no distingui entre estas e aceles. Tu debe fa la mesma. Recorda esta parolas.”
“Si, avo,” Joan ia responde. E los ia resta regardante la sielo asta ce la fria ia obliga los a entra denova a la casa.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 28 novembre 2024 (08:56 UTC).