LETERATUR
Testos orijinal · Cantas traduida · Dramas traduida · Naras traduida · Poesias traduida · Sitas traduida · Testos diversa

Hansel e Gretel

Un nara par la Frates Grimm

Traduida a elefen par Lan Mat (2017)

En un foresta grande, un lenior povre ia abita con sua sposa e sua du enfantes. La xico es nomida Hansel, e la xica es nomida Gretel. Los ave poca per come, e a un ves, cuando un famion ia veni a la pais, el no pote oteni an la pan dial. Alora, cuando el pensa de esta en sua leto a note, e turna ansiosa, el jemi e dise a sua sposa: “Cual va aveni a nos? Como nos va nuri nosa enfantes an cuando nos ave no cosa per nos mesma?”

“Me va dise alga a tu, mea sposo,” la fem responde, “doman, en la matina temprana, nos va trae la enfantes a la loca la plu densa de la foresta; ala, nos va ensende un foco per los, e dona un plu peso de pan a ambos de los, e alora nos va vade a nosa labora e lasa los a solitar. Los no va pote trova la via a casa, e nos va deveni librida de los.”

“No, mea sposa,” la om dise, “me no va fa tal. Como me pote tolera lasa mea enfantes en la foresta? La animales savaje ta veni pronto e lasera los a pesos.”

“O! Tu es un fol!” el dise. “Tota de nos va mori par famia. Ta ce tu plani aora la plances per nosa caxones,” e el no lasa la om en pas asta cuando el acorda.

“Ma me senti vera triste per la enfantes, an tal,” la om dise.


Ance la du enfantes no pote dormi par famia, e oia lo cual sua estramadre ia dise a sua padre. Gretel plora larmas amarga e dise a Hansel: “Esta es la fini per nos.”

“Silenti, Gretel,” Hansel dise, “no ave ansia. Me va trova pronto un modo per aida nos.”

E pos cuando la veas ia adormi, Hansel leva, apone sua jaca peti, abri la porte a su, e rampe a estra. La luna brilia merveliosa, e la calculos blanca ante la casa sintili como sentimes de arjento. Hansel acrupi se e pleni la pox peti de sua jaca con tan multe como el pote. Alora, el revade e dise a Gretel: “Es consolada, peti sore cara, e dormi en pas. Dio no va abandona nos,” e el reposa denova en sua leto.


Cuando la dia veni, ma ante la leva de la sol, la fem velia la du enfantes, disente: “Leva, pigras! Nos vade aora a en la foresta per retrae lenio.” El dona a ambos de los un peso peti de pan, e dise: “Acel es alga per sua come de sera, ma no come lo ante alora, car vos no va reseta plu.”

Gretel pone la pan su sua faldon, car Hansel ave la calculos en sua pox. Alora, tota de los vade en dirije a la foresta. Cuando los ia pasea per un tempo corta, Hansel sta firma e regarda denova la casa, e fa tal denova e denova. Sua padre dise: “Hansel, perce tu sta e regarda a retro? Atende. No oblida como tu usa tua gamas.”

“A, padre,” Hansel dise, “me regarda mea peti gato blanca cual senta sur la teto, e vole dise adio a me.”

La fem dise: “Fol, acel no es tua peti gato, acel es la sol de matina cual es briliante sur la ximine.” Ma vera, Hansel no ia es regardante un gato, ma ia es continuante lansa la calculos de sua pox a sur la rua.


Cuando los ateni la media de la foresta, la padre dise: “Aora, enfantes, pila alga lenio. Me va ensende un foco afin vos no es fria.”

Hansel e Gretel colie subosce tan alta como un colina peti. La subosce ia es ensendeda, e cuando la flamas es grande, la fem dise: “Aora, enfantes, reposa a lado de la foco. Nos va vade en la foresta e axi alga lenio. Cuando nos fini, nos va reveni e retrae vos.”


