La comedia del Site Peterburg

Parte II

Piotr
La dia, me recorda bon acel.
La Rio Neva[¹] ia ruidi a la mar,
La Neva descurante, vacua e lejera,
A tempo cuando el, la tsar, la grande,
Ia veni inversante nubes con la oios
E pensa al mediadia lusetosa.
La pensa pinse un plieta sur la fronte,
Voleta supra rivas a sielo,
Levita supra la foresta anelante,
Desclami velas en la mar distante merveliosa.
E poi me ia construi sur la costa finsce
Un site. “Lo va es la capital asi”. Instante
La foresta densa ia es cadeda asta la radis
E caros ruidosa ia bate sur fenetras de casetas.

Nicolai II
Piotr ia es la tsar.
O gloria pasada!
Enaira alta, tu, como un flama osilante.
Ma me va vade, vade del pantanes vil,
O Rusia, me parla mea adio per sempre!
Ma no, me resta como un diablo o un forno!
O, axi! Spara! Lansi me par mil de lansias!
La via, clari lo. E me, la eritor del Dio,
Va vade a la trono, con la mano firma
Teninte mea cor; la anios del monarcia de fero
Va pasa su la vives del nomadas.
Es bondiseda, la domina rusce,
E me es tua tsar e Dio e senior.
Si, O Piotr. Me vive. E a me tu es riable,
Tu es un monumento simple e montor.
Regarda como tota poplas sede. La tsaresa
Per me va pari un enfante forte como faia.
Ma, O Piotr, me no posese fortes, fortes.
E cuand’me vaga del palasio a templo,
Un cavalor apare sur un petra bruta.
Tu, O Piotr, la monumento frida, tu, O tsar!

Comsomoliste[²] Vertunov (indicante Nicolai II)
Lia el.

Xepcin
Clui portes. On ave un flueta de aira nontolerable. La tsar va developa cataro. (Rie).

Atendores
Ha ha ha ha ha ha ha …

Balalaicor
He, la fem joven ia core
En un falda al foresta
Bevi, fem, un barileta
Per la madre la tsaresa.

Comsomoliste Vertunov
He-e, la veste de tu es de baieta. Tsar, tu fri?

Nicolai la Du
Lasa me solitar, comsomoliste Vertunov, lasa me solitar!

Comsomoliste Vertunov
Cua? Cual tu parla? On desira bon cosas per tu, per un fol. On ia compatia tu. Cual
person regalada tu es! Dise a me, tu ia sputa cisa a cuxines veludin, no otra? a?

Xepcin
Me dise, clui la portes. El va developa cataro.

Comsomoliste Vertunov
No, dise prima a me esce tu ia sputa a la cuxines veludin? a?

Nicolai II (noncurante)
Sputa.

Comsomoliste Vertunov
Regarda tu! E esce tu ia fa plu ca esta? Tu, xico, ja no teme nos, dise franca, tu ia fa
plu ca esta?

Nicolai II (noncurante)
Fa.
(fortinte la vose)
Me no vole parla con tu, me vole dansa. He, musica!

Balalaicor
La tsar dansa,
Ventas sofla,
Poplas plora,
Larmas gota,
Totas dansa,
La tsar no brinca,
Vaga multe
Coleriosa.

Nicolai II
Piotr, do lo es, la Rusia de tu?
Do es la site? Do es Peterburg?
A do me ia ariva, a Costroma[³], a Sielo o a la Parlamento?
Responde, O Piotr, a me, a tua neto.
On ia demanda esce me ia sputa a un cuxin,
Ma me no sabe lo, me no recorda, me oblida.
Oblida, la memoria ia fali me, Piotr. Piotr,
A do la tsares sputa sempre, dise?

Piotr
A un vaso de sputa o su un table.

Nicolai II
Clama la Comsomoliste Vertunov.

Manejor
Si, tua majestia!

Comsomoliste Vertunov
Cual va es tua comanda, Tua Majestia?

Nicolai II
Alo ala. Como es la clima, calda o fria?

Com. Vert.
Alga calda, Tua Majestia.

Nicolai II
Sabe cua, me pote sputa su la table!

Com. Vert.
Multe interesante, T. M.

Nicolai II
Vole, me va mostra?

Com. Vert.
Ja mostra!

Nic. II
Pua!

Com. Vert.
Eselente!

Nic. II
Pua!

Com. Vert.
Notable!

Xepcin (core a en)
Seniores, clui la porte. La dejela es un tempo la plu perilosa! Mea tia
ia dona a me per donada gantos, e papa ia dise, ce e la mustax e barba e suprasiles de me
e tota tota es roja como de la ensenioresa.

Comsomoliste Vertunov
Core a Moscva[⁴], tu, la maldiseda.

Xepcin (canta)
Me ia core, jira gamas,
Salta como un lion
“No despera” — on ia clama
“No regarda sirca tu
Prend’la sabre de la gaina
Brandi lo supra la trunca
Tua colpa es silente,
Axi deutxes como pinos.”

Comsomoliste Vertunov
Core, core plu rapida!

Xepcin (canta)
Un falcon dormeta alta,
Me ia core a la note,
Animales – su la monte,
Pexes dormi sur la plaia.
Sola tu, tsaresa mea,
Tu regarda a la campo
Sola tu reclina tua
Testa, O tsaresa triste.

Comsomoliste Vertunov
Vania, Vania, rapida! Un plu pico. Brinca tra la foso. Vide ce Moscva brilia
an plu ca un alga lago, la casas flota. La templos peti obedable es vidable. Freta, Vania!

Vania Xepcin (canta)
Mea gol es atenida
En la Moscva ostentosa.
Totas trota tan rapida,
Freta multe angusosa.

