CULTUR E TRADISION CLASICA
Elas antica ·
Roma antica ·
Lingua ·
Leteratur clasica ·
Mitos clasica ·
Cultur clasica ·
Testos clasica
La poesias la plu antica de la leteratur elinica es la Iliada e la Odisea, cual veni de la sentenio 8 aec. An tal, esta poesias es plu la conclui de un tradision longa de poesia epica nonscriveda, de cual no cosa resta. Los ia es cantas per onora eroes de edas pasada, cual ia es mantenida par aedos e rapsodos.
La aedos no ia ave un testo scriveda, ma los ia crea denova la canta a cada ves cuando los ia presenta lo, con la aida de repete de alga formulas fisada: ajetivos, espresas nonvariable e senas cual ia repete. An tal, la rapsodos, plu tarda en la tempo, ia ave un testo.
Homero (sentenio 8 aec) es la poesiste elinica la plu antica ci on conose. El es regardada como la autor de la Iliada e la Odisea. Los es du epicas: la Iliada nara la coleria de Acile en la gera de Troia, e la Odisea esplica la aventuras de Odiseo cuando el ia reveni de Troia a Itaca.
La poesias homeral ia es composada par scrive, e los debe parteni a la momento en cual la epica ia pasa de canta par aedos a resita par rapsodos. A cualce caso, la tecnicas cual los ia usa deta ancora multe a la poesia nonscriveda, como ance elementos como contradises en la trama o la repete de formulas (grupos fisada de parolas).
El ia abita en Beotia, un rejion de Elas sentral multe isolida e tradisional. Sua mundo es acel de cultivores e de luta per survive.
La Teogonia nara la renas de tre dios ci ia governa la mundo: Urano, Crono e Zeus. Esta es la varia la plu conoseda de la ariva a potia de Zeus e de la dios olimpial, e lo es segueda par la tradision plu tarda.
Laboras e dias es un obra instruinte. Lo es un manual dedicada a Perse, frate de la poesiste, un mal manejor ci ia nesesa conselas sur la taxes de campo.
La poesia lirica ia nase en Anatolia, la zona la plu avansada de la mundo elinica, en la eda anticin (sentenio 7 aec). La apare de clases sosial e ideales nova ia provoca la loda de individualisme, cual fa ce la umanas canta sur ama, amia, tristia, cortia de vive, etc. Lo es un poesia intima.
A la plu de veses, la poesia lirica ia ave acompania musical: lo ia es cantada con acompania de un lira (de asi sua nom) o un flauta duple. Lo ia es fada en publica (festas) o privata (bancetas). Lo es divideda en sujeneros seguente sua metres e otra cualias como la tema, la acompania musical, la dialeto, etc.
La autores lirica xef ia es:
A fini de la sentenio 6 aec, formas variosa de teatro comensa developa en la mundo elinica: trajedia, comedia e drama satira.
La trajedia ia orijina probable de la rituos de Dioniso.
En la eda de Escilo, la poesistes dramal ia debe presenta un tetralojia a un concurso, formida par tre pesos de la mesma sicle mital e un peso cuatro plu corta, un drama satira.
La drama satira ia burla alga aspetas de la sicle e lo ia ave satiros como carateres xef (esentes con corpo umana e pedetas de capra mas, liada a la culto de Dioniso).
La trajedias presenta un strutur regulada e interveni en la du elementos fundal: la coro e la atores.
La trajedia ia trova sua inspira en la eroes de la mitolojia ci, con sua aventuras, ia provoca emosia e compatia per umanas. En la istoria de la trajedia elinica lejendas de la sicle teban es dominante, con la figures de Edipo, Antigona, Eteocle e Polinice; e la sicle troian, formida par eroes o persones liada a la gera de Troia, como Agamemnon, Ifijenia, Oreste, Eletra, Helena, etc.
Escilo (524–456 aec) es la prima de la tre trajedistes elinica importante. El ia boni la trajedia par ajunta un ator du e par permete ce la atores representa carateres variosa. De el on conserva la trilojia nomida la Orestia, cual es composada de Agamemnon, La coeforos e La eumenides.
Sofocle (496–406 aec) pensa sur dole umana e destina. On conserva sete trajedias de cual on nota Antigona, Edipo re e Edipo en Colono per la complicadia de sua trama. El ia introdui un ator tre, ia aumenta la grandia de la coro (de des-du a des-sinco persones) e ia crea tramas plu complicada. El ia abandona la strutur de trilojia de Escilo e ia crea obras nondependente de lunlotra. El ia es un mestre de crea carateres antagoniste.
La carateres mortal de la obras de Euripide (485–406 aec) es plu prosima a la persones de sua eda. Los ave sentis umana como duta o teme, e los gida se par sua pasiones con resultas dramosa. On pote nota Medea, Hipolito e La femes troian.
La comensa de comedia es relatada con la festas cual ia aveni en la teatro de Dioniso. Sua strutur es la seguente:
La comedia ia evolui de un forma multe politicida con un linguaje lasiva, asta un comedia nova, con multe stereotipos e un fini sempre joiosa. Tal, on ave tre partes:
El ia es la scrivor xef de comedia. Multe conservaliste, el no ia gusta Socrate, ci en sua comedia La nubes el presenta como un demagogo ci instrui stupidia a la jovenes. On conserva des-un comedias par el.
La parola “istoria” veni de elinica. Lo refere a la “nara de atas deduida de rexerca personal”. La istoria ia comensa con Herodoto de Halicarnaso (490–425 aec), ci ia scrive la Istoria, un obra divideda en nove libros cual nara la Geras Farsi.