Hansel e Gretel senta a lado de la foco, e cuando nun veni, los come un peso peti de pan. Los oia la colpas de la axa e crede ce sua padre es prosima. Ma vera, la sona no es lo de la axa, ma ia es causada par un ramo cual sua padre ia fisa a un arbor secida e cual la venta ia es movente. Car los senta ala per un tempo tan longa, sua oios clui par fatiga, e los adormi. Cuando los velia a fini, lo ia es ja note oscur. Gretel comensa plora e dise: “Como nos va sorti de la foresta?”

Ma Hansel consola el e dise: “Pausa per un momento, asta cuando la luna leva, e alora nos va trova pronto la via.” E cuando la luna plen leva, Hansel prende sua sore par la mano, e segue la calculos cual brilia como sentimes nova de arjento, e mostra la via a los.


Los pasea la note intera, e ante la leva de la sol, los ariva a la casa de sua padre. Los colpa a la porte, e cuando la fem abri lo, e vide Hansel e Gretel, el dise: “Enfantes turbosa! Perce vos ia dormi tan longa en la foresta? Nos ia pensa ce vos va reveni nunca.” Ma la padre joia, car el ia odia abandona los.


Pos un tempo no longa, un famion grande veni denova a la pais, e la enfantes ia oia a note ce sua estramadre dise a sua padre: “Cada cosa es comeda denova. Nos ave sola un dui de un pan, e alora la fini. La enfantes debe vade. Nos va trae los plu distante en la foresta afin los no va trova denova la sorti. Nos no ave un otra modo per salva nos mesma.”

La cor de la om ia es pesosa, e el pensa: “Comparti la peso final con la enfantes ta es plu bon.” Ma la fem no escuta el, e reproxa el: Natural, on ci fa A debe fa ance B, e considerante ce el ia sede a la ves prima, el debe fa tal ance la ves du.


Ma la enfantes ia es ancora veliada, e oia la conversa. Pos cuando la veas ia adormi, Hansel leva denova, e intende sorti e colie calcules como a la ves pasada, ma la fem ia clavi ja la porte, e Hansel no pote sorti. An tal, el consola sua sore peti, e dise: “No plora, Gretel. Dormi cuieta. La bon Senior va aida nos.”


A la matina temprana, la fem veni e estrae la enfantes de sua letos. El dona pesos de pan a los, ma a esta ves, la pesos es plu peti. En via a la foresta, Hansel desintegra sua peso de pan en sua pox, e sta frecuente e lansa un peseta a sur la tera. “Hansel, perce tu para e regarda asi e ala?” la padre dise. “Veni.”

“Me regarda mea pijon peti cual senta sur la teto, e vole dise adio a me,” Hansel responde.

“Fol!” la fem dise. “Acel no es tu pijon peti. Acel es la sol de matina cual es briliante sur la ximine.” Ma Hansel, pico e pico, lansa tota sua pesos a sur la rua.


La fem gida la enfantes ancora plu distante en la foresta, asta un loca do los ia es nunca en sua vives. Alora, un foco grande es ensendeda, e la estramadre dise: “Senta ala, enfantes, e cuando vos deveni fatigada, vos pote dormi pico. Nos va vade en la foresta per axi lenio, e a sera, cuando nos es finida, nos va reveni per vos.”

A mediadia, Gretel divide sua peso de pan con Hansel, ci sperde la sua sur la rua. Alora los dormi, e sera pasa, ma nun veni per la enfantes povre. Los no velia asta cuando lo es note oscur, e Hansel comforta sua sore povre, e dise: “Espeta, Gretel, asta cuando la luna leva, e alora nos va vide la picos de pan cual me ia sperde asi e ala. Los va mostra ancora la via a casa a nos.”

Cuando la luna leva, los parti, ma los no trova la pesetas, par causa ce la multe avias cual vola a sirca en la forestas e campos ia prende tota de los. Hansel dise: “Pronto nos va trova la via.” Ma los no ia trova lo. Los pasea tra la note intera e ance tota la dia seguente, de matina asta sera, ma los no sorti de la foresta. E los ia es multe fame, car los ave no cosa per come estra du o tre bacas cual crese sur la tera. E car los ia es tan fatigada, e sua gamas no pote plu suporta los, los reclina su un arbor e adormi.