Nicolai II
Mea Dio, cual vive maldiseda!

Comsomoliste Vertunov
Tsar, recontrola tu!
E no descorajosi!
Escuta bon con la orea tormentada
Oblida sur la vive de pasada.
No multe tempo de la vive resta. Ma tu
Perce tu turba Vania Xepcin?
Perce tu clama me? Perce riente
Ia xuta a la campa en la campo?
La Dio envia a tu la puni. En la tomba
Aseta lo, drenante como risas tua jenas
Concava.

Nicolai II
Silenti! No nesesa parla.
Me sabe tota. Sur la mur asi
La comandor notable pende se
En cuando Maria la bela ia lamenta
Teninte teclas su la mano.
Asi Bismarck eterna ia anela
Ma sua fia, el ia pare diferente.
Regarda, como gamos
La caros xilia. Manadores core. Regarda,
La descapasidas freta con tintina
E core como flamas de matina.
La spada vola sur la alas.
E supra la palasio cadeda
On vide la armur pendeda.
Me sabe tota…

Comsomoliste Vertunov
Ma esce tu recorda un de dias?
La clima ia es invernal e un nevon
Ia vaga sirca Moscva. La cabanas
Crepita nonmovente
E avias ia cade en la neva.
La pedes de algun ia flaxi
E on ia xuxa en franses.
Cual pais vos vade a traversa?
Do es la pais de do vos es?
Recorda — multe rejimentos
Asi Napoleon ia gida
E arde Moscva a la tera?
Recorda?

Nicolai II
No. Me ia oblida.

Comsomoliste Vertunov
Oblida? Noncredable!
An tal, espeta un momento. Tu recorda Famusov?

Nicolai II
Recorda.

Com. Vert.
E Catenca?
Ela ia bonveni tu con un beseta sur Morscaia[⁵]
Vos vade con la braso en la braso.
Catenca ia brandeta la ombrela.
Vos ia visita un boteca de joalas.
Tu ia pasea como lo conveni a un imperor.
Catenca ia pasea como
Un pendador de lenio.

Nicolai II
Si, me conose el.
Ma do el es?

Com. Vert.
No multe importante.
Silenti tu, alga persones veni a asi.
Regarda, Famusov a lado de Cirill Daviditx
e an… Catenca. Veni, tsar.

Famusov
Amis! nos es en esta casa
Denov’!
Me va presenta vos a la Comsomoliste Vertunov.
Tal respetada… O Catenca, tu ia roji?
E tu, Cirill Daviditx? Tal nonconveninte!
Perce tu tristi, confusada como un enfante?

Catenca
No, Pavel Afanasievitx, me es felis
e roji per razonas nonsabeda.

Comsom. Vertunov
O dise, Famusov,
Como lo vade a la prinse Mexersci?

Famusov
Mil grasias. En sania bon
Eleva canarios.

Com. Vert.
E sua fia bela Maria?

Famusov
O, Maria, el ia reuni con la Dio.

Coms. Vert.
Perce la Dio? Cual bizara.
Tu debe abandona superstisios.

Obernibesov
La Dio, El es me!
E Maria es mea!
Nos ia es de des-cuatro anios cuando me comensa
Conose el.
A mea casa calma el ia vola. Me reclina.
Me vide ce la porte ia moveta
La venta ia sofleta en la sala.
Subita Maria ia entra.
La daga es pendeda sur la mur.
Tu vide esta? Maria,
Tu vide? El ia dise: “No.
A me lo no importa!
Me ama tu, Cirill Daviditx. Ta ce nos
Va fuji de asi. Lo es per me nauseante! Cira!
Tu es supraplenida con la odia.
Ta ce nos fuji
Sur un cavalo e balon de aira!
E tufa su la mar e a distante freta
E como amazonas tra montanias
Nos va tintina sur un fenetreta.
La padre va apare, nos va clama: Asta pronto!
Cirill Daviditx, fuji — nos es libre!”
Ma me ia dise: Maria, esce tu vide Dio?
La Dio, El es me! E tu no pote move de la teme.
No lansa tua oios. Tu va mori,
como un avia, del mano caresante!

Xepcin (canta)
En un casa peti calma
Un bandito ia abita.
Fies no es permeteda
A prosimi esta loca.
Ma en cuando stelas franca
Lansa sua oios basa,
La bandito de la casa
Arde un candela blanca.

Nicolai II
Lia el! Esta es no un umana ma un alga betul!

Famusov
Calmi, Tua Majestia. Serta, nos pote lia
E mata el. Ma cual ta es la benefica?
El va revive a la dia pos doman e
Va canta denova como un povre a reles.
La gol no es nel vive, ma nel canta.
Como diseda par mea conoseda Mexersci, prinse,
Traversa mundo — a no loca
On ave tera tan fanginse.

Nicolai II
Cua tu opina,
Esce Cirill Daviditx Obernibesov la vil
Es un person plu bon ca el, o como?

Famusov
Plu fresca. Tu nesesa
Demanda a la prinse,
El es un conosor de alma e de corpo.

Nicolai II
Ma do on trova un tal saja?

Famusov
La prinse bon de me, el vive en la Swiz asidua.
Ta ce Cirill Daviditx va servi nos como un mesajor.
Un distilada, dona lo a el. E ance la mision.

Nicolai II
Senta, mea xico, en un avion,
Vola, mea xico, ultra Matterhorn.
Tensa la stomaco, verje tra nubEs.
Tu va vola asta do la prinse es.
Dise ce el debe veni a asi,
Dise — me es sua padre par sposI.
E a un ves nonimportante
Esente entre nozos grande
Me, con un pen en mea manos,
Pendeda par me’lingua mol,
Sumerji estra portainca
E scrive la saluta fol.
No tardi, Obernibesov.
Enaira l’avion donada.
A tu me dona un botela —
Botela con un distilada.
Asorbe lo si tu descaldi,
A pos — dejeta lo a via.
E ance presa un boton
Cuando tu vide Matterhorn.