Tucidide (454–400 aec) ia scrive un Istoria en oto libros. La obra parla sur la Gera de Peloponeso. El ia studia la causas de la gera seguente un model siensal, direta xercante informas e no credente la influe de la dios. El ia ajunta ance parlas fada par la politicistes de acel eda.
Xenofonte de Atina (428–350 aec) ia continua la labora de Tucidide con sua Istoria elinica. El es ance la autor de obras como Educa de Ciro e Anabase o La mision de la des mil, cual nara la mision de mersenarios elinica contratada par la prinse farsi Ciro per espulsa sua frate Artaxerxe de sua rena.
Entre la istoristes roman on nota Polibio (205–120 aec), Strabon (64 aec–24 ec) e Plutarco (50–120 ec).
La retorica ia deveni importante en Atina con la nase de democratia, car on ia debe convinse la asemblas poplal a defende sua propre puntos de vista.
La retoricistes xef de la sentenio 4 aec ia es:
Lo es la jenero ultima cual ia apare en la leteratur elinica. Lo es considerada como la refleta de un eda individualiste e dejenerada, cual ia xerca evade la realia dial. La elementos de la novela elinica es:
La novela la plu importante es Dafne e Cloe par Longo (sentenio 2 ec).
La testos prima de epica latina es scriveda par Livio Andronico (284–204 aec), Gneo Nevio (275–202 aec) e Quinto Ennio (239–169 aec).
Verjilio es la autor epica la plu importante. El ia scrive la Eneida, un epica nasional roman cual combina la Odisea en sua ses capitoles prima, e la Iliada en sua ses ultimas.
Verjilio ia scrive la Bucolicas e la Jeorjicas.
La poesistes lirica xef ia es Catulo (87–54 aec), Horatio (65–8 aec), Tibulo (50–19 aec), Propertio (50–15 aec) e Ovidio (43 aec–17 ec).
La obras lirica par Horatio es la Epodos, poesias satira, e la Odas, en cual el canta sur ama, amia e vive. El ia formi temas cual ia survive como beatus ille (loda a la vive en campo), carpe diem (ta ce on profita de la momento), aurea mediocritas (contentia con lo cual on ave, evitante esede).
La obras de Ovidio es difisil per clasi car los ave temas variosa. On pote nota Ars Amandi, un manual per sedui; e Mutas, un poesia en des-sinco libros e 12 000 linias cual descrive la crea e istoria de la mundo.
La satira es un jenero creada par la romanes cual critica costumes e persones concreta. Lo es un critica construinte cual xerca coreti defetos. On nota Horatio, Aulo Persio Flaco (34–62 ec) e Decimo Junio Juvenal (55–130 ec).
La epigram es un poesia corta e satira. La autor la plu importante de satiras ia es Martial (40–104 ec).
La scrivores xef de comedia ia es Plauto (254–184 aec) e Terentio (190–159 aec).
On conserva 21 comedias de Plauto. Sua comedias es solveda par interveni de un sclavo protagoniste. Plauto crea tipos de carateres fisada ci ia fa ce la popla rie. Alga de la plu abituales ia es:
Publio Terentio African ia es un sclavo de Cartago. De el on ave ses comedias, entre cual on trova La frates, La madre par sposi e La autotormentor.
La autor roman de trajedias la plu importante ia es Lucio Anneo Seneca (4 aec – 65 ec), ci ia es un filosofiste stoica importante. On conserva des obras de esta autor, de cual nove ave un tema elinica, influeda par Euripide.
La obras prima de istoriografia roman es de la sentenio 3, fada par la analisores, ci ia scrive en elinica la atas political, relijial e sosial la plu importante de cada anio.
La autor prima ci ia scrive istoriografia en latina ia es Caton (234–149 aec), autor de Orijinas.
En la eda republiciste la autores la plu importante ia es Julio Cesar, Salustio e Cornelio Nepote.
Julio Cesar (101–44 aec) ia nara sua campanias militar contra la galos en Sur la gera de Galia e la gera contra Pompeio en Comentas sur la gera interna.
Salustio (87–35 aec) ia scrive monografias sur atas individua. On nota La gera de Catilina e La gera de Iugurta.
Cornelio Nepote (100–25 aec) ia scrive Sur omes famosa. La nara es composada de des-ses libros con biografias de jenerales nonroman como Temistocle e Epaminonda.
Tito Livio (64 aec – 17 ec) ia scrive 142 libros divideda en desenios (grupos de des libros) en cual el nara la istoria de Roma de la ariva de Enea.
Tacito (sirca 55–120), autor de la Istoria (106–109), ia nara avenis de la mori de Ciceron asta la mori de Domitiano, e la Arcivos anial (117) cual nara de la rena de Tiberio asta lo de Neron.
Suetonio (70–140) ia publici Sur la vive de la [des-du] Cesares, biografias con detalias individua de la governores roman de Cesar asta Domitiano.
La retorica ia es multe importante en Roma. La romanes ia distingui du stilos:
A la fini de la Republica la retoriciste la plu importante de la leteratur roman ia apare, Ciceron (106–34 aec). On nota sua In Verrem, sete parlas contra Vere, ci ia es governor de Sisilia, con acusas de froda, car el ia saca sua abitores; e ance sua In Catilinam, cuatro parlas contra L. Sergio Catilina, ci ia conspira per oteni potia cuando el no ia es elejeda como consul.
Pos Ciceron, Marco Fabio Quintiliano (30–100 ec) ia scrive Institutio Oratoria, cual es la libro de retorica la plu importante de la mundo roman.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 14 janero 2022 (17:16 UTC).