La internasionali de la Amazona

En un debate en un universia de la Statos Unida de America, la ecs-governor de “Distrito Federal de Brasil”, Senior Cristóvam Buarque, ia es demandada sur sua pensa sur la internasionali de la Amazona. La joven american ia comensa ja sua demanda par dise ce el ia espeta la responde de un ci es umaniste e non de un ci es brasilera. Seguente es la responde de Senior Cristóvam Buarque:

“Vera como brasilian me ta parla simple contra la internasionali de la Amazona. An si la governa de nos, brasileras, no ave la cura nesesada con esta posese, la Amazona de Brasil parteni a nos, brasileras. Como umaniste, me senti la risca de ruina ambiental cual la Amazona sufri, me pote imajina la internasionali de lo, como ance tota acel cosa cual es importante per umanas.

Su un etica umaniste, si la Amazona debe es internasionalida, ance nos debe internasionali la reservas de petrolio de tota la mundo. La petrolio es tan importante per la bonstate de umanas como la Amazona per la futur de nos. Contra esta, la propriores de la reservas de petrolio pensa ce los ave la direto de aumenta o basi la estrae de petrolio e aumenta o no sua custa.

En la mesma forma, la capital finansial de la paises rica ta debe es internasionalida. Si la Amazona es un reserva per tota la esentes umana, lo no pote es ardeda su la vole de un proprior, o de un pais. Arde la Amazona es tan grave como la desemplea causada per la desides acaso de la divinores finansial global. Nos no pote lasa ce la reservas finansial servi per arde paises completa servinte a la desira de la divina.

Ante an la Amazona, me ta gusta vide la internasionali de tota la museos grande de la mundo. La Louvre no debe parteni sola a Frans. Cada museo de la mundo es la gardor de la obras la plu bela de arte produida par la jenio umana.

Lo no es posible ce on lasa ce esta posese cultural, como la posese natural amazonan, ta es usada e destruida a la gusta de un proprior o de un pais. On no ave multe tempo, un milionor de Japan ia deside ja entera con sua corpo un depinta de un grande pintor mestral. Ante esta, esta depinta ia ta debe es internasionalida.

Paralel a esta reuni, la Nasiones Unida es creante la Foro de la Milenio, ma alga presidentes de paises ave difisiles en veni a la Foro par causa de constrinje en la frontera de la Statos Unida. Par causa de esta, me pensa ce York Nova, como la loca de la Nasiones Unida, debe es internasionalida. A la minima, Manhattan ta debe parteni a tota umanas. Ance Paris, Veneza, Roma, Londres, Rio de Janeiro, Brasília, Recife, cada site, con sua belia spesifada, sua istoria mundial, ta debe parteni a tota la mundo. Si la Statos Unida vole internasionali la Amazona a par causa de la risca de lasa lo en manos de la brasileras, ta ce nos internasionali tota la armas e macinetas nucleal de gera de la Statos Unida. Car la Statos Unida ia demonstra ja ce los es capas de usa esta armas, causante un destrui plu grande a miles de veses ca la ardes lamental fada en la forestas brasilera.

La aspirores de aora a la presidentia de la Statos Unida, en sua debates, proposa la idea de internasionali tota la reserva de forestas de la mundo, cambiante los per la debe. Ta ce nos comensa usante esta debe per garantia ce cada e tota enfante de la mundo ave la posiblia de COME e de vade a un scola. Ta ce nos internasionali la enfantes, tratante los, tota de los, como posesedas cual merita la cura de tota la mundo, con ce la pais do los nase no es importante. La enfantes de la mundo merita tro plu ca la Amazona. Cuando la dirijores trata la enfantes povre de la mundo como un poseseda de umanas, la dirijores no va lasa ce la enfantes labora cuando los ta debe studia, ci mori cuando los ta debe vive.

Como umaniste me aseta defende la internasionali de la mundo. Ma, sempre cuando la mundo trata me como brasilera, me va luta ce la Amazona de Brasil es de nos. Sola de nos!”