Catenca
Adio, Cirill Daviditx!

Famusov
Vijila bon la aletas!
No desende plu basa ca tresento metres.
Cuando tu va ariva, demanda, do tu es.
(core de la stadio pos la avion)

Comsomoliste Vertunov
Un tal bizara.
Ia imajina un diablo sabe cua de se mesma! Regardor, cua tu opina sur esta
person?

Regardor
U es ja serta ce el va secute la coda e cadun va xerca futil per el.

Comsomoliste Vertunov
Lo es ja bobo! La determina de el no va sufisi. Vania, cua tu dise?

Xepcin
Nicolai II espetora sangue. On ta debe clama un dotor. Lo ta conveni.

Comsomoliste Vertunov
Espeta, on ave plu consernas.

Regardor
E lo es sempre como lo! Si on es un loco, cua tu fa!

Coms. Vertunov
He tu ala, on ia dona a tu la libria e tu ja fa asi noncortes. Me sabe plu bon sur lo cual
me debe emprende.

Regardor
Me va cexa a mama.

Coms. Vert.
Vade e cexa. Me no cura.

Regardor
E va vade!

Coms. Vert.
E vade!

(regardor vade a via)

Coms. Vert.
Uf! Como un petra desponeda de la spalas.

Famusov (entra)
Do es la tsar?

Coms. Vert.
Diablo sabe lo. Cuando me nesesa algun, me trova no diablo. Esce acel
ia vola?

Famusov
E pronto ja va reveni. Catiuxa ance ia vade?

Coms. Vertunov
Ta ce totas perde ja.
(vade a via)

Famusov (solitar, pensosa)
un du
un du
un du tre
un du tre
un du
Porr-tuges

(algun core tra la stadio)

He a do tu core!
un du
un du

(cortina)

Ata II

Prinse Mexersci
He abri!
Me es prins’Mexersci.
Ia veni a Piter.[⁶]
Me vole sabe ci ia nomi me un odiable!
Par sol’un mano me va rompe el
E envia al madre del diablo
Si el atenta fronti me, la alta!
Me mata duple tal amaperil!
Va arde el e sperde tra la tera
La sene! Ci es tu?

Gardor
Es plu cuieta! No scandali!

Prinse Mexersci
Cua? El a me…
No, no. Escuta lo…
Esce tu sabe
Ce esta manos curvi un copec!

Gardor
Si tu no sesa lo aora,
Me va aresta tu.

Prinse Mexersci
Aresta? Bon, ta ce tu proba!
Lo es par me an espetable!

Gardor
Tu es aora arestada! Segue.

Pr. Mex.
No puxa! Gida an al cornos del diablo.

Com. Vertunov (entra)
A, lo es tu!

Pr. Mex.
Si. Me ariva. Esce Nicolai II abita esta loca?

Com. Vert.
Coreta, ma aora el no es en sania, el reclina
En un leto como un arbor.

Prinse Mexersci
He, militar! Cua tu regarda?
A el tu gida me!

Gardor
A ci, tu dise?

Prinse Mexersci
Al tsar ci como un arbor reclina.
On ave cuatro pasos asta la porton
Ma ance un stangeta reclinante como un diablo!

Gardor
Ta ce tu brinca supra lo con un brandeta!

Prinse Mexersci (brinca)
Alora do?
A destra o a lado?

Gardor
Asi tu vade, per favore.

(la porton abri)

Nicolai II
A do regarda me?
A cada loca — viles. Un de los
Ia abri un camisa loco e escuta
Un fonograf, en cuando sua oios es cluida forte.
Ala un cavalero gami con un alabarda,
Manteni calmia pasosa de un burocrata.
Ala es un gardor e la comsomoliste Vertunov,
Con los on ave un person
A me asta aora nonsabeda.
El debe es un suplicor de alga tipo.

Prinse Mexersci
Alo, tsar!
Me veni sur la alas pronto,
Cirill Daviditx a la lado.
Cazan[⁷] videta e Piter ia sorti,
Inflante e crevente en la testa,
Batente e bolinte en Fontanca[⁸],
Cadente a la Neva a pantanes.
Nos sorti de la avion e leje:
“La Site Leningrad”[⁹]

Nicolai II
Si. Lo es vera.
Dio Dio!
Lo ia es tan resente.
Esente un enfante, me ia core
E come un orania
Fureta confetos inosente de un pox
E cade en teror en un presentia de laboror.

Comsomoliste Vertunov
He, otra cosas ance ia aveni!
A ves pasada me ia banio en un rio peti
Subita alga cosa flota simil a pex.
Ma me regarda atendosa lo
E xilia como un buteo
Saltante pronto de la acua.

Prinse Mexersci
Ma cua ia es acel?

Nicolai II
Ja dise.

Com. Vert.
Lo ia es un enroleta
De bastetas, mos e folias.
Me ia xilia multe forte
Asustada com’piolio.
E a pos per cuatro notes
Me ia ave melancolia.

Nicolai II
Divertinte! Tu es un coarde. E tota vos es como acel. Asustada de un basteta? E como si tu
ta vide un basto?

Com. Vert. (a lado)
A cada dia me vide un baston stupida. No problem! No suinte.

Prinse Mexersci
Alora a la consernada. Seniores! Per cua vos ia clama me?

Nicolai
Tua inteleto es nesesada.

