CULTUR E TRADISION CLASICA
Elas antica · Roma antica · Lingua · Leteratur clasica · Mitos clasica · Cultur clasica · Testos clasica

Cultur clasica

Elas antica

Familia

La unia familial en Elas ia es formida par la sposi e la enfantes, cual ia es jeneral un o du. Sposi ia es legal sola entre sitadanes, e lo ia es un contrata (engyesis) con la ojeto de produi desendentes. Lo ia es acordada par la xico de cor e la padre de la xica de cor (o sua representor mas legal).

La om ia sposi frecuente con tredes anios e la fem con des-ses. La xica ia dona a la diva Artemis sua juetas de xica a la dia ante la rituo de sposi, un mexa de sua capeles, e sua sintur, simbol de virjinia. La xico ia talia sua capeles.

A la dia de la rituo de sposi, la xico ia presenta se en la casa de la padre de la xica, do un banceta ia aveni. La xico ia leva la velo de la xica, ia prende el de la brasos de sua madre e ia porta el en sua caro a sua casa. La madre de la sposa ia vade ante los con un torxa de pino e acompaniada par xicos joven ci ia canta. En la porta de la casa la amis e familianes ia fa cantas de sposi. Tota la sposis en Elas ia aveni en la sera con la lus de torxas.

Educa

En Atina on no ia ave educa publica. La padre ia deside la modo de educa sua enfantes asta cuando los ia ave des-oto anios. Con esta eda, los ia deveni adultes e ia comensa sua vive publica e de soldato. La enfantes ia es curada par la femes de la casa: la madre, la sclavos fema e la tetores. A pos, on ia envia frecuente la xicos a alga scola, cual ia es la casa de un mestre privata a ci los ia debe paia.

En la anios prima, un gramaticiste ia ensenia la leteras e aritmetica fundal. La metodo ia es fundida en memori la testos de poesistes grande, xef Homero, de ci sua obras ia es videda como esemplos de virtuas e valuas. En la familias rica, la labora ia es completida par un ensenior, un sclavo ci ia acompania la enfante a cada loca e ia es encargada con sua educa.

Plu tarda, la enfantes ia comensa un educa musical, car musica, canta e dansa ia es esensal en la vive publica e privata de la atinanes. Ultra canta, los ia aprende jua la sitra e la aulos.

A fini, la educa ia es completida con jinastia. Lo ia comensa cuando la atinan ia ave des-du anios e ia continua asta cuando el ia ave des-oto. La sportes la plu comun ia es los cual ia es integrada en la pentatlon.

La jovenes con des-oto anios ia comensa la servi militar de du anios. En Atina los no ia ave un ensenia simil a nosa universia, ma, pos la du anios de servi militar, los ci ia vole aprende plu ia pote fa lo con la filosofistes. En la sentenio 4 aec, la ensenia superior ia boni con la fundi de la Academia de Platon e la scola de retorica de Isocrate.

En Sparta la educa ia es diferente. Los ia ensenia desvalua mone e luso. Educa ia es simil per ambos sesos ma con ojetos diferente: la omes ia debe forti per gera, e la femes per ave enfantes sana. La xicos, entre 7 e 12 anios, ia abandona sua familia e ia formi grupos seguente eda, en cual los ia reseta educa fundal:

La enfantes ia es nuda, sin sapatos e con testa rasada.

Con 20 anios, los ia sposi e ia pasa a la servi militar ativa e ia vive en grupos nomida syssita. Con 30 anios, cuando los ia fini la servi militar ativa (los ia es retenida en reserva asta 60 anios), la spartanes ia pote vive con sua familias e ocupa postos publica.

Comeda

La elinicas ia come a tre veses en la dia:

Los ia come sentante e usante sua ditos. Los ia pote usa un cotel per talia la carne e un culier per la sopas. La funda de la come elinica ia es la sereales, xef trigo, segal e spelta. Con la trigo los ia fa semola, cual los ia boli, e farina. La farina ia es amasada con fermentante e en la forno ia servi per prepara pan. O lo ia es ance usada con ceso e miel. La sereales ia es frecuente servida con opson, cual ia es vejetales.

La pex ia es comeda en sopa, fritada o grilida. La elinicas no ia come multe carne, sola en bancetas o sacrifias. An tal, los ci ia vive en la campania ia come aves de cultiveria e alga carne de porco, de capra o de capra mas.

La bevida la plu consumada ia es vino, cual ia es bevida en la parte du de la banceta o pos come. Los ia ajunta erbas, spises e miel a la vino.

Vestes

La vestes en Elas antica ia es la chiton, peplos e chlamys. La omes e femes elinica ia porta frecuente du vestes:

La vestes en Elas antica ia es fundida xef sur nesesa, funsiona e proteje, e no sur identia. Tal, la vestes ia es simple, drapeda e nonfisada. La pesos ia pote es intercambiada entre omes e femes. An tal, la femes ia porta sua robas asta la talos e la omes asta sua jenos, dependente de la situa.

La stofa ia es drapeda sirca la corpo e ia pote es alga transparente. La omes no ia es disturbada par nudia, ma la femes ia pote es nuda sola en la banierias publica. Tipal, los ia vesti se con color purpur como sinia de ricia, car la tinje ia veni de la flor la plu custosa.

