I

La site Cantijangi ia es un site grande, ma cual no ia pote crese plu par causa de sua situa: la montania santa, cual ia es pos la site, ia es sua proteje e sua muron, ma lo no ia lasa la site developa plu, donce la popla de Cantijangi ia construi creante niveles diferente, asta ariva a la media de acel montania.

Rancur ia nase en un note fortunosa, cuando la stelas ia covre la sielo. En acel tempo, la site ia es la plu rica de la sude de Asia, e la xineses, la baratis, la muslimes de Indonesia, la budistes de Burma e alga misionores cristian ia visita lo. Acel site ia adora sola un dio, de ci me no pote scrive sua nom asi. Sola la cantijangianes pote conose lo. En acel note en cual Rancur ia nase, la note prefereda de acel dio, un stela ia pasea tra la sielo, de un lado a otra, lasante totas pensante. La prete ia dise: “Oji es un dia spesial per Cantijangi, car un eroe va nase ci va libri nosa popla.”

La abitores no ia crede el, car Cantijangi ia es un site libre, e nun ia atenta ataca lo. Sua murones ia es la plu grandes de la mundo conoseda, sua armada no ia conose un egal, e sua popla ia es orgulosa. E lo es acel orgulo cual ia es la comensa de sua fini.

Car pico e pico, la abitores ia deveni plu orgulosa, e la enfantes, ci ia nase en un mundo de ricia, ia comensa maltrata la comersiores, la visitores, e la stranjeres, oblidante ce la popla de Cantijangi, en sua nase, ia es un popla de refujadas, ci ia trova en acel monte un refuja contra los ci ia vole sclavi los. E cuando los ia ataca un comersior multe rica, los no ia sabe lo cual los fa.

La comersior ia reveni a sua rena, la rena Ham, e ia parla de la ricia de Cantijangi a sua re avar, ci ia prepara la armada per concista la site con la escusa de acel ataca.

Cantijangi ia resiste, ma la armada de la rena Ham ia trova un via: usante la rio cual ia dona acua a la site. La soldatos ia traversa la murones par nada su la acua. Tal la site de Cantijangi ia cade. Nos ia es cadenida e traeda a la rena Ham, paseante, tra la forestas, tra la montes, tra la junglas, asta ariva a la loca en cual nos abita aora: un site de sclavos. Un site cual ia reseta la mesma nom como nosa site: Cantijangi.

E, en tota esta tempo, totas ia oblida la predise de la prete: ma no la madre de Rancur, ci ia ave espera en sua fio.

---

Des-ses anios plu tarda

Rancur ia core tra la site. Acel site de cabanas de fango, construida ensircante la mina en cual la cantijangianes ia labora tra tota la dias de sua vive, de cuando los ia es peti, asta la dia de sua mori. El ia recorda no otra vive, acel vive en la site Cantijangi orijinal, de cual la veas ia parla tan multe, plorante. Rancur ia core, ia jua, ia canta con sua amis, oblidante la mundo de sclavia cual ia persegue el.

En acel dia, an si el no ia sabe lo, alga cosa va cambia en sua mundo. El ia deside visita la prete, ci es ja multe vea, ma cuando el ia entra en sua cabana, el ia es sur la solo, con la oios blanca, spumante e disente:

Car vos va vide, acel ci vos ia crede mor, car vos ia vide el, con coraje en sua fas, reveni per libri de sclavia la popla de Cantijangi. Asi veni la esperia de Cantijangi, asi lo veni, la furia de Rancur, la leon de Cantijangi per destrui la cadenas cual ia lia nosa colos e nosa mentes. La ora ia ariva: trema, rena Ham, car tua fini es prosiminte.

Rancur ia core a sua casa, per parla con sua madre e dise a el lo cual el ia oia diseda a la prete. Pico a pos, la mesaje ia estende tra tota la sclavos, ci ia vide Rancur como un eroe. Ma esta no ia plase Cunjir, un trador ci ia deveni la gardor de sclavos, un fio de Cantijangi ci ia deveni la gardor la plu savaje contra sua popla propre. El ia vade a la comandor de la site de sclavos, Nhan Ghun Phen ci ia deside mata el.

En acel dia, sin perde tempo, Cunjir ia gida Nhan Ghun Phen e sua soldatos a la casa de Rancur. Ma sua madre, vidente los, ia dise el: “Sorti tra la fenetra cual es pos nosa casa e fuji.”

Sin sabe multe bon do el pote fuji, Rancur ia fa como sua madre ia dise a el. El ia asende la niveles de la site de sclavos, e, de ala, el ia pote vide como Cunjir ia sorti sua madre de la casa, bate el e demanda: “Do es la xico?”

“Me no sabe lo. El ancora no ia reveni a casa.”

E, prendente un spada, Cunjir ia talia la colo de acel fem.

“Nooooo,” Rancur ia cria. E acel cria ia fa ce la soldatos descovre el.

“Catura el!” Cunjir ia comanda.

E la soldatos ia comensa persegue el tra la niveles de la site asta ariva a la muron. De ala, el vide sola la jungla.

“Esce tu crede ce tu pote fuji de esta site?” Cunjir ia demanda a el, prendente el par la spala.

Rancur ia morde sua mano e ia aranca un de sua ditos.

“Bastardo,” Cunjir ia cria, abrinte sua mano.

Rancur ia salta a la rio, e nun ia sabe plu de el en acel site de sclavos.