Com. Vert.
Deside ci ta es plu bon.
Vania Xepcin o esta
Cirill Davidovitx Obernibesov
La prima — triste, nonusable,
La otra ave un sesteta sur un spala.

Prinse Mexersci
Me pensa ce plu bon es el
Ci ja de sua cuna
Ia clama “brava! brava!”
E tira la mustax
De papa o del tio
En cuando on, tosente
A lado e a un teleta,
A el ia canta irmos.

Nicolai II
Lodable!
Cual potia del judi nonerante!
Nos debe clama per Cirill Daviditx e demanda
Cual xico el ia es en sua bebia.

Xepcin (core a en)
Aora me veni de veni de Moscva. Me ia core a ala e los ave esata tota cosas como
a nos. La casas e persones es la mesma. Sola, los parla en reversa. “Alo”
a los sinifia “adio”. E donce, me ia debe core a retro. Ma me pensa ce
aora a alga loca un fenetra es abrida — lo flueta. Me ia core tal ce me ia sui an.

Nicolai II
A! Nos nesesa multe tu. Dise per favore, cuando tu ia es un bebe,
esce tu ia tira la mustax de tua papa o, per dise, de tua tio?

Xepcin
Cua?

Nicolai II
Esce tu ia tira la mustax de tua papa o mama?

Xepcin
Per cua?

Nicolai II
Donce, no?

Xepcin
Tua Majestia, no ruina me.

Nicolai II
Bon bon, vade ja.
E como sur Cirill Davidovitx, esce el ia veni?

Comsomoliste Vertunov
No, el ancora no ia apare. Me vide Famusov, ma el es solitar. Pavel
Afanasievitx, do es tua ami?

Famusov (entra)
El ia refusa veni!
Me dise: Ta ce tu escuta! Veni!
Ma el ia sta covrente se nel capa
Sin move, a la entra.
Instante comprendente tota, me ia vide
Ce el es triste.
El sta con alga libro en la manos
Teninte sua dito entre pajes.
Sta tal silente. Sua peto osilante
Sul capa similinte de un ala.

Xepcin
El vade a asi.

Coms. Vert.
Cua, Famusov?
La rus no ia susede?
Tu vole pare un oveta?
Ia pinti jenas a zafran
Ma ia oblida de sisori tua garas.

Nicolai II
Ja do el es?

Xepcin
El gami sur la ponte.

Prinse Mexersci
Me pensa ce acel es un cavalo.

Xepcin
No, ala.

Nicolai II
A si! Me vide el.
El porta un campana en la manos.

Prinse Mexersci
No un campana, tsar, ma sparas!

Xepcin
Ta ce nos fuji, senioreles!

Comsomoliste Vertunov
Espeta. A do tu vole fuji?
No ansia, O tsar. Me ia comanda
Ce Criuger sta a la entra. El es nontemosa
E ance fea.
Un xico no va pasa estra el
E cualce venta no va sofla.
El va catura cada par la manga,
Va puxa a un caro, va sibila
En dito. No temosi! Criuger
Es la geror.
El garda.

Xepcin (canta)
Criuger sta a la portes
Menasante e ferin.
Ma, lansante brasos alta,
Cade pos un spara vil.

Comsomoliste Vertunov
Como el es matada?!

Gardor (core a en)
Tua Majestia! Cuando stante a posto, Emmanuil Criuger ia es asasinada
par un fem nonconoseda.

Nicolai II
Cua aveni asi?

Gardor
Me no osa sabe, Tua Majestia!

Nicolai II
La tradi! O tu, la orible, menti!
Ta ce vos trae Criuger a me!
Me vole ce cadun ta vade!
Sin escutores me desira parla
Con el. Prepara samovar, infusa te.

Prinse Mexersci
Ma el pare es finida?

Nicolai II
Silenti, no atenta…
Me va espeta asta ce el veni.
E Obernibesov, el gami sur la ponte —
Lo no importa. El es vil e strana.
E tu — reveni a la Swiz
Lo es plu bon ala.
A via de la sol, asconde de umanas.
Ma me nesesa Criuger.
Ci dise “el ia mori?”
A do es Criuger? Piotr, responde! Criuger es do?
Xepcin ia dise ce el es matada.
Do Criuger es? O Piotr, do?!
Me vole la responde!

Comsomoliste Vertunov
Futil va es tua espeta.
Piotr no oia.
E Criuger reclina en un sala.
La braso brandi nonpensante
Nubin pendente de un table.
El es cuieta, ma an tal
Fa un poesia final.

Famusov
Alora cua, esce nos va espeta Obernibesov o va vade?

Prinse Mexersci
Cual site!
E cual pais!
Me ia ariva
A mea propre stato
E cua?
No stato, ma un caxa vacua per xapones.
Un barba vola, mandarinas dansa sur la stradas.
Me vide un foresta, vales cuadro
E sites refujada a la lados,
Tsares senta, come blinis
Jua cartas a matini,
Poi reclina. Dio, si!
Me va vola de asi.

Focadorores (porta Criuger, canta)
Criuger es mor. No jemi.
El es mor com’un baston.
On videta sua jeno
Tra la bucos del telon.
El reclina sin suspira,
Ronci multe encantad’.
Nel siel’la sol estingui
Luminante Leningrad.

——

(Obernibesov e la Gardor sur la ponte)

Gardor
Ci vade!
Responde, tu, ci vade!
He, escuta. Ci tu es!
Para, me no lasa ce tu pasa!
Responde, a do tu vade e cua es la nom.