Aora, tre matinas ia pasa de cuando los parti de la casa de sua padre. Los comensa pasea denova, ma los vade ancora plu distante en la foresta, e si aida no ta veni pronto a los, los ta mori par famia e fatiga.


A la media de la dia, los vide un bela avia blanca cual ia es sentante sur un ramo, e cual canta tan deletosa ce los sta e escuta lo. E cuando sua canta ia fini, lo estende sua alas, e vola a via ante los. Los segue lo asta cuando los veni a un casa peti de cual la avia ia atera sur sua teto. E cuando los prosimi a la casa peti, los vide ce lo es construida de pan e covreda con tortas, e ce la fenetras es de zucar clar.

“Nos va comensa labora sur esta,” Hansel dise, “e ave un bon come. Me va come alga de la teto, e Gretel, tu pote come alga de la fenetra. Lo va sabori dulse.”

Hansel estende sua mano e desfisa un pico de la teto per proba como lo sabori, e Gretel apoia contra la fenetra e rode la vitro. Alora un vose cuieta cria de la interna:

“Morde, rode! Me declara!
Ci es comente mea casa cara?”

La enfantes responde:

“La venteta! La venteta!
La Santa Bebeta!”

E los continua come sin disturba se. Hansel, ci gusta la sabor de la teto, desfisa un peso grande de lo, e Gretel estrae un panel intera, e senta, e saborea lo. Subita la porte abri, e un fem tan vea como la colinas, ci ia es apoiada sur muletas, rampe a estra. Hansel e Gretel ia es tan asustada ce los cade lo cual ia es en sua manos.

La fem vea, an tal, basi sua testa, e dise: “O, enfantes povre, ci ia gida vos asi? Veni a en e visita me. No cosa mal va aveni a vos.” El prende los par sua manos e gida los a en sua casa peti. Alora, bon come ia es poneda ante los: lete e crepes con zucar, pomas e nozas. Pronto a pos, du peti letos bela ia es covreda con telones blanca, e Hansel e Gretel ia senti como si los es en sielo.


Ma la fem vea ia es simple finjente es tan bonvolente. El es vera un sorsor vil, ci espeta sempre enfantes, e ia construi la peti casa de pan per atrae los ala. Cuando un enfante ta veni a el, el ta mata lo, coce lo, e come lo; e acel ta es un dia de banceta per el. Sorsores ave oios roja, e no pote vide vera distante, ma los ave un ole como bestias, e sabe cuando enfantes veni prosima. Cuando Hansel e Gretel ia veni en sua visinia, el rie malvolente, e dise: “Me ave los! Los no va evade denova me!”


A la matina temprana, ante cuando la enfantes velia, el ia es ja veliada. E cuando el vide ce ambos de los ia es dorminte e parente tan bela con sua jenas ronda e ros, el murmura a se: “Acel va es un pleniboca deletosa!” Alora el saisi Hansel con sua mano plietosa, trae el a un stala peti, e clavi el pos un porte grilida de fero. El pote cria, ma fa tal no ta aida el. Alora la sorsor vade a Gretel, secute el asta cuando el velia, e clama: “Leva, pigra! E trae alga acua, e coce alga cosa bon per tua frate. El es en la stala esterna, e debe es grasosida. Cuando el es grasosa me va come el.” Gretel comensa plora amarga, ma lo es futil, car el es forsada a fa lo cual la sorsor vil comanda.


E aora, la plu bon come ia es coceda per povre Hansel, ma Gretel reseta no cosa esetante armures de crabe. A cada matina, la fem rampe a la stala peti e cria: “Hansel, estende tua dito afin me pote palpa lo e serti esce pronto tu va deveni grasosa.” Ma Hansel estende un oso a el en loca, e la vea, ci ave oios oscur, no pote vide lo, e pensa ce lo es la dito de Hansel, e el ia es confondeda ce el no ta deveni grasosa.