Roma antica

Familia

La familia roman ia es estendosa e ia es formida par la pater familias e tota la membros su sua autoria: la fem, la desendentes (enfantes, netos…), sclavos e sclavos librida.

Pater familias ia es cualce sitadan roman sin asendentes mas vivente. Cuando el ia mori, cada fio ia deveni pater familias de sua propre desendentes. La cuantia de fios ia varia entre un o tre.

En la Republica, la pater familias ia ave un autoria nonlimitada (patria potestas): el ia pote ance vende e esecuta sua enfantes. Esta ia desapare con la Impero.

La sposi, como en Elas, ia es un contrata privata de cual la ojeto ia es ave enfantes. An si en la comensa lo ia es desideda par la jenitores, plu tarda la acorda de la sposis ia es nesesada. La eda legal per sposi ia es a des-du anios per la xicas e des-cuatro per la xicos, an si la xicos ia sposi frecuente con tredes anios. De 445 aec (cuando la popla comun ia pote sposi la fias de la patrisios), la sposis sine manu ia deveni plu jeneral. Estas ia permete manteni la potia de la padre supra sua fia an pos sua sposi. Ance un forma nova de sposi ia es creada, la nuptias, en cual la acorda de ambos ia es nesesada.

La divorsa ia es frecuente. En caso de divorsa, la sposa ia prende sua proprias e sua dote e ia reveni a la casa de sua padre. La enfantes ia resta jeneral con la sposo.

Educa

Tipal, educa ia aveni en la familia, ma a fini de la Republica la abitua de confida la educa a mestres profesal ia estende. En la Impero, scolas publica ia es creada en Roma e en otra sites importante, per cual la Stato o la munisipas ia paia.

De 7 anios, e asta 12, xicos e xicas ia reseta sua educa prima. La familias rica ia confida esta a un ensenior, frecuente elinica, per ci, si el ia es un sclavo, los ia debe paia multe mone. La povres ia envia sua enfantes a la scola fundal (ludus litterarius) cual ia instrui los a scrive e leje. Multe xicos e xicas ia fini sua educa asi.

Sola un minoria ia continua studia entre des-du e des-ses anios, a la scola de gramatica, do la gramaticiste ia ensenia la gramatica elinica e latina usante la testos clasica. La comenta de acel testos ia servi per aprende, an si surfasal, mitolojia, jeografia e istoria. Cuando los ia fini, multes ia reseta la toga viril (cual ia converti los a adultes) e ia comensa sua vive political o militar.

An tal, un cuantia an plu peti ia continua studia en la scolas de retorica entre des-ses e des-oto anios. La mestre ia ensenia a los la arte de parla publica e de convinse. Pos alga tempo, esta ia deveni la prepara per scrive parlas e manteni debates artifis a temas sin interesa e sin lia con realia.

Comeda

De la comensa de la Republica asta 200 aec, romanes antica ia ave abituas de come simple. Un come simple ia es consumada a la ora des-un. Lo ia es composada de pan, salada, olivas, ceso, fruta, nozos e carne calda restante de la come de sera de la dia presedente.

La familia ia come juntada, sentante sur sejas sirca un table. Plu tarda, un sala de come con sofas de come ia es desiniada, la triclinium. La comores ia prende la comeda con sua ditos e ia pone lo en sua boca. On ia usa culieres per sopa.

La nomes de la comedas ia es:

La povres ia come comedas simple, como gaxas con pexes o legumes. Car la carne ia es custosa, los ia consuma avias de cultiveria o comedas de mar. La plu povres ia come ance ceso, frecuente con pan.

Vestes

En Roma antica, la vestes ia divide la persones entre clases sosial. La camison de la popla comun ia es fada de stofa ru e oscur, e la camison de la patrisios ia es de stofa de lino o de lana blanca. La camisones militar ia es plu corta ca los de la siviles.

La togas variosa ia es ance nomida. La xicos, asta la festa de Liberalia, ia porta un toga praetexta, cual ia es un toga con un borda carmesi o purpur, ance portada par la ofisiores. La toga virilis ia es portada par omes adulte per indica sua sitadania en Roma. La toga picta ia es portada par jenerales vinsente. La toga pulla ia es portada cuando la persones ia lamenta.

An la sapatos ia indica la state sosial. La patrisios ia porta sandales orania e roja, senatores ia ave sapatos brun, consules ia ave sapatos blanca, e la soldatos ia ave botas pesosa. Femes ia porta sapatos cluida, de colores como blanca, verde o jala.

La bulla ia es un joala majiosa usada par enfantes. Ante sposi, la femes ia dona sua bulla (a veses, nomida partha) a la dios de la casa, con sua juetas, per indica maturia e femia.

Tipal, la omes ia porta un camison (toga) e la femes un stola, cual ia es un roba con colores briliante, portada supra la camison. Un brox (fibula) ia pote es usada per orna o per manteni la stola en sua loca. Un xal (palla) ia es frecuente usada con la stola.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 7 setembre 2020 (19:53 UTC).