III

La palasio de la re de Haripuñjaya ia es a sola un dia par cavalo de la palasio de la prinsesa. La soldato ia ariva e ia entra direta a la salon reial, do la re ia es con sua sposa.

“Mea re!” la soldato ia dise. “Pardona ce me entra tal, ma un om ia es traeda par la rio a la palasio de la prinsesa, e el ia dise ce el veni de Cantijangi.”

La persones ci ia es con la re ia silenti, e sua fases ia deveni blanca.

“De do tu dise ce el ia veni?” la re ia demanda, en cuando el ia leva se de la seja reial.

“De Cantijangi!” la soldato ia responde.

“Do es la saja Havam?” la re ia dise.

“Me es asi, mea re,” Havam ia dise en cuando el ia sorti de entre la persones en la salon.

“Me debe parla con el,” la re ia dise, “ta ce tota de vos sorti de la salon reial, an tu, mea rea amada.”

A pos la re e la saja Havam ia resta sola, e la saja ia comensa dise: “Tu pote vide, mea re Yip, ce mea predise ia deveni realia e ce me no ia menti a tu en acel dia cuando la prinsesa Txamadevi ia nase e me ia leje la stelas de sua destina.”

“Si lo es vera, cual tu ia dise. Me es la re ultima de mea dinastia, la rena Haripuñjaya va es destruida par la rena Ham e la prinsesa va deveni la rea de un otra rena.”

“Si, acel es lo cual me ia predise, mea re,” Havam ia ajunta.

“Ma como algun va sorti de Cantijangi? Como? La site es un fortres do sua popla ia es sclavida, vera? La sola modo en cual on ia pote sorti es…”

“… par lansa se de la murones de la site e cade en la rio,” Havam ia completi la frase.

“Ma la rio ave crocodiles e serpentes. Como el ta pote survive?” la re Yip ia demanda a se.

“Lo no importa, mea re. Mea consela a tu es ce tu sposi tua fia con la stranjer tan rapida como posible e lasa ce los vade distante de sua palasio, car la tempo prosimi cual es desideda par la destina ce tua rena debe fini,” Havam ia comenta.

“Ma como me va sposi mea fia con un stranjer? Me sabe no cosa sur el …” Yip ia ajunta.

“Tu sabe ce la prinsesa ia rejeta tota la reclamores ci el ia ave ja, e la predise ia es clar: ‘La prinsesa va sposi sola par causa de ama, e de esta ama la libria de un popla sclavida e oblidada va nase, ci va aseta el como un fia.’”

“Me no vole ce mea rena desapare e mea fia deveni rea de un rena de sclavos. Esce mea dinastia debe fini tal?”

“Tua dinastia no va fini tal, ma va cambia, va survive, e va uni con la sangue de la site Cantijangi, cual ia es un de la sites la plu conoseda e la plu respetada de tota la Anticia.”

“Ma aora lo es un site de sclavos e povres!” Yip ia ajunta.

“Mea re, esce tu ia oblida como tua dinastia ia comensa?” Havam ia demanda el.

La re Yip ia para se. Havam ia dise coreta: sua dinastia ia comensa cuando sua asendente, un cultivor, ia luta contra la re e sua soldatos par causa de la miseria cual acel dinastia ia es traente a la rena. De acel momento, sua familia ia es la dinastia renante, e los ia rena sempre con justia.

“No deveni orgulosa, mea re, como ia aveni a la popla de Cantijangi,” Havam ia dise. “Es grasiosa ce tua fia va survive la destina de la popla e la rena. Tu, mea re Yip, ia governa ja con justia e coraje. No lasa ce tua eda fa cambia esta en tua cor. Asta la dia ultima, la re Yip va governa como el ia sempre fa lo, e el va encontra sua destina con la mesma disposa cual el ia ave cuando el ia fronti tota cual aveni en sua vive. Como sempre e asta sempre, temente no cosa e no person.”

“Como sempre tua parolas es saja, mea cara Havam; e tu trova la forma de radisi coraje denova en esta cor fatigada. Ta ce la destina veni per trova nos, e nos va es preparada per fa cualce cosa cual es demandada de nos.”

“Esta es la modo como la re Yip ia parla sempre!” Havam ia dise.

“Soldatos, prepara mea cavalo, nos vade per visita la palasio de la prinsesa Txamadevi,” la re Yip ia ajunta.