Obernibesov
La nom es Obernibesov.
Me vade solitar al spasio.
Sur un barcon me flota oji a un porto vacua.
Lo es la come media.
Me senta a un table solitar.
Me vide — Maria.
Me es un studiante militar.
Ma me ia dise: “Maria la bela,
Encontra me a mea table triste.
Prosimi a asi.” Ma lo ia es futil.
E el ia pasa. E la sopa fri.

Gardor
Ai! Ai! Aida!

Obernibesov
Silenti.
Me ia crea mundo.
On teme me.
Ma tu, mea ami, no teme car me es un poesiste.
Me va catura tu par tua gamas peti
E com’un avia
Va colpa esclamante sur colona.

Gardor (evade e fuji)
Gardor! Rubor!

Obernibesov (xasa el)
A — rr rar, rar — rrr

(La stadio distante.)

Piotr
Del tempo cuando Criuger ia mori,
Me es tristida, vaga en la site
En un camisa. Tota es nonreta!
E tu, castel la duple botonida,
No brilia car reteni polvo e onora tsares.
E tu, caseta fame sur la ponte,
No un mervelia tu envolve en la palia.
Si alga prinse pasa, tu coxea.
O si un nube flax enaira al sofito muda.
Denova un inverno! Desordina!
Un fema craci nozas sur un ramo.
Alora, al Palasio d’Inverno,[¹⁰]
Como a ante, Criuger vijila,
Regarda triste la sielo calma…
Pu!
Lo no es Criuger regarda la sielo.
Tu!

Vijilor
Cual es la ora?

Piotr
Cuatro.
Si! Cua on pote dise!
A tota lados es un bol sin dio!
Catenca freta
Probable al cortea con la comsomoliste Vertunov.
A do tu ia asconde, Rusia!

Obernibesov
Asi. En mea punio.
Bela? Catura lo, finida.
Me veni a asi sur tubos peti.
Me es la Dio.
Tu vole ce acel femeta va returna?
Me pote lansa esta petra
A un portasapon e lo va infla
De un anela nonumana. La femeta
Va verje a un arboreta e reclina
Sur erba. Tota lo es conoseda
A me. Car me es un ungula.
No crede me? Regarda a asi.
En mea oios la acueta xuxa a distante.
A ves, a cuando Maria ia vide
Un avia, alora el ia dise: O Cirill Davidovitx,
Ta ce tu mata esta per un recordante!
Instante regardante mea oios.
Pos lo me sola tristi. Lo no es noiante,
Me trova nun de ci me pote colpa per la joia.

Piotr
Me ance xerca
El ci me pote descapasi
El ci me pote craci.
Sin impresa.

Obernibesov
E me ia trova.
Regarda como me va talia la mento del canix
E suspirante, en la lus de dia, va mutila tu.
Core!

(Piotr core)

Obernibesov (core pos Piotr)
A! Me es la Dio con un axa!!

(La stadio prosima.)

Prinse Mexersci
Donce bon! A via de asi.
O desonora!
Me no repete me asi denova.
Oribles! Los ia clama me!
Tan alta e tan saja como la diablo.
Per judi alga Obernibesov e Vania Xepcin.
Flajeli vos! Me vade e a vos: bon resta!

(Catenca entra)

bonjour![¹¹]

Catenca
O, me ia talia mea falda
En cuando me traversa la curgan.

Prinse Mexersci
Catenca! Dise per favore
De do la erba es sur tua cardigan?

Catenca
Un particula cade de un oio.

Prinse Mexersci
Lo es probable un finoio.
Lo es tan verde e tan burl…

Catenca
Alga pastor pasea sur l…

Prinse Mexersci
Tu, cortesan de caramel,
es pico corta ante me.

Catenca
No parla fol par causa ce me destensa
e me no sabe como besa.

Prinse Mexersci
No vade, para, per favore

(la Comsomoliste Vertunov entra)

e no jardar pr pr.

Coms. Vertunov
Vos parce abrasa asi lunlotra?

Catenca
Me es en larmas.
El es loco
E tan rabica com’un porco.

Prinse Mexersci
Permete, me ia atenta sur la cordetas sinsera…

Coms. Vertunov
Basta!
La menti nausea me!
Vola a do de do tu veni!
Me e Catia, nos va fa en otra modo.

Obernibesov (entra)
Un gato sur un teto, el ensofla
La carne del graneria e vade
A un bobin. La mundo es obesa!
Selebra, fem sircasian! Lo brilia.
E me regarda cosas tan diversa.
Bazil portante la povoinices.[¹²]
E un caror arnesi sua treno,
Xuxinte a la boca triste.
E me, la dominor de Moscva,
Ia besa Maria a casa,
En la cosina. Me reclina
En la cavetas e ia lisca
La manos al portasapon.
Me ance vide — el va mori,
Me puxa la cotel su lados.
Me prende sci ancora fria
E lansa forte a un cuna.
El canta: O Cirill Daviditx
Ta ce tu turna a plu ves.
Me pensa: lo es un mervelia
E turna como un martes.

Prinse Mexersci
Me es alta sul sielo.
Catia, brandi con la bolsa.
E disente a el “adio”
Scrive un mesaj’amosa.

Catia
Mea prometeda vola
A un otra seniorel.
Me sur pedes nuda veni.
Per ce tu va mata el.

Prinse Mexersci
Me tan alta nel sielo
Vola do la nubes formi.
Vide — lo es multe fria.
Clui portes e adormi.

(vola a via)

Coms. Vertunov
Montes cade. Lo es tarda.
Catia, ta ce nos parti.

