Capitol 2

A la dia seguente Joan ia velia e, pos la come de matina, el ia prende la veste de sumerjor e ia vade a la lago. La dia ia es multe bon: un sol merveliosa, cuasi no nubes, un venta suave cual ia caresa sua jenas e la canta de alga avias de la campaneria de la eglesa.

“Oji es la dia,” Joan ia dise.

La via a la lago ia pare plu corta ca a ante, cisa car el ia es multe stimulada per comensa sumerji ala.

Pos ariva, el ia cambia sua vestes e, cuando preparada, el ia lansa se a la lago. “Mea Dio! Como la acua es tan fria!”

El ia sumerji en dirije a la sentro de la lago, la loca do la vileta antica ia resta.

La acua ia es multe clar, sin contamina. Esta ia es car la abitores de la vileta no ia vole ave un lago negra, ma lo con un color clar. Tal, los ia dise, en la dias con sol los pote vide la vileta tra la acuas turcesa de acel lago.

Joan ia avansa con fasilia asta ariva a la vileta. Ala, lo ia pare ce la tempo ia para cuando la lago ia es construida. Si Joan ta vide cualcun sortinte de alga casa, lo ta pare la plu normal a el.

“Me va vade a la eglesa,” el ia pensa. La vose de sua madre disente ‘tu vade nunca a la eglesa’ ia apare en sua mente. “A esta ves me vade a lo,” el ia dise en sua testa.

La eglesa ia es multe peti. La tore ia sorti de la acua con un orolojo cual ia para cuando la lago ia es creada, per fa ce la abitores recorda la ora esata cuando los ia perde sua casas, sua teras, sua vives…

La porte ia es de lenio, ma lo ia es putrida par la ata de la acua. Joan ia puxa lo e ia pote entra. La sala ia es vacua: la bancas de acel eglesa ia es aora en la eglesa nova, e ance la crus. On ia ave un sala peti a lado de la sala xef. Joan ia vade ala. “La sala de prete,” el ia pensa.

Tota vacua. Sola un caxa de metal ja multe osidida…

“Para! Un caxa de metal osidida, lasada asi per me-no-sabe-cuanto anios…” Joan no ia considera lo a du veses: el ia prende la caxa. “Lo no pesa tan multe como me ia pensa,” el ia murmura.

E con esta tesoro en sua manos, el ia deside fini la visita.

---

Joan ia cambia sua vestes, ia pone la caxa en sua bolson e ia vade corente a sua casa. Cuando el ia ariva, disente no cosa a sua avo, el ia asende a la nivel du, ia lasa la bolson e ia vade per duxi se.

Pos sua sorti de la dux, con vestes fresca, sua avo ia demanda el: “Como lo ia vade, la visita a la lago? Esce tu ia trova alga cosa interesante?”

“Si, me ia trova un caxa de metal alga osidida.”

“Interesante, e cual lo conteni?”

“Me no sabe. Lo es cluida e me no sabe multe bon abri lo.”

“Ta ce me vide lo,” la avo ia dise. “Prende la caxa e nos va vade a la jardin pos la casa.”

Joan ia fa tal e ambos ia regarda la caxa, cual ia es vera peti.

“E tu ia pote trae lo asi?” la avo ia demanda.

“Si.”

“Esce algun ia vide tu?”

“No, nun ia es ala.”

“Bon.” La avo ia vade a la garaje per prende un martel. “Esce tu vole atenta abri lo?” el ia demanda a Joan.

“Si, per favore,” Joan ia responde, prendente la martel.

La joven ia comensa colpa la xarnieres de la caxa, con la espera de pote abri lo. Ma no cosa ia aveni.

“Lasa me,” la avo ia dise. E, prendente la martel, par un sola colpa el ia destrui un xarnier. Par un otra, el ia destrui la otra xarnier. “La persones de la viletas no nesesa vade a la jinasio per fa sporte,” el ia dise con surie a sua neto.

La avo ia lasa la martel e, gantinte se, ia abri la caxa.

“Cual on ave a interna?” Joan ia demanda.

“Lo ave libros vea, alga mapas, e no cosa plu.”

“Lasa me vide cual on ia scrive sur la paperes,” Joan ia dise. El ia prende la mapas, scriveda con caligrafia gotica, e ia comensa leje los. “Estas es sola mapas de la teritorio de la Marcia. Los conteni nosa vileta, la teritorio do es la lago e… ance un bosce.”

“Acel debe es la Bosce de la Marcia,” la avo ia dise.

“Vos no pensa multe a la nomes, si?” Joan ia dise.

“Clar, corta e consisa,” la avo ia responde.

“An tal…” Joan ia dise en prende un otra mapa. “Para, esta no es un mapa, esta es un… un desinia de la eremiteria e ance…” El ia estende la paper sur la table de jardin. “On ave un pasaje cual vade de la eremiteria a… lo pare un otra construida locada a media de la bosce?”

“Lo es probable la monceria,” la avo ia dise, ponente la martel e la gantos.

“Cual monceria?”

“A media de la bosce on ave la monceria de la Marcia,” la avo ia dise.

“Vera, vos debe ave plu imajina con la nomes…”

“Escuta. Acel monceria ia es multe rica, ma lo ia es destruida par alga cosa. Me no recorda multe bon.”

“Par foco?” Joan ia demanda.

“No, no par foco – sur esta me es serta.”

“Bon, e cual on ave ala?”

“No cosa, lo es ruinas. Acel loca es an plu ruinada ca la castel.”

“Acel ta es vera difisil,” Joan ia dise surprendeda. Regardante la desinia denova, el ia dise: “On ave un pasaje entre la eremiteria e la monceria. Cisa me ta pote entra a la pasaje tra la eremiteria.”

“Me no consela fa lo,” la avo ia dise. “Tu conose ja la state de la eremiteria.”

“E si me ta vade de la monceria a la eremiteria?”

“Me ia jua multe ala cuando me ia es peti, e la sola cosa restante es la murones e la solo de petra de la monceria.”

“Oce, donce me crede ce la aventura fini asi,” Joan ia dise con alga tristia en sua fas.

“Tu pote fa asi otra cosas,” sua avo ia dise. “Lo va es plu bon ce tu oblida esta pasaje.”

“Si,” Joan ia dise. “Lo va es la plu bon.”

La avo ia sta se e ia vade a en la casa, ma Joan, sin ce la avo vide, ia prende la paper con la desinia e ia porta lo a sua sala de dormi per regarda plu bon lo.

Sola la vose de sua avo, clamante el per vade a la come de sera, ia fa ce el sorti de sua pensas.

“On ave serta alga cosa en acel monceria,” Joan ia pensa. E el ia desende la scalera per come con sua avo.