LETERATUR
Testos orijinal · Cantas traduida · Dramas traduida · Naras traduida · Poesias traduida · Sitas traduida · Testos diversa

La bileta de reveni

Un nara corta par P. Sweeney, traduida par Simon Davies en 2012 e lejeda a vose par el en 2020

Sergei senta tremante en xoca, noncapas de crede lo cual el veni de vide. A intervales, el sorbe vodca de la tason de stanio cual un de la portores ia pone a sua manos. La turno de esta note ia pare tan normal, tan comun, ma lo ia fini con un aveni cual va turba sua mente asta la tomba.

El ia ariva per sua labora como xef de stasion, como el fa ja tra anios plu cuantiosa ca el ta vole conta. Tra tota la dia, el ia encontra e trata persones en sua manera abitual: tan calma e compatiosa como posible, ma nunca perosa.

La note ia es misera, neblosa, jelada; e los ci espeta la tren de San Peterburg ia presa se en grupos contra la fria, an en sua vestes de inverno. Ma, tra la flocos de neva aterante sur sua jacones e siles, Sergei ia vide un stimula grande en tota pasajores a la joias prosima de la selebras de natal, e a sua esperas soniada per un anio nova plu bon.

Enfantes ia es dansante de asi a ala en la neva, con regardas secreta en la sacos de compra de sua jenitores, desirante videta la regalas cual los ia anela tra la anio intera. Amadas ia es reuninte per la saison de natal. Con la cantores ci colie copeces per sua caritales, la sena ia es plen de ativia, e plen de felisia – asta la trajedia.

Sergei raconta la aveni a cadun, denova, denova. El ia debe emprende la rol de la vendor de biletas, ci ia maladi su un gripe forte. El no ia protesta; la stasionores opera en ecipo e es bon amis en sua labora e ultra lo. Sirca la ora nove, el ia oia un vose educada cual demanda per un bileta de plataforma, e, levante sua regarda, el ia es emosiada par la fas bela ma triste de la fem joven ci ofre sua rublos de paia.

La fem ia pare distraeda, paseante a via an sin prende sua monetas. Sergei ia debe clama el per reveni, denova impresada par sua oios bela con siles longa e oscur. Los ia es plen de larmas retenida…

El ia vole demanda esce la fem nesesa cualce aida, ma el ia senti un restrinje sosial: la fem es evidente rica, e sua manera mostra ce el es bon instruida sur cortesia e autofida. Cisa el ta deveni ofendeda si un om bruta ta fa un demanda sur sua consernas. Sergei no ia desira la reproxas de sua empleores si la fem ta cexa ofisial; el debe suporta ancora sua sposa e enfantes. El es sempre asidua, ma a el lo ia pare clar ce la fem es de un clase superior. El ia oserva la fem vadente longo la plataforma a la fini mesma, regardante de ves a ves pos se, como si el xerca algun.

Sergei ia leva sua spalas. El ia vide ja esta caso a tan multe veses: un fem nonfelis e desperante ci espeta ancora un om ci no va apare. Pos alga oras, la fem va sorti de la stasion, plorante sur la prometes aora vacua e rompeda cual sua amor ia vosi sur sua ama nunca morinte e sua futures felis en acompania. Sergei opina ce el mesma es multe fortunosa en sua sposia de ama contente, an si el no ave tota vantajes de la clase alta.

El ia resta ocupada tra la du oras seguente, vidente familias ci fa final un abrasa larmosa en parti, o ci reuni joiosa a la reveni de sua amadas. Si, el ia pensa: asi on trova vera la vive en multe formas diferente e con tan multe naras racontable.

An sin intende lo, el no ia pote supresa sua preocupas sur la dama encantante bela, e el ia continua oserva el. Sin duta, el va revade a casa con cor angusada, como tan multe persones a ante – la vive es tan cruel. Sergei odia acel omes ci trata femes en un modo tan acaso, ma la mundo ia es sempre plen de los e va es probable ancora tal a futur.

La fola ia deveni min densa pos la parti de la tren. La sola restante ia es la tren rapida, pronto espetada, e pos lo el va pote securi la stasion e vade a casa. El ia es surprendeda par vide ce la fem sta ancora ala; pos poca tempo, el va debe informa el ce la stasion es a punto de clui; la fem ia compra sola un bileta de plataforma, donce el no intende viaja. Evidente, el espera ancora la apare organizada de sua amor, ma Sergei duta ce acel va reali.

El ia oia la tren ante vide la lus en la tunel de sua pasa rapida longo la reles. El ia comensa move en dirije a la fem joven, per dise ce no plu pasajores va ariva a esta note. Ma la tren ia sorti ja de la tunel a rapidia masima, e ante cuando el ia pote cria un averti a el, la fem ia core a la borda mesma de la plataforma. Sergei ia es frenida, asustada par lo cual aveni.

En cuando el luta per pensa clar, la fem ia salta. El ia fa no xilia; el ia cria sola la nom “Alecsei” ante desapare su la rotas de la veculo. Sergei ia clui sua oios en teror, pausante sua respira como si jelada par la fria de la note. An conosente la manca de espera, el ia clama la otra feroviores per aida. Los ia freta a la plataforma, temente la vista xocante cual los no va pote evita vide: un corpo sanguosa, craseda e destruida par la rotas de la tren rapida.

Sergei ia abri sua oios, nesesante coraji se ante regarda la sena fea – ma no corpo ia es sur la reles. Lo no ia es posible ce la fem ia evade acel rotas pesosa, ma, en sua xerca prima sur la ferovia, los ia trova no trasa de el – no sangue, e an no frato de veste ia es descovreda. Sergei ia es en un state de trema cuando un de la portores ia parla final. “Me ia trova estas. Cisa los ia parteni a la fem.”

El ia prende la carta e la medalion de arjento. Pos abri la medalion, el ia vide ce lo conteni tre fotos: la fem bela joven, un om sever e plu vea, e un xico peti con crinera oscur e risa ci aspeta lamentable simil a sua madre. La carta, leterida con arjento delicata, es de la spesie cual on lasa costumal cuando on visita persones de clase alta.

El bevi denova de la vodca. El no pote crede ce un esperia tan strana ia aveni a un om tan comun e pratical como el. El ia oia la raconta, serta, e es sempre setica; ma la nom sur la carta es “Anna Carenina”.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 23 marto 2024 (17:14 UTC).