La arte grande

Ce on libri se de la limitas umana, lo es la gol ultima de esta rexercas: me vade de loca a loca, a cada parte do fratos de la instrui ia es posible sperdeda. Me colie los, esamina los, me studia zelosa tota la crusas de similia. Me desifri los con la serti ce los es copias de manoscritos antica sur la arte reial, esta pratica de la crea pur cual ia permete la scrive de la libros sacra…

Dia oportun! La sabes es ancora conservada, me teni la confirma, e la construida arcana rigorosa a la situa definida par la testos, frecuente ascondeda en tables astrolojial. En pasa, la mapas cual me usa sembla sirculos zodiacal sofisticada.

On ariva par la ferovia cual segue la costa, en media de construidas vasta de cual la fasadas porta scrivedas ancora desifrable.

Sentante en mea comparte, me es sumerjida en un state mental nunca ja tan vacua e tan abrida, e esta asorbe grandi tan ce me disolve en la sonas cuantiosa composada par un tren vibrante nonmovente, un ambiente stonante rica de ritmos e combinas armonial, unica en sua natur propre, referente a no cosa otra; esta nivel mental es sensada como un completi de la Arte e de la Es.

Plataformas nonmanxada blanca domina la mar; la ruas vadente de la un a la otra asende multe alta, asta esta paseria florosa pasosa, a la borda costal la plu alta. Par un paseria lejera inclinada, on asede la templo de la Sabe. Pos ce on ia pasa la porteta, on comensa desende la scalera, a destra de la coredor.

La scalera elica e la plataformas de niveles, con colores simbolin, ia es perfeta descriveda. Consernante la cor de la arciteta, esta inclui un cuna diafana do un sculteta de arjila reposa. On pote regarda lo sola intensa. Ala tota aveni. Ala, me ia reseta la revela de un veria fundal de la esense de la Obra: « La materia muta a oro sola si on muta sua propre oios a un cristal vera pur. »

Si la cualia de la regarda o de la escuta veculi la spirito de la arte, si la persepi crea la obra, me senti ce la persepi pur, direta, va libri lo de la pesa umana.

Ultra la portes vitrida de un amfiteatro, on encontra denova la campania, la colinas, la bosces de arboretas, cual paserias traversa en tota la dirijes; sur esta paserias esersores vade e veni, apriori sin gol: moves estrema lenta, sin sesa recomensante, oios duiabrida, manos juntada. La silentia de la locas es mera turbada, a interval de du oras e dudes-cuatro minutos, par tre vibras en la aira, sin ce on sabe do lo veni, spasida par la dura de sua resona. A esta momento, otra disiplos, obedinte un lege implicada, recambia la presedentes sur la paserias.

La monte, cual avansa sur la mar, ofre cavas cuantiosa do solitares permane. Me ia pote vide algas, fisada en sua posas. Me va pasa esta note prima en un de esta cavas rocosa.

A la sera, cuando tota pausa, on persepi la tintina distante de la campanas de un manada. Notas musical diversa interpone se entre lunlotra, con asentuas, altias, duras nonprevidable; silentias estrema interompe los, forsante la escuta per penetra la trama de la aira do la melodia nunca oiada de la peso musical la plu perfeta vibra. A cual nivel de acel jua de sonas la Obra es situada? En sua fonte, evidente, la move de la animales obedi a otras causas, ma sola sua reseta atendosa par la spirito de la arte atribui a lo esta statia.

La amfiteatro es plen, a esta ves. Me profita per afonda en la cuantia umana e reseta, secreta, la instrui su forma de filmas projetada e nonesplicada pausada a alga veses, con xutas fisada longa o senas corta anelida repetente, forsante la regarda per penetra la imaje. La banda de sona es crusada par rejistras de ruidos comun, familiar, cual a mea lado me escuta a la ves prima con un escuta musical — ronrona de un tren a un stasion, campanas tintinante de animales distante…

Strana, me intui ce la intendes de la instrui, nonformulada, es adirijeda sola a me. Me scrive notas en freta, scrivetas plu o min lejable, per fisa la pensas cual veni spontan en la curso de la projetas:

« Cada fenomeno de la realia es nosa materia prima nonviolable; la oservor, capas de fisa ala sua atende, atribui a esta imaje mental un potia superior. Un pratica plu abrida esperia esta regarda sur la combinas la plu peti de la avenis manejada par la cosas de cada dia, e la disposas de la elementos en la construi de nosa vive. » Lo no es surprendable ce mea propre vive apare como la ordina sutil de senas de un teatral multe refinada, con multe rebondis. La composantes, la linia dirijente e la fini de la trama no ia es persepable a me en la momento de la ata, ma los apare asi, en esta momento, cuando me considera la situas presedente; la contradises parente, la cambias subita de dirijes, la falis o la ostaculos nonprevideda trova sua razonas esensal en la lojica rijida de un progresa dramosa amirable, e lo fa ce me deveni plu e plu consensa de mea propre conduis e de la jua tan natural de mea propre composa, de instante a instante, en sua curso de crea.

« La Obra debe envolve completa la realia. » Asta aora, me ia es disturbada par alga parasitos mental, comentas resenial, sperdes de pensa… « Lo conveni aora ce on inclui esta parasitos en la contempla, sin discrimina la construis cual presenta se ante la consensia. »

Oji, me ia penetra un galeria vasta de mirores do la Obra es presentada. La regarda de la visitores inserta se natural a la crea presentada cual es la mirores mesma. La suprapone de la mesajes sensal e de la reatas mental o emosial es un composa stonante per oserva: on sensa clar un abri cual crea se a interna, on senti ce la atraes esterna perde sua densia — cada cosa es tan neta! No cosa aveninte ala, en esta punto de la universo cual me es, es mancada par la mente. La atende, nonrevocable erijeda, gusta sola la contempla de se mesma, la nuri de se mesma, consensa de consensi cada fase de la moves cual condui esta corpo de loca a loca, asta la cor de la construida.

A presente, cual va es mea parte en la Obra grande? Tota mea ocupa, de aora, es ce me surie con dulsia amosa supra la crisol cual abita en me e cual me cuni, cuninte lenta me mesma, sasiada par esta esente nasente, omunculo de ci me persepi sola la oro.