LETERATUR
Testos orijinal · Cantas traduida · Dramas traduida · Naras traduida · Poesias traduida · Sitas traduida · Testos diversa

La cade sin cade

Un parla de Manouna Orti

Cara sores e frates,

En sua obra De Causis Naturalibus, en la capitol XV sur la prinsipe de Arcimede, dom Munius descrive la macina sin ecuilibra nomida Arcimedion e atribui esta inventada a la matematiciste antica Alzon (Archimedio Alzonis).
La conseta sin duta ia es ja conoseda, car la cruses templan serifida , e la cuadro latina [SATOR AREPO] TENET OPERA ROTAS (per dise: « la labora teni la rotas »), pare es sua cripto-atesta. Algas considera la simbol indian e tibetan suastica 卍, simbol de la move universal, o la iin-iang ☯, simbol dauiste, como un atesta multe plu antica de esta conseta.

Plu, on trova la desinia de la Arcimedion en la scema 108 de la Maschinen Tractate de Johann Bessler (1681-1745). Sin duta, Johann Bessler (ance conoseda como Orffyreus) ia teni en mano la obra de dom Munius, ma, nonacordante con dom Munius, el no ia sumerji tota la rota, la linia BB indicante la nivel de la acua.

la cade sin cade 1

Ta ce nos considera la macina descriveda par dom Munius, cual nos ia reconstitui asì (scema 2). Cual es la prinsipe de la movador?
En azul, on ave acua. Esta macina sumerji tota en un masa licuida en un contenador (arca aquaria).
En esta scema, la discos purpur representa sferas multe pesante. Tota la sferas, de masa simil, es liada par un membrana flexable nonpermeable, cual los move a esterna o a interna de la soflador, longo la posa de acel.
En blanca, on ave aira, contenida en sofladores. Sofladores oposante es juntada par un tubo cual condui la masa airal de un soflador a sua oposante[¹].

la cade sin cade 2

La sferas pesante, a destra, puxa la masa airal; a sinistra, los tira la masa airal. La atas combinante de la sferas oposante move la masa airal de destra a sinistra, desecuilibrante constante la rota par un puxa arcimedal plu forte a la lado sinistra ca a la lado destra.
Esta desecuilibra sustada causa un move jirante de la rota.
Dom Munius spesifa la constrinje de funsiona, tal: per trae un volum airal determinada de un soflador a la otra, la pesas ajuntada de du masas oposante debe es plu grande ca la pesa de la volum acual simil [²].

A pos, en la capitol XVI de sua De Causis Naturalibus, dom Munius descrive la macina Gravitor, un sistem con desecuilibra sustada derivada de la prima. El no dise ci es la inventor — posible Alzon o, cisa, el mesma?
Seguente dom Munius, si on visita la interna de la rota, on trova prima en esta macina oto sferas pesante cual es liada uniforma sirca la ase, e cual el nomi Satelites (sphaerae satellites). Los es liada a la rota, ma los pote move alga. Sua moves es constrinjeda afin conserva la ecuilibra a cada posa de la rota. La grupo de la sferas periferial constitui la pendulario (pendularium).

la cade sin cade 3

Par leveres con pedes curva, e par un corea, on colie la forte developada sur la leveres par la pesa asemblada de la sferas: de cada Satelite, la Gravitor colie un mesma parte de forte pesante, conservante tal la ecuilibra jeneral.
Alora, visitante plu interna, on descovre ce esta forte colieda desloca, en modo continua, un masa pesante nomida la Sol, o la Petra ascondeda (Lapis occultum) en la cor de la sistem, a la lado destra de la rota, creante un desecuilibra sustada.
La Gravitor jira tal, xercante sempre un ecuilibra cual lo trova nunca. On pote dise ce acel aparato cambia la cade linial vertical de la Petra a un move jirante stante: esta es lo cual dom Munius nomi la cade sin cade.

Sores e frates onorable, me ia parla.

la cade sin cade 4


[¹] Per tubulum ducitur aer ad adversum follem. (Dom Munius, obra sitada, XV, xxvii.)

[²] Ad quantum aerem movendum ab hoc folle ad illum follem, tanta aqua levior necesse est quam coactae moles. (Dom Munius, obra sitada, XV, xxxv.)

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 22 julio 2021 (07:02 UTC).