(Coms. Vertunov e Catia vade)

Obernibesov (solitar)
Lo es plu bon de no regarda.
Acel umanas, cua los es?
Probable, me ia crea los en freta.
Aora me comprende lo.
En cuando me ia vade suriente nel Pasaje,[¹³]
Un pensa flaxi en la mente:
“Tu, Maria, probable, ia oblida me.”
Ma poi me recontrola me e fumi
Un papirosa.
“Lo no es posible!” — la sposa de la tesoror ia dise
“A nosa tempo com’on pote de oblida el?”
A pos, on sona des del sera.
Me ia regarda en saleta.
Me vide Maria, el trensa la capeles
E nomi Dio “tu es mea bon”
E dona me regardas vil.
Me ia comprende ce lo es un truco peti.
E poi ia dise: “Dio, El es me,
E tu, O Maria, es un enfante
Desonorosa.” Lo ia pare
Ce el silenti. Ma acel ia es un menti.
El ia es lenta caturada
A la abiso-Peterburg.
E lansa regardetas dulse
E surie a supra d’me.
E me ia sta com’sur un stadio,
Ia sofla calda a un fero,
Poi multe enfantin e simple
Me besa sua spala: Ela
Ia pia e ia regardeta
A lados. Poi ia es soniada
A me a note com’un yate,
E me ia axi con un spada
De spalas sua mast’moiada.

(cortina)

Ata tre

Ofisior I
Xinxes rampe nonrapida
Nel banieria susida.
Me, con gamas plen nudida,
Va sumerji me nel mar.
Me no va es esitante
Mea uniform’briliante
Cual ia es un oservante
De la grasia del tsar.

Ofisior II
Cual riable obsoleta
Tu razona noncoreta.
Tu confusa un rieta
Con un ri de samovar.
Prende me per un esemplo —
Me no vade a un templo
Me labora e contempla
Es un bon veterinar.
Esta vive de labora
Es plu bon ca un garota
Ta ce tu rapidi ance
A do la revolui ia trae totas.

Ofisior I
Me es creada per la otra.
Me fonde como un candela spesa.
Tu sabe Petia Pirogov?
El es me’camerada en nesesa.

Ofisior II
Fa cual tu vole e tu sabe
Ma tota esta es nonvera.
Un otra vive va comensa
En la comensa de janero.

Ofisior I
O si denova! Nevsci![¹⁴] E la caros!
La pas de prinses, la silentia del popla.
O Rusia! Tu es caldida par la potia.
Tu va enaira como la agila de du testas supr’Europa.
E tua fios brinca com’enfantes,
Como jovenes en bretelas sur la neva.
Me va ensofla estasin esta minutos
Sur rivas de la Rio Neva.

Ambos (canta)
Comunistes e tatares
va es mor, va es mor.
La engleses va ariva
sur barcones de vapor.

(dansa lansante la gamas)

Ofisior I
Cua lo es?

Ofisior II
Me pensa lo es un table.

Ofisior I
Ma el core como un mor!

Ofisior II
Lo es la spirito de la eda
Volante al bireria. Ance un seja.
E ance la Alcolomanica e seniora
E tu e me e tota de la tera!
Ta ce nos core a la strada,
Va bevi un botela e reveni.

Table
Mea coraje no sufisi solitar.

Alcolomanica
Tu me-enti menti menti.
Esta tu menti.

Table
Car no es usosida per cualce cosa.

Seniora
Fu, cual parladas fol!

Alcolomanica
Esta el no gusta nosa condui.

Seniora
Saxca, malbon! No saisi me…!

Alcolomanica
Espeta espeta…

Seniora
Sesa! Me no vole.

(repulsa el | la alcolomanica besa el)

Ofisior I
Ta ce nos ance besa!

Ofisior II
A! Bon!

(los besa)

Ofisior I
Cual clima eselente!

Ofisior II
Un pico blanda como bur.

Ofisior I
Ma lo es la saison la plu plasente:
la primaver’en Peterburg.

Ofisior II
Ta ce nos besa.

Ofisior I
Ta ce nos besa.

(besa | la comsomoliste Vertunov bisicli)

Ofisior II
Sitadan!
Tu ia cade alga cosa.

(Coms. Vertunov para e desmonta)

Ofisior I
Bon prima de april!

Comsomoliste Vertunov
Como?

Ofisior I
Nos ja ia broma simple!

Ofisior II
A la prima de april lo conveni fa esta.

(la silentia)

Nos ia broma con tu.

(la silentia)

Ofisior I
Car cuando on ave la bon clima… La prima de april… el ia clama…

(la comsomoliste Vertunov vade a via silente con la bisicle)

Tu ia vide lo?

Ofisior II
Si. Un caso misera. El ia comprende ci nos es.

Ofisior I
Si, nos es persones perilosa

(xuxa)

nos es persones perilosa

(de un loca alta)

nos es persones perilosa!

Ofisior II
Me pensa ce nos es persones perilosa.

(Nicolai II pasea con un portafolio)

Ofisior II
Alo, Nicolai Alecsandrovitx.

Nicolai II
Bon dia. Cua es nova?

Ofisior I
Lo vade mal! Alo.

Nicolai II
Bon dia. Ma cua ia aveni esata?

Ofisior II
Tu sabe cual persones perilosa es tota nos. Bolxevices sabe multe bon lo.
Nos ia vide la comsomoliste Vertunov, el spia nos, evidente.

Ofisior I
Si serta. La popla es a nosa lado.

Nicolai II
Ance la armada. Me ia vide a un de la dias resente como la soldatos, cuando los vide me, vade con sua testas basida
e lansa tal regardas grimada a sua comandores ce me ia comprende tota.
Si me ta dise sola un parola, ancora, unida, los va mori per la libri de la propre pais.

Ofisior II
Ma on pote trasa e mata multe fasil nos.