Pos cuando cuatro semanas ia pasa, e Hansel resta ancora magra, la sorsor ia es saisida par nonpasientia, e no plu vole espeta. “Aora, Gretel,” el cria a la xica povre, “trae alga acua. Lo no importa esce Hansel es grasosa o magra. Doman, me va mata el e coce el.”

La peti sore povre lamenta cuando el trae la acua, e larmas flue longo sua jenas. “Dio cara, aida nos!” el cria. “Si la animales savaje ia ta devora nos, alora nos ia ta mori a la min en junta.”

“Reteni tua ruido,” la vea cria. “Lo no va aida tu.”


A la matina temprana, Gretel debe sorti per suspende la calderon con la acua, e ensende un foco. “Prima, nos va coce,” la fem vea dise. “Me ia caldi ja la fornon e amasa la pasta.” El puia povre Gretel a la fornon de cual flamas de foco ia es ja veninte. “Rampe a en,” la sorsor dise, “e vide esce lo es coreta caldida, afin nos pote pone la pan a en.” Ma cuando Gretel ta es en lo, la sorsor ia intende clui la fornon e lasa ce Gretel coce en lo. E alora, el va come ance el.

Ma Gretel vide lo cual el es pensante, e dise: “Me no sabe fa lo. Como me pote entra?”

“Ganso fol,” la vea dise, “la porte es bastante grande. Vide! An me pote entra!” E el rampe a ante e pone sua testa a en la fornon. Alora Gretel puxa el a en lo, e clui la porte de fero, e clavi lo. O! Alora el comensa ulula tan asustante, ma Gretel fuji, e la sorsor vil ia es misera ardeda a mori.


Gretel core como lampo a Hansel, abri sua stala peti, e cria: “Hansel, nos es salvada! La sorsor vea es mor!”

Alora Hansel salta como un avia de sua caje cuando la porte ia es abrida. Los joia e abrasa lunlotra e dansa. E car los no plu nesesa teme el, los vade en la casa de la sorsor, e trova ce en cada angulo ia es caxones plenida con perlas e joalas. “Estas es multe plu bon ca calcules,” Hansel dise. E el pleni sua poxes con tan multe como el pote.

E Gretel dise: “Ance me va trae alga a casa con me.” E el pleni sua faldon.

“Ma aora nos debe vade,” Hansel dise, “afin nos pote sorti de la foresta de la sorsor.”


Pos cuando los pasea per du oras, los veni a un estende grande de acua.

“Nos no pote traversa,” Hansel dise. “Ma me no vide un ponte.”

“E ance on no ave un barco,” Gretel responde, “ma un pato blanca es nadante ala. Si me clama el, el va aida nos a traversa.”

Alora el cria:

“Oia me, oia me, pato peti!
Nos nesesa ce tu veni.
Nos vole traversa la acua larga.
Porta nos sur tua dorso blanca.”

La pato veni a los, e Hansel senta sur sua dorso, e dise a sua sore a senta a lado de el.

“No,” Gretel responda, “lo ta es tro pesosa per la pato peti. El va porta nos la un pos la otra.”

La bon pato peti fa tal, e pos cuando ambos de los ia es secur traversada e ia pasea per un pico de tempo, la foresta pare plu e plu conoseda a los, e los vide la casa de sua padre en la distantia. Alora los comensa rapidi, e core a en la salon, e lansa se sirca la colo de sua padre. La om no ia ave un ora felis de cuando el lasa la enfantes en la foresta. Ma la fem ia es mor. Gretel vacui sua faldon asta cuando perlas e joalas ia pleni la sala, e Hansel lansa plenimanos de sua pox en ajunta. Alora tota ansia ia es finida, e los ia abita juntada en felisia perfeta.


Mea nara es finida; ala un mus core. Cualcun ci catura lo pote fa un xapo grande de lo per se.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 21 april 2022 (17:21 UTC).