Capitol 1

Joan no ia sabe cual el debe fa. En acel estate, sua jenitores ia dise ja a el ce el va vade per visita sua avo en la Vileta de la Marci. Acel ia es un vileta multe antica, fundida en la eda medieval. An tal, en la eda contempora, cuando la governa ia deside construi un pantan per ave plu acua, la vileta ia es inondada e lo ia es construida denova a lado de la pantan.

“Ma perce me debe vade con la avo a la vileta?” Joan ia dise. “Lo ave no cosa! E me va debe resta ala tra tota la estate!”

“Si,” Marina ia responde. Marina ia es sua madre. El ia nase en la vileta ma el ia revade nunca ala. A esta ves, sua padre, Pedro, ia telefoni a el per demanda cuando el va conose sua neto. “Tu no visita tua avo de cuando tu ia es peti.”

Joan ia resinia. El ia pote fa no cosa per evita la nonevitable. En acel estate, el va resta en la Vileta de la Marci.

La Vileta de la Marci ia es un vileta multe peti, tan multe ce lo an no ia apare en la mapas de la provinse. Lo ia ave cuasi no cosa: un fronton, un fonte en la sentro de la plaza de la vileta, e alga balansas per la enfantes. E acel ia es tota.

Ma esta no ia es la plu mal. La vileta ia ave no telefon (sola la casa de sua avo ia ave lo), e la interede ia es alga cosa misteriosa per sua abitores.

“Tu va pote joia la natur,” sua padre ia dise, “e tal tu no va es sempre con la telefoneta.”

“E perce vos no va resta ance en la vileta?” Joan ia demanda a sua jenitores cuando los ia es tota en la automobil.

“Car nos no ave vacanses,” Marina ia responde. “Profita la fato ce tu es ancora en la scola e tu ave du menses de vacanses per diverti.”

Joan ia silenti e, sin sabe lo, ia adormi.

---

Joan ia velia cuando la automobil ia es prosiminte a la vileta. El ia vide un lago con acua de color turcesa e, a media, un campaneria.

“Perce on ave un campaneria a media de la lago?” el ia demanda a sua jenitores.

“A! Tu velia ja!” sua madre ia dise. “Lo es la campaneria de la eglesa antica. Ante la construi de la lago, la vileta ia es ala; ma la abitores ia debe cambia lo a do lo es aora.”

“Me no ia conose esta istoria,” Joan ia dise.

“Si, car me nara nunca lo a tu,” sua madre ia responde.

Los ia ariva a la casa de la avo, cual ia es ultra la vileta. “La casa ultima,” Joan ia pensa. “Perdeda en un vileta perdeda en un provinse perdeda.”

“Lasa tua pensas e vade per saluta tua avo,” Marina ia dise.

“Ma me no recorda el,” Joan ia dise con surprende en sua fas. “Cual me va dise?”

“Cisa ‘alo!’?” sua padre ia responde con ironia.

“Ha, ha. Acel es multe comica,” Joan ia responde ance con ironia.

“Vade ja,” Marina ia dise, “el no va come tu.”

Joan ia vade a la porte e ia bate lo. Pos un minuto (per el lo ia es como un anio), la porte ia es abrida par un om vea, con un xapeta negra.

“Alo!” la om ia dise. “Como lo vade?”

“Alo, papa!” Marina ia dise, e el ia dona du besas a sua padre. “Esce tu recorda Joan?”

“No, no…” el ia responde, regardante la xico. “Como vos veni nunca asi?”

“Bon, papa, nos es ja asi,” Marina ia dise. “Joan, saluta tua avo.”

Joan ia dona du besas a la jenas de sua avo. “Alo, avo!” el ia dise. “Me va resta asi tra la estate con tu. Tal, tu no va es solitar.”

La avo Pedro ia indica a Joan ce sua sala de dormi es a supra, en la nivel du de la casa.

En cuando el ia asende per lasa la bagaje, sua jenitores ia parla con la avo, ci ia prepara ja cafe.

La sala de dormi en la nivel du ia es un de la partes la plu vea de la casa. Lo ia ave ancora un solo de lenio, e la sola cosa cual el ia trova es un leto e un armario. No cosa plu.

“E me debe resta asi tra la estate,” Joan ia dise. “Esta va es un mori lenta par noia.”

Sua jenitores ia lasa la casa pos parla con la avo. “Adio, Joan!” los ia dise a el. “Fa tota cual tua avo demanda de tu.”

“Si,” el ia responde, forsante un surie a sua fas. “Senti no ansia per me.” Ma el ia pensa: “Clar, senti no ansia. Los no cura, cual es diferente. Sola tota la estate en esta vileta en no loca.”

Joan ia entra a la casa e ia vade a la cosina, cual ia es la mesma sala como la sala de come. “Alo, avo!” el ia dise. “Como lo vade?”

“Bon, bon…” el ia dise en senta sur la sofa e ensende un pipa.

“Avo, la fumi mata.”

“No cura per me,” el ia responde calmida, “me fumi sempre, de cuando me ia es joven, e no cosa aveni a me.”

“Ma lo va aveni,” Joan ia pensa.

“Esce tu vole come alga cosa?” la avo ia responde.