Nicolai II
No ansia. En la ospital con me, un person pasada servi, alga Ivan
Apollonovitx Xepcin. El ave asede a cada loca. E en cualce caso suspetosa, el ia ta dise
a me ce cosas es nonbon.

Ofisior I
La Dio dona. Lo resta no tempo longa de espeta. Me ia oia ce Nicolai Nicolaevitx prepara
un armada de sento mil, cual trae gases cual va mata sola comunistes.

Nicolai II
Si, lo es vera. Xepcin ia reraconta ja lo a me.

(los comensa fumi e vade a via)

Vose de la ofisior I estra la stadio
Nicolai Alecsandrovitx, ma como pronto lo va aveni ja?
. . . . . . . . . . . . . . . . . . . . . . .

(entrante: la comsomoliste Vertunov e Catia)

Catia
Perce lo ia prende tempo tan longa?

Comsomoliste Vertunov
En la via du bufones ia tardi me. Me ia bisicli e vide ancora de distante
du persones ci dansa e secute la pedes. Cuando me ia prosimi un de los ia clama: “Sitadan!
Tu ia perde alga cosa”. Me ia desmonta, e los ia es en estasia ce ia engana con la prima de april.

Interlude (per la parte III de la “Comedia del site Peterburg”)

La spalas ronda brandi se.
O tu, femeta nonamin.
A via, vade, Maria,
E cria com’un fasian,
Brandinte tua parasol,
Brincante como un bretsel,
Dansante a en un salon,
A un saleta o salon.

Coro peti
Al saleta
Al saleta
Alga avia
Voleta.
Sur un banca
La femeta
Ia destrensa
Sua trensas.

Coro grande
Bestias soflada pasa.
La fenetras clui forte.

Coro peti
Bestias soflada pasa.
E la avia colasa.
La banditos-banditetas
Flota en la mar curvida
Al caseta en la note.
La banditos-banditetas
Toca tota par la manos,
Saisi la femet’dormosa.
El ia velia disturbada.
Madre plora estr’la sala.

Banditos en junta
Ta ce tu, femeta, move a asi.
Ta ce tu piaf’la solo con talon.
La taverna vaga tra la vila vil
E la vias versa a la vacuia.

Maria
Me… mendica… relasa… me…

Banditos
En la aira tu evade nunca nos
E la vias versa a la vacuia.

Coro peti
Mures cade con un volta a la mar
E la bestias soflada flota se.

Bandito I
Tu vole boli per nos la carne?

Maria
No, me no vole.

Bandito II
Tu vole noda per nos la cravatas?

Maria
No, me no vole.

Bandito 4
Tu vole nara per nos sur nubes?

Maria
No. Me no conose airas
E ia visita nunca nubes.
Me trensa mea trensas negra.
E Obernibesov ia xerca me,
Ia bat’la porte apoiada
E plora dulse supr’la monte.
El ia agi un cotel,
Arde un candela blanca.
La umanas vola nunca.
El ia dise: Me va fa lo —
Vola del fenetra clar!
Me ia resta solitar.
Me visita nunca nubes,
No com’mea bon ami.
No disturba, no irita.
El va bate sur la porte
Subita!..
(donce, vola a via).

Banditos
Para! Para! Para! Para!
Ta ce tu reveni entre nos, bonfem.
Ta ce tu piaf’la solo con talon.
La taverna vaga tra la vila vil
E la vias versa a la vacuia.

Coro peti
La femeta vola como un falcon.
E acel banditos dansa sin ela.
Anc’la madre plora e danseta, he!
Lansa sempre sua testa a ala.
Alga axa flota estra la salon,
E pos lo — Ivan Ivanitx Samovar.
La femeta cade a en un tamis.
E la sol estingui nel sielo gris.

(la lus estingui e la musica silenti)

Parte III

Xepcin (core a en)
Clui la portes! Tal fluetas de aira! E un fenetra ala ance debe es cluida. Tal on pote
fasil developa cataro.

Famusov
Un papereta en la venta.
Cortinas vibra e ondeta.
La polv’enaira del tapeto.
Husares xuxa: “Lo es tempo.”
La manejor despone covres,
Disente tal: “Es preparada.”
E brandi a un campaneria.
Ja en la portes — canes, trenos,
Tintinas, sparas e campanas.
E Nicolai dejeta portes,
Entrante a la sala. Pos el,
Portacandelas es xasante
E raios contorseda trema.
Un caro xuta. Lo va arde.
Regarda! — tufa su la testa.
E, resonante con un cria,
Un jeta grande entra forte.
Lo zumbi a la oios corte,
A la icones e cortinas,
Moveta plumas, crinolinas.
Lo jira, toca un cordeta,
Destrui a pelux casteles
E versa sur la pais veliante.
La ondas vola pos lunlotra
E jira la tsaresa como
Un pupa, forte e subita
Lansante tsar a la sofito.

Xepcin (canta)
Cortinas jira, plumas jira
La venta sofla longo un serca:
Me vade a clui la portes
Si sola per me tu espeta.

Famusov
Ta ce nos clui la portes.
Vide: me veni e aida con zelo.
La securadores va dansa
E vises — regarda — va lisca la jelo.

Xepcin (canta)
Clui la portes, clui moldures.
Ventas, no loci, calmi vos.
A note oscur bestias sorti,
Sorti, alida, per trova nos.

Famusov
No teme, Vania.
Joia va pasa.
Miles de bestias.
La dama ronda.
La mervelia de gato.
La angusa a basa.

Xepcin (cria)
Me no teme, O Pavel,
Me no teme, Afanasievitx.
Me ia punta un fusil
A la enemi alida.
a la enemi nonbela
sin ungulas o un vela.

Bestia
Desapare, frior,
ia za mereliu calia
viliu pliu na culiu cocu
duliu v cacu cicu puliu.

Xepcin
Cua de mundo lo es?!

Person salsixin
El es sin dentes car.

Xepcin
E cua de mundo tu es?
Gardor!

(cade la fusil | un testa sur un mola longa dardi de un caxa)

Diablo caxida
Silenti-lenti-lenti-lenti-lenti

Monstros en junta
Nos — amis de la flueta,
La flueta, la flueta.
De distante nos voleta,
Nos voleta ‘leta.

Famusov
Desapare a via!
Asi la posesor es me, potiosa.
Vos es no cosa ma un mito mera.
Vos es un fruta de la imajina osiosa.
Vos es desonorante sur la tera.

Monstros en junta (con musica)
Cara Famusov amin,
!-! !-!
Tu aspeta cirgizin
!-! !-!

(Maria vola a en)

Maria
A! A do me ia ariva?

Xepcin
O padre.

Famusov
Hm.

Maria
Me ia viaja tra la mar
Ma mea remo es perdeda
A pos acel, la velas infla
E ventas porta mea barco
A via. Me va es cortes:
Ta ce vos dise do me es?

Xepcin
Tu es en la site Peterburg.

Maria
Do?

Famusov
En Leningrad.

Maria
Me veni a la capital.
Stonante! Multe bon!
Asi un conoseda bon de me abita
Detrenivel, el servi en un banco
A posto de contor major.
On nomi el Cirill Daviditx Detrenivel
El, mea cara, ave un sesteta sur un spala.

Famusov
Dise, Detrenivel es tua tio, no?

Maria
O no. El es mea prometeda e ami.

Xepcin
Strana, el remente algun a me.
El jira e jira en mea oios.

Famusov
El debe es la ombilico de la mundo?

Person salsixin
La plantas de la natur?

Bestia
Cvuliatxia cumanda?

Maria
No, un umana simple.

Xepcin
An tal, el jira a oreas
E a la oios, esta maldiseda, jira
E, disturbante la memoria,
No es saisida par la lingua.
Acel Detrenivel
Cirill Daviditx acel.
El jira, jira
En nEvon, en nevOn.

Nicolai II (entra)
U! La acompania onesta plen!

Xepcin
Bon matina, Tua Majestia.

Nicolai II
Inclina.
E ci es ela?

Maria
La nom es Maria.
Me ia abita un saleta con la ava,
Pasea a un parce, vade a Cazan.
Poi salta a un barco e a pos acel
Ia xuta a un besa de cotel.
Me vola a asi sur un balon de aira
Teninte la cordon nel mano frida.
Subita, me ia vide tores oro.
La tubos sisa e racetas clica.
“Tal site” — me ia pensa. E a via
Mar flota. Lo matini. Sielo blu.
La Rio Neva onda tra la plu.

Piotr
Lo ia es me ci ia construi sur la costa finsce
Un site. “Lo va es la capital asi”. Instante
La foresta densa ia es cadeda asta la radis
E caros ruidosa ia bate sur fenetras de casetas.

Nicolai II
Piotr ia es la tsar.
No como me ci vaga como un fem virjin,
Osila longo tua rivas, Neva infusante!
La anios pasa e semanas xuta
Ma tu, la bela, no va flota a la mares.
Si vicinges invade o la deutxes cria
O un coleria va vola tra Ural,
Un tona, an, no va disturba tu, la bela.
La site no va cade sur la rivas.
Ma me va dise adio, ami.
Me vade del pantanes en la desonorosia.
O Rusia, per tu la “adio”. La vive va estingui…
Bon, Maria, cua tu va dise?

Maria
Asi es mea prometeda. Cirill Daviditx
El servi como un contor. Me ama.
E sua nom — me pensa — es Detrenivel.
El ave un sesteta sur un spala.

Nicolai II
A serta, sabe, sabe.
Como posible de no conose Cirill Daviditx
Nos an ia ave un disputa, e Xepcin va atesta…
…A, mea respeta!

Comsomoliste Vertunov
Alo tsar.
La sposa, ta ce me presenta el.
La nom es Catiuxa.

Nicolai II
Multe felis.

Com. Vert.
E esta es Pavel Afanasievitx Famusov.

Catiuxa
Ma nos es ja conoseda!

Coms. Vert.
E esta es Vania Xepcin.

Xepcin
Per tua servi.

Coms. Vert.
E ci es esta?

Nic. II
Maria Pavlovna.
Ia veni a la capital a sua prometeda.

Coms. Vert.
A cual capital?

Nic. II
A Peterburg.

Xepcin
A Leningrad, Tua majestia.

Coms. Vert.
A cual tal Peterburg?!

Nic. II
A la site Pe-ter-burg.

---

[¹] Rio Neva — la rio de cual sur sua boca Peterburg es situada

[²] Comsomoliste — un membro de “Comsomol”, la organiza de la comunistes joven en la URSS

[³] Costroma — un site en Rusia

[⁴] Moscva — un site en Rusia, de cual sua state de la capital ia es tempora ocupada par Peterburg asta la revolui rusce

[⁵] Morscaia — un strada en Peterburg

[⁶] Piter — un de nometas conversal de Peterburg

[⁷] Cazan — un site en Rusia

[⁸] Fontanca — un de ramos de la Rio Neva

[⁹] Leningrad — la nom asiniada a Peterburg pos la mori de Lenin

[¹⁰] Palasio de Inverno — la abiteria de la tsares en Peterburg

[¹¹] bonjour — “bon dia” (franses)

[¹²] Povoinic — un xapo suave slavica de femes sposida

[¹³] Pasaje — un boteca famosa en Peterburg

[¹⁴] Nevsci — un strada en Peterburg