“Si, me no sabe an cual es la ora.”

“La ora es cuatro, e me crede ce tu no ia come ja de cuando tu ia parti de tua casa.”

“Si, esta es vera.”

“Veni, me ave alga cosa sur cual me crede ce tu ia come ja nunca lo.” El ia prende un casola con alga cosa a interna, e el ia comensa caldi lo. Joan ia senta a la table e ia espeta. Pos alga minutos, la avo ia prende la contenida de la casola e ia pone lo sur un plato.

“Cual es esta?” Joan ia dise.

“Migas. Lo es un plato tipal de esta loca. Lo ave migas de pan, txoriso, alio e uvas.”

“Oce,” Joan ia responde, regardante esta plato tan strana.

“Proba lo.”

Joan ia prende alga de lo con un culier e ia introdui lo en sua boca. Surprendeda, el ia come plu. “Lo sabori multe bon,” el ia dise. “Lo es la ves prima ce me come esta.”

“Me ia sabe ce tu va gusta lo,” la avo ia dise en senta a lado de Joan. “Esta es tua ves prima en la vileta, me crede.”

“Si, me ia veni nunca asi,” Joan ia dise.

“Bon, pos la dormeta nos va pasea afin tu conose la Vileta de la Marci.”

“Pos la dormeta?”

“A, si. Tu no ta vole pasea cuando la sol es direta supra tua testa. Tu ta fini cisa como un ovo fritada,” la avo ia dise, riente.

---

Pos la dormeta, la avo e Joan ia sorti de la casa per pasea.

“Nos va vade a la castel,” la avo ia dise, “e a pos, a la lago.”

La castel ia pare es multe distante, ma la via ia es multe bela. La sistos ia covre la plu de la monte e la odor de tim ia fa pensa ce los es distante de cualce sivilia. La vultures ia vola supra la castel, xercante un preda per xasa.

La castel ia apare ante los. La tore de tribui ia es intata, ma la resta… sola alga mures ia resta, la otras ia es cuasi intera cadeda.

“Lo pare ce la castel ia ave un vive pasada plu bon ca esta,” Joan ia dise.

“A, si. Lo ia es construida par la Marci de… me no recorda sua nom. Ma bon… esta vileta ia es multe importante en la eda medieval.”

“Tu vole dise la otra vileta, lo cual es su la lago…”

“Bon, si, acel. Ma la nosa es la eritor de acel vileta.”

La vista de la castel no ia ta pote es plu bon: la montes plen de sistos, juniperes e ilexes. La rio ia pote es videda de la castel, xercante sua via tra la arbores.

Joan ia clui sua oios e ia enspira profonda.

“Tu no ave esta aira tan pur en la site,” la avo ia dise en regarda la vista.

Cuando el ia abri sua oios e ia regarda a sua destra, Joan ia vide un construida peti, en un state multe mal. “Cual es acel?” el ia demanda a la avo.

“Acel?” la avo ia dise, turnante per vide do Joan es indicante con sua dito. “Acel es la eremiteria de la castel. Bon, aora nos va vade per visita la lago.”

---

Joan ia gusta la lago. Sua acuas turcesa ia fa ce el pensa sur fables de fantasia e tesoros ascondeda.

La campaneria ia pote es videda sortinte de la lago, en dirije a la sielo.

“Asi tu pote veni per nada – esce tu sabe nada?”

“Si, on aprende en la scola.”

“A, bon. En mea tempo nos ia aprende asi, en la lago. Tu pote sumerji ance.”

“Ma me no ave un veste de sumerjor,” Joan ia dise.

“Esta no es un problem. Tu pote usa alga cual me ave en la casa.”

“Esce lo es perilosa, sumerji asi?”

“No, on ave no cosa, sola la ruinas de la vileta. Tu va pote visita la eglesa si tu vole. La lago no es multe profonda, donce tu no va ave problemes.”

Ambos ia comensa sua pasea per revade a la casa.

---

Cuando los ia reveni, Joan ia demanda: “Avo, perce tua casa es separada de la otras de la vileta?”

“A, esta es car nos ia manteni la tradision de nosa familia.”

“Cual tradision?”

“Tu sabe ce tota la abitores de esta vileta ave la mesma nom familial.”

“Si, ma nos…”

“… ma nos es la solas ci no ave lo.”

“E perce?”

“On no sabe multe bon. La lejenda dise ce nos ia veni multe plu tarda ca la otra abitores de la vileta e ce, an si los ia permete ce nosa asendentes resta con los, la constrinje ia es ce los debe abita un loca separada. Los ia pote misca e parla con la otra abitores de la vileta, ma los ia debe sempre abita un casa separada.”

“E esta es la causa par cual nos ave un otra nom familial?”

“Si, nos no es desendentes de la abitores prima ci ia construi la vileta, ma de los ci ia veni plu tarda.”

“E cuando tota esta ia aveni?”

“Me no sabe. Cisa en la eda medieval…”

“Avo, la eda medieval es leteral mil anios! Esce tu no ta pote es un pico plu esata?”

“No,” el ia dise consisa.

Joan ia fa no responde. A la min el ia ave alga cosa per fa en la estate: sumerji